87

	kaLam pukal Ompumin, tevvir! pOr etirn'tu,
	emmuLum uLan oru porun'an; vaikal
	eN tEr ceyyum taccan
	tigkaL valitta kAl annOnE.

88

	yAvir Ayinum, 'kUzai tAr koNTu
	yAm porutum' enRal Ompumin Ogku tiRal
	oLiRu ilagku n'eTu vEl mazavar perumakan,
	katir viTu n'uN pUN am pakaTTu mArpin
5	vizavu mEmpaTTa n'al pOr
	muzavut tOL ennaiyaik kANA UgkE.

89

	'izai aNip polin'ta En'tu kOTTu alkul,
	maTavaral, uNkaN, vAL n'utal, viRali!
	porun'arum uLarO, n'um akan talai n'ATTu?' ena,
	vinaval AnAp porupaTai vEn'tE!
5	eRi kOl ajcA aravin anna
	ciRu val maLLarum uLarE; atAanRu,
	potuvil tUgkum viciyuRu taNNumai
	vaLi poru teN kaN kETpin,
	'atu pOr' ennum ennaiyum uLanE.

90

	uTai vaLai kaTuppa malarn'ta kAn'taL
	aTai malku kuLaviyoTu kamazum cAral,
	maRap puli uTalin, mAn kaNam uLavO?
	maruLina vicumpin mAtirattu INTiya
5	iruLum uNTO, jAyiRu cinavin?
	accoTu tAkkip pAr uRRu igkiya
	paNTac cAkATTu Azcci colliya,
	vari maNal jemara, kal paka, n'aTakkum
	perumitap pakaTTukkut tuRaiyum uNTO?
10	ezumaram kaTukkum tAL tOy taTak kai
	vazu il van kai, mazavar peruma!
	iru n'ilam maN koNTu cilaikkum
	porun'arum uLarO, n'I kaLam pukinE?

91

	valam paTu vAyvAL En'ti, onnAr
	kaLam paTak kaTan'ta kazal toTit taTak kai,
	Ar kali n'aRavin, atiyar kOmAn!
	pOr aTu tiruvin polan' tAr ajci!
5	pAl purai piRai n'utal polin'ta cenni
	n'IlamaNi miTaRRu oruvan pOla
	mannuka peruma! n'IyE, tol n'ilaip
	peru malai viTarakattu aru micaik koNTa
	ciRiyilai n'ellit tIm kani kuRiyAtu,
10	Atal n'in akattu aTakki,
	cAtal n'Igka, emakku IttanaiyE!

92

	yAzoTum koLLA; pozutoTum puNarA;
	poruL aRivArA; Ayinum, tan'taiyarkku
	aruL van'tanavAl, putalvartam mazalai;
	en vAyc collum anna onnAr
5	kaTi matil araN pala kaTan'ta
	n'eTumAn ajci! n'I aruLalmARE.

93

	tiN piNi muracam izumena muzagkac
	cenRu, amar kaTattal yAvatu? van'tOr
	tAr tAgkutalum ARRAr, veTipaTTu,
	OTal marIiya pITu il mannar
5	n'OyppAl viLin'ta yAkkai tazIi,
	kAtal maRan'tu, avar tItu marugku aRumAr,
	aRam puri koLkai n'AnmaRai mutalvar
	tiRam puri pacum pul parappinar kiTappi,
	'maRam kan'tAka n'al amar vIzn'ta
10	n'IL kazal maRavar celvuzic celka!' ena
	vAL pOzn'tu aTakkalum uyn'tanar mAtO
	vari jimiRu Arkkum vAy puku kaTAattu
	aNNal yAnai aTu kaLattu oziya,
	aruj camam tataiya n'URi, n'I,
15	perun' takai! vizup puN paTTa mARE.

94

	Urk kuRumAkkaL veN kOTu kazAalin,
	n'Irt tuRai paTiyum perug kaLiRu pOla
	iniyai, peruma! emakkE; maRRu atan
	tun arug kaTAam pOla
5	innAy, peruma! n'in onnAtOrkkE.

