34

	'An mulai aRutta aRanilOrkkum,
	mAN izai makaLir karuc citaittOrkkum,
	pArppArt tappiya koTumaiyOrkkum,
	vazuvAy marugkil kazuvAyum uLa' ena,
5	'n'ilam puTaipeyarvatu Ayinum, oruvan
	ceyti konROrkku uyti il' ena,
	aRam pATinRE Ayizai kaNava!
	'kAlai an'tiyum, mAlai an'tiyum,
	puRavuk karu anna pun pula varakin
10	pAl pey punkam tEnoTu mayakki,
	kuRu muyal kozuj cUTu kizitta okkaloTu,
	iratti n'ITiya akan talai manRattu,
	karappu il uLLamoTu vENTu mozi payiRRi,
	amalaik kozuj cORu Arn'ta pANarkku
15	akalAc celvam muzuvatum ceytOn,
	em kOn, vaLavan vAzka!' enRu, n'in
	pITu kezu n'On tAL pATEn Ayin,
	paTupu aRiyalanE, pal katirc celvan;
	yAnO tajcam; peruma! iv ulakattu,
20	cAnROr ceyta n'anRu uNTAyin,
	imayattu INTi, in kural payiRRi,
	koNTal mA mazai pozin'ta
	n'uN pal tuLiyinum vAziya, palavE!

35

	n'aLi iru mun'n'Ir ENi Aka,
	vaLi iTai vazagkA vAnam cUTiya
	maN tiNi kiTakkait taN tamizk kizavar,
	muracu muzagku tAnai mUvaruLLum,
5	aracu enappaTuvatu n'inatE, peruma!
	alagkukatirk kanali n'Alvayin tOnRinum,
	ilagkukatir veLLi ten pulam paTarinum,
	am taN kAviri van'tu kavarpu UTTa,
	tOTu koL vElin tORRam pOla,
10	ATu kaN karumpin veN pU n'uTagkum
	n'ATu enappaTuvatu n'inatE attai; Agka
	n'ATu kezu celvattup pITu kezu vEn'tE!
	n'inava kURuval; enava kENmati!
	aRam purin'tanna cegkOl n'ATTattu
15	muRai vENTu pozutil patan eLiyOr INTu
	uRai vENTu pozutil peyal peRROrE;
	jAyiRu cuman'ta kOTu tiraL koNmU
	mAka vicumpin n'aTuvu n'inRAgku,
	kaN pora viLagku n'in viN poru viyankuTai
20	veyil maRaik koNTanRO? anRE; varun'tiya
	kuTi maRaippatuvE; kUrvEl vaLava!
	veLiRRup panan' tuNiyin vIRRuvIRRuk kiTappa,
	kaLiRRuk kaNam poruta kaN akan paRan'talai,
	varupaTai tAgki, peyar puRattu Arttu,
25	porupaTai tarUum koRRamum uzupaTai
	UnRu cAl marugkin InRatan payanE;
	mAri poyppinum, vAri kunRinum,
	iyaRkai allana ceyaRkaiyil tOnRinum,
	kAvalarp pazikkum, ik kaN akal jAlam;
30	atu n'aRku aRin'tanaiAyin, n'Iyum
	n'otumalALar potumozi koLLAtu,
	pakaTu puRan'tarun'ar pAram Ompi,
	kuTi puRan'tarukuvai Ayin, n'in
	aTi puRan'tarukuvar, aTagkAtOrE.

36

	aTun'ai Ayinum, viTun'ai Ayinum,
	n'I aLan'tu aRiti, n'in puraimai vAr kOl,
	ceRi aric cilampin, kuRun' toTi makaLir
	polam cey kazagkin teRRi ATum
5	taN Anporun'ai veN maNal citaiya,
	karug kaik kollan aram cey av vAy
	n'eTug kai n'aviyam pAytalin, n'ilai azin'tu,
	vI kamaz n'eTuj cinai pulampa, kAvutoRum
	kaTi maram taTiyum Ocai tan Ur
10	n'eTu matil varaippin kaTi manai iyampa,
	Agku initu irun'ta vEn'tanoTu, Igku, n'in
	cilait tAr muracam kaRagka,
	malaittanai enpatu n'ANut takavu uTaittE.