95

	ivvE, pIli aNin'tu, mAlai cUTTi,
	kaN tiraL n'On kAz tirutti, n'ey aNin'tu,
	kaTiyuTai viyal n'akaravvE; avvE,
	pakaivark kutti, kOTu, n'uti, citain'tu,
5	kol tuRaik kuRRila mAtO enRum
	uNTAyin patam koTuttu,
	illAyin uTan uNNum,
	illOr okkal talaivan,
	aNNal em kOmAn, vain' n'uti vElE.

96

	alar pUn' tumpai am pakaTTu mArpin,
	tiraNTu n'ITu taTakkai, ennai iLaiyORku
	iraNTu ezun'tanavAl, pakaiyE: onRE,
	pUp pOl uNkaN pacan'tu, tOL n'uNuki,
5	n'Okkiya makaLirp piNittanRu; onRE,
	'vizavinRuAyinum, paTu patam pizaiyAtu,
	mai Un mocitta okkaloTu, tuRai n'Irk
	kaimAn koLLumO?' ena,
	uRaiyuL muniyum, avan cellum UrE.

97

	pOrkku uraiip pukanRu kazitta vAL,
	uTanRavar kAppuTai matil azittalin,
	Un uRa mUzki, uru izan'tanavE;
	vElE, kuRumpu aTain'ta araN kaTan'tu, avar
5	n'aRug kaLLin n'ATu n'aittalin,
	curai tazIiya irug kAzoTu
	maTai kalagki n'ilai tirin'tanavE;
	kaLiRE, ezUut tAgkiya katavam malaittu, avar
	kuzUuk kaLiRRuk kuRumpu uTaittalin,
10	parUup piNiya toTi kazin'tanavE;
	mAvE, paran'tu orugku malain'ta maRavar
	polam pain' tAr keTap paritalin,
	kaLan uzan'tu acaiiya maRuk kuLampinavE;
	avan tAnum, n'ilam tiraikkum kaTal tAnaip
15	polan' tumpaik kazal pANTil
	kaNai poruta tuLait tOlannE.
	AyiTai, uTanROr uytal yAvatu? 'taTan' tAL,
	piNik katir, n'ellin cemmal mUtUr
	n'umakku urittAkal vENTin, cenRu avaRku
20	iRukkal vENTum, tiRaiyE; maRuppin,
	olvAn allan, velpOrAn' enac
	collavum tERIrAyin, mel iyal,
	kazal kani vakutta tuNaic cil Oti,
	kuRun' toTi makaLir tOL viTal
25	iRumpUtu anRu; aHtu aRin'tu ATuminE.

98

	munait tevvar muraN aviyap
	porak kuRukiya n'uti maruppin n'in
	inak kaLiRu celak kaNTavar
	matil katavam ezuc cellavum,
5	piNan azugkak kaLan uzakkic
	celavu acaiiya maRuk kuLampin n'in
	ina n'al mAc celak kaNTavar
	kavai muLLin puzai aTaippavum,
	mArpuRac cErn'tu olkAt
10	tOl ceRippu il n'in vEl kaNTavar
	tOl kaziyoTu piTi ceRippavum,
	vAL vAytta vaTup paran'ta n'in
	maRa main'tar main'tu kaNTavar
	puN paTu kuruti ampu oTukkavum,
15	n'IyE, aiyavi pukaippavum tAgkAtu, oyyena,
	uRumuRai marapin puRam n'inRu uykkum
	kURRattu anaiyai; Akalin, pORRAr
	iragka viLivatukollO varampu aNain'tu
	iRagkukatir alamvaru kazani,
20	perum punal paTappai, avar akan talai n'ATE!

99

	amararp pENiyum, Avuti aruttiyum,
	arum peRal marapin karumpu ivaN tan'tum,
	n'Ir aka irukkai Azi cUTTiya
	tol n'ilai marapin n'in munnOr pOla,
5	Ikai am kazal kAl, irum panam puTaiyal,
	pU Ar kAvin, puniRRup pulAl n'eTu vEl,
	ezu poRi n'ATTattu ezAat tAyam
	vazu inRu eytiyum amaiyAy, ceru vETTu,
	imiz kural muracin ezuvaroTu muraNic
10	cenRu, amar kaTan'tu, n'in ARRal tORRiya
	anRum, pATun'arkku ariyai; inRum
	paraNan pATinan maRkol maRRu n'I
	muraN miku kOvalUr n'URi, n'in
	araN aTu tikiri En'tiya tOLE!

100

	kaiyatu vElE; kAlana punai kazal;
	meyyatu viyarE; miTaRRatu pacum puN;
	vaTkar pOkiya vaLar iLam pOn'tai
	uccik koNTa Uci veN tOTTu,
5	veTci mA malar, vEgkaiyoTu viraii,
	curi irum pittai poliyac cUTi,
	varivayam poruta vayak kaLiRu pOla,
	innum mARAtu cinanE; annO!
	uyn'tanar allar, ivan uTaRRiyOrE;
10	ceRuvar n'Okkiya kaN, tan
	ciRuvanai n'Okkiyum, civappu AnAvE.

101

	oru n'AL cellalam; iru n'AL cellalam;
	pala n'AL payinRu, palaroTu cellinum,
	talai n'AL pOnRa viruppinanmAtO
	izai aNi yAnai iyal tEr ajci
5	atiyamAn; paricil peRUum kAlam
	n'ITTinum, n'ITTAtuAyinum, kaLiRu tan
	kOTTu iTai vaitta kavaLam pOlak
	kaiyakattatu; atu poy AkAtE;
	arun'ta EmAn'ta n'ejcam!
10	varun'ta vENTA; vAzka, avan tALE!

102

	'erutE iLaiya; n'ukam uNarAvE;
	cakaTam paNTam peritu peytanRE;
	aval iziyinum, micai ERinum,
	avaNatu aRiyun'ar yAr?' ena, umaNar
5	kIz marattu yAtta cEma accu anna,
	icai viLagku kavi kai n'eTiyOy! tigkaL
	n'AL n'iRai matiyattu anaiyai; iruL
	yAvaNatO, n'in n'izal vAzvOrkkE?

103

	oru talaip patalai tUgka, oru talait
	tUmpu akac ciRu muzAt tUgkat tUkki,
	'kavizn'ta maNTai malarkkun'ar yAr?' enac
	curanmutal irun'ta cil vaLai viRali!
5	celvaiAyin, cENOn allan;
	munai cuTa ezun'ta magkul mAp pukai
	malai cUz majcin, maza kaLiRu aNiyum
	pakaip pulattOnE, pal vEl ajci;
	pozutu iTaippaTAap pularA maNTai
10	mezuku mel aTaiyin kozu n'iNam peruppa,
	alattaR kAlai Ayinum,
	purattal vallan; vAzka, avan tALE!

104

	pORRumin, maRavIr! cARRutum, n'ummai:
	Urk kuRumAkkaL ATak kalagkum
	tAL paTu cil n'Irk kaLiRu aTTu vIzkkum
	IrppuTaik karAattu anna ennai
5	n'uN pal karumam n'inaiyAtu,
	'iLaiyan' enRu ikazin, peRal aritu, ATE.

140

	taTavu n'ilaip palavin n'Ajcil porun'an
	maTavan, manRa; cen' n'Ap pulavIr!
	vaLaik kai viRaliyar paTappaik koyta
	aTakin kaNNuRaiAka yAm cila
5	arici vENTinEmAka, tAn piRa
	varicai aRitalin, tannum tUkki,
	irug kaTaRu vaLaiiya kunRattu annatu Or
	perug kaLiRu n'alkiyOnE; annatu Or
	tERRA Ikaiyum uLatukol?
10	pORRAr amma, periyOr tam kaTanE?

187

	n'ATA konRO; kATA konRO;
	avalA konRO; micaiyA konRO;
	ev vazi n'allavar ATavar,
	av vazi n'allai; vAziya n'ilanE!

206

	vAyilOyE! vAyilOyE!
	vaLLiyOr cevimutal vayagkumozi vitti, tAm
	uLLiyatu muTikkum uranuTai uLLattu
	varicaikku varun'tum ip paricil vAzkkaip
5	paricilarkku aTaiyA vAyilOyE!
	kaTumAn tOnRal n'eTumAn ajci
	tan aRiyalankol? en aRiyalankol?
	aRivum pukazum uTaiyOr mAyn'tena,
	vaRun' talai ulakamum anRE; atanAl,
10	kAvinem kalanE; curukkinem kalappai;
	maram kol taccan kai val ciRAar
	mazuvuTaik kATTakattu aRRE
	et ticaic celinum, at ticaic cORE.