37

	n'ajcuTai vAl eyiRRu, ain' talai cuman'ta,
	vEka ven' tiRal, n'Akam pukkena,
	vicumpu tIp piRappat tiruki, pacug koTip
	peru malai viTarakattu urum eRin'tAgku,
5	puL uRu punkaN tIrtta, veL vEl,
	cinam kezu tAnai, cempiyan maruka!
	karAam kalitta kuNTu kaN akazi,
	iTam karug kuTTattu uTan tokku OTi,
	yAmam koLpavar cuTar n'izal katUum
10	kaTu muraN mutalaiya n'eTu n'Ir ilajci,
	cempu uRaz puricai, cemmal mUtUr,
	vampu aNi yAnai vEn'tu akattu uNmaiyin,
	'n'alla' ennAtu, citaittal
	vallaiyAl, n'eTun'takai! ceruvattAnE.

38

	varai puraiyum maza kaLiRRin micai,
	vAn tuTaikkum vakaiya pOla,
	viravu uruvina koTi n'uTagkum
	viyan tAnai viRal vEn'tE!
5	n'I, uTanRu n'OkkumvAy eri tavaza,
	n'I, n'ayan'tu n'OkkumvAy pon pUppa,
	cej jAyiRRu n'ilavu vENTinum,
	veN tigkaLuL veyil vENTinum,
	vENTiyatu viLaikkum ARRalaiAkalin,
10	n'in n'izal piRan'tu, n'in n'izal vaLarn'ta,
	em aLavu evanO maRRE? 'in n'ilaip
	polam pUg kAvin n'al n'ATTOrum
	cey vinai marugkin eytal allatai,
	uTaiyOr Italum illOr irattalum
15	kaTavatu anmaiyin, kaiyaRavu uTaittu' ena,
	ANTuc cey n'ukarcci INTum kUTalin,
	n'in n'ATu uLLuvar, paricilar
	onnAr tEettum, n'innuTaittu enavE.

39

	puRavin allal colliya, kaRai aTi
	yAnai vAl maruppu eRin'ta veN kaTaik
	kOl n'iRai tulAam pukkOn maruka!
	Ital n'in pukazum anRE; cArtal
5	onnAr uTkum tun arug kaTun' tiRal
	tUgku eyil eRin'ta n'in UgkaNOr n'inaippin,
	aTutal n'in pukazum anRE; keTu inRu,
	maRam kezu cOzar uRan'tai avaiyattu,
	aRam n'inRu n'ilaiyiRRu Akalin, atanAl
10	muRaimai n'in pukazum anRE; maRam mikku
	ezu camam kaTan'ta ezu uRaz tiNi tOL,
	kaN Ar kaNNi, kali mAn, vaLava!
	yAgkanam mozikO yAnE Ogkiya
	varai aLan'tu aRiyAp pon paTu n'eTug kOTTu
15	imayam cUTTiya Ema viRpoRi,
	mAN vinai n'eTun' tEr, vAnavan tolaiya,
	vATA vajci vATTum n'in
	pITu kezu n'On tAL pATugkAlE?

40

	n'IyE, piRar OmpuRu maRa man eyil
	OmpAtu kaTan'tu aTTu, avar
	muTi punain'ta pacum pon n'in
	aTi poliyak kazal taiiya
5	vallALanai; vaya vEn'tE!
	yAmE, n'in, ikaz pATuvOr eruttu aTagka,
	pukaz pATuvOr polivu tOnRa,
	inRu kaNTAgkuk kANkuvam enRum
	incol eN patattai Akumati peruma!
10	oru piTi paTiyum cIRiTam
	ezu kaLiRu purakkum n'ATu kizavOyE!