231

	eRi punak kuRavan kuRaiyal anna
	kari puRa viRakin Ima oL azal,
	kuRukinum kuRukuka; kuRukAtu cenRu,
	vicumpuRa n'ILinum n'ILka pacug katirt
5	tigkaL anna veNkuTai
	oN jAyiRu annOn pukaz mAyalavE.

232

	illAkiyarO, kAlai mAlai!
	allAkiyar, yAn vAzum n'ALE!
	n'aTukal pIli cUTTi, n'Ar ari
	ciRu kalattu ukuppavum koLvankollO
5	kOTu uyar piRagku malai kezIiya
	n'ATu uTan koTuppavum koLLAtOnE?

235

	ciRiya kaL peRinE, emakku Iyum; mannE!
	periya kaL peRinE,
	yAm pATa, tAn makizn'tu uNNum; mannE!
	ciRu cORRAnum n'ani pala kalattan; mannE!
5	peruj cORRAnum n'ani pala kalattan; mannE!
	enpoTu taTi paTu vazi ellAm emakku Iyum; mannE!
	ampoTu vEl n'uzai vazi ellAm tAn n'iRkum; mannE!
	n'aran'tam n'ARum tan kaiyAl,
	pulavu n'ARum en talai taivarum; mannE!
10	arun' talai irum pANar akal maNTait tuLai urIi,
	irappOr kaiyuLum pOki,
	purappOr punkaN pAvai cOra,
	am col n'uN tErccip pulavar n'Avil
	cenRu vIzn'tanRu, avan
15	aru n'iRattu iyagkiya vElE!
	Acu Aku en'tai yANTu uLankollO?
	ini, pATun'arum illai; pATun'arkku onRu Ikun'arum illai;
	panit tuRaip pakanRai n'aRaik koL mAmalar
	cUTAtu vaikiyAgku, piRarkku onRu
20	IyAtu vIyum uyir tavap palavE!

269

	kuyil vAy anna kUrmukai atiral
	payilAtu alkiya pal kAz mAlai
	mai irum pittai poliyac cUTTi,
	puttakal koNTa pulik kaN veppar
5	onRu iru muRai irun'tu uNTa pinRai,
	uvalaik kaNNit tuTiyan van'tena,
	pizi makiz valci vENTa, maRRu itu
	koLLAy enpa, kaLLin vAztti;
	karan'tai n'ITiya aRin'tu mARu ceruvil
10	pal An ina n'irai tazIiya villOr,
	koTuj ciRaik kurUup parun'tu Arppa,
	taTin'tu mARu peyarttatu, ik karug kai vALE.

286

	veLLai veL yATTuc ceccai pOlat
	tan Oranna iLaiyar iruppa,
	palar mItu n'ITTiya maNTai en ciRuvanaik
	kAl kazi kaTTilil kiTappi,
5	tU veL aRuvai pOrppittilatE!

290

	ivaRku Ittu uNmati, kaLLE; cinap pOr
	inak kaLiRRu yAnai, iyal tErk kurucil!
	n'un'tai tan'taikku ivan tan'tai tan'tai,
	eTuttu eRi jATpin imaiyAn, taccan
5	aTuttu eRi kuRaTTin, n'inRu mAyn'tananE;
	maRap pukaz n'iRain'ta main'tinOn ivanum,
	uRaippuzi Olai pOla,
	maRaikkuvan peruma! n'iR kuRittu varu vElE.

295

	kaTal kiLarn'tanna kaTTUr n'AppaN,
	ven'tu vAy maTittu vEl talaip peyari,
	tOTu ukaittu ezutarUu, turan'tu eRi jATpin,
	varu paTai pOzn'tu vAyp paTa vilagki,
5	iTaip paTai azuvattuc citain'tu vERAkiya,
	ciRappuTaiyALan mANpu kaNTaruLi,
	vATu mulai URic curan'tana
	OTAp pUTkai viTalai tAykkE.

311

	kaLarp paTu kUval tONTi, n'ALum,
	pulaitti kazIiya tU veL aRuvai.
	tAtu eru maRukin mAcuNa irun'tu,
	palar kuRai ceyta malar tAr aNNaRku
5	oruvarum illai mAtO, ceruvattu;
	ciRappuTaic ceg kaN pukaiya, Or
	tOl koNTu maRaikkum cAlpu uTaiyOnE.

315

	uTaiyan Ayin uNNavum vallan;
	kaTavar mItum irappOrkku Iyum;
	maTavar makiz tuNai; n'eTu mAn ajci
	il iRaic cerIiya jelikOl pOla,
5	tOnRAtu irukkavum vallan; maRRatan
	kAnRu paTu kanai eri pOla,
	tOnRavum vallan tAn tOnRugkAlE.

367

	n'Akattu anna pAku Ar maNTilam
	tamavEAyinum tammoTu cellA;
	vERROr Ayinum n'ORROrkku oziyum;
	ERRa pArppArkku Irg kai n'iRaiyap
5	pUvum ponnum punal paTac corin'tu,
	pAcizai makaLir polag kalattu En'tiya
	n'Ar ari tERal mAn'ti, makiz ciRan'tu,
	iravalarkku arug kalam arukAtu vIci,
	vAztal vENTum, ivaN varain'ta vaikal;
10	vAzac ceyta n'alvinai allatu
	Azug kAlaip puNai piRitu illai;
	onRu purin'tu aTagkiya irupiRappALar
	muttIp puraiyak kANtaka irun'ta
	koRRa veN kuTaik koTit tEr vEn'tir!
15	yAn aRi aLavaiyO ituvE: vAnattu
	vayagkit tOnRum mIninum, immenap
	paran'tu iyagku mA mazai uRaiyinum,
	uyarn'tu mEn' tOnRip polika, n'um n'ALE!

390

	aRavai n'ejcattu Ayar, vaLarum
	maRavai n'ejcattu AyivALar,
	arumpu alar cerun'ti n'eTug kAl malar kamaz,
	.........................................................manna muRRattu,
5	Arvalar kuRukin allatu, kAvalar
	kanavinum kuRukAk kaTiyuTai viyal n'akar,
	malaik kaNattu anna mATam cilampa, en
	arik kural taTAri iriya oRRip
	pATi n'inRa pal n'AL anRiyum,
10	cenRa jAnRaic cenRu paTar iravin
	van'tataR koNTu, 'n'eTug kaTai n'inRa
	pun talaip porun'an aLiyantAn' ena,
	tannuzaik kuRukal vENTi, en arai
	mutu n'Irp pAci anna uTai kaLain'tu,
15	tiru malar anna putu maTik koLIi,
	makiz taral marapin maTTE anRiyum,
	amiztu ana marapin Un tuvai aTicil
	veLLi veN kalattu UTTal anRi,
	mun Urp potiyil cErn'ta men n'aTai
20	irum pEr okkal perum pulampu akaRRa,
	akaTu n'anai vEgkai vI kaNTanna
	pakaTu taru cen'n'el pOroTu n'alki,
	'koNTi peRuka!' enROnE uN tuRai
	malai alar aNiyum talai n'Ir n'ATan;
25	kaNTAR koNTum avan tirun'tu aTi vAztti,
	.............................................................................................................................
	vAn aRiyala en pATu paci pOkkal;
	aNNal yAnai vEn'tar
	uNmaiyO, aRiyal? kANpu aRiyalarE!

392

	mati Er veN kuTai atiyar kOmAn,
	koTum pUN ezini, n'eTug kaTai n'inRu, yAn
	pacalai n'ilavin pani paTu viTiyal,
	poru kaLiRRu aTi vazi anna, en kai
5	oru kaN mAk kiNai oRRupu koTAa,
	'uru kezu mannar Ar eyil kaTan'tu,
	n'iNam paTu kurutip perum pATTu Irattu
	aNagkuTai marapin irug kaLan'tORum,
	veL vAyk kazutaip pul inam pUTTi,
10	veLLai varakum koLLum vittum
	vaikal uzava! vAziya peritu!' enac
	cenRu yAn n'inRanenAka, anRE,
	Ur uN kENip pakaTTu ilaip pAci
	vEr purai citAar n'Ikki, n'Er karai
15	n'uN n'Ul kaligkam uTIi, 'uN' enat
	tEL kaTuppu anna n'ATpaTu tERal
	kOLmIn anna polag kalattu aLaii,
	UN muRai Ittal anRiyum, kOL muRai
	virun'tu iRai n'alkiyOnE an'tarattu
20	arum peRal amiztam anna
	karumpu ivaN tan'tOn perum piRagkaTaiyE.