41

	kAlanum kAlam pArkkum; pArAtu,
	vEl INTu tAnai vizumiyOr tolaiya,
	vENTu iTattu aTUum vel pOr vEn'tE!
	ticai iru n'Ankum uRkam uRkavum,
5	peru marattu, ilai il n'eTug kOTu vaRRal paRRavum,
	veg katirk kanali tuRRavum, piRavum,
	ajcuvarat takun'a puLLuk kural iyampavum,
	eyiRu n'ilattu vIzavum, eNNey ATavum,
	kaLiRu mEl koLLavum, kAzakam n'Ippavum,
10	veLLi n'On paTai kaTTiloTu kavizavum,
	kanavin ariyana kANA, n'anavil
	ceruc cey munpa! n'in varu tiRan n'Okki,
	maiyal koNTa Emam il irukkaiyar,
	putalvar pUg kaN mutti, manaiyOTku
15	evvam karakkum paital mAkkaLoTu
	perug kalakkuRRanRAl tAnE kARROTu
	eri n'ikazn'tanna celavin
	ceru miku vaLava! n'in cinaiiyOr n'ATE.

42

	AnA Ikai, aTu pOr, aNNal! n'in
	yAnaiyum malaiyin tOnRum; peruma! n'in
	tAnaiyum kaTal ena muzagkum; kUr n'unai
	vElum minnin viLagkum; ulakattu
5	araicu talai panikkum ARRalaiAtalin,
	purai tIrn'tanRu; atu putuvatO anRE;
	taN punal pUcal allatu, n'on'tu,
	'kaLaika, vAzi, vaLava!' enRu, n'in
	munaitaru pUcal kanavinum aRiyAtu,
10	puli puRagkAkkum kuruLai pOla,
	melivu il cegkOl n'I puRagkAppa,
	peru viRal yANarttu Aki, arin'ar
	kIz maTaik koNTa vALaiyum, uzavar
	paTai miLirn'tiTTa yAmaiyum, aRain'ar
15	karumpil koNTa tEnum, perun' tuRai
	n'Ir taru makaLir kuRRa kuvaLaiyum,
	van pulak kELirkku varu virun'tu ayarum
	men pula vaippin n'al n'ATTup porun'a!
	malaiyin izin'tu, mAk kaTal n'Okki,
20	n'ila varai izitarum pal yARu pOla,
	pulavar ellAm n'in n'OkkinarE;
	n'IyE, marun'tu il kaNicci varun'ta vaTTittuk
	kURRu vekuNTanna munpoTu,
	mARRu iru vEn'tar maN n'OkkinaiyE.

46

	n'IyE, puRavin allal anRiyum, piRavum
	iTukkaN palavum viTuttOn marukanai,
	ivarE, pulan uzutu uNmAr punkaN ajci,
	tamatu pakuttu uNNum taN n'izal vAzn'ar;
5	kaLiRu kaNTu azUum azAal maRan'ta
	pun talaic ciRAar; manRu maruNTu n'Okki,
	virun'tin punkaN n'OvuTaiyar;
	kETTanaiAyin, n'I vETTatu ceymmE!

69

	kaiyatu, kaTan n'iRai yAzE; meyyatu,
	puravalar inmaiyin paciyE; araiyatu,
	vERRu izai n'uzain'ta vEr n'anai citAar
	Ompi uTutta uyaval pANa!
5	pUTkai illOn yAkkai pOlap
	perum pullenRa irum pEr okkalai;
	vaiyakam muzutuTan vaLaii, paiyena
	ennai vinavuti Ayin, mannar
	aTu kaLiRu uyavum koTi koL pAcaRai,
10	kurutip parappin kOTTu mA tolaicci,
	pulAk kaLam ceyta kalAat tAnaiyan
	piRagku n'ilai mATattu uRan'taiyOnE;
	porun'arkku Okkiya vElan, oru n'ilaip
	pakaip pulam paTartalum uriyan; takait tAr
15	oL eri puraiyum uru kezu pacum pUN
	kiLLi vaLavaR paTarkuvai Ayin,
	n'eTug kaTai n'iRRalum ilaiyE; kaTum pakal
	tEr vIcu irukkai Ara n'Okki,
	n'I avaR kaNTa pinRai, pUvin
20	ATu vaNTu imirAt tAmarai
	cUTAyAtal ataninum ilaiyE.

70

	tEem tIm toTaic cIRiyAzp pANa!
	'kayattu vAz yAmai kAz kOttanna
	n'uN kOl takaitta teN kaN mAk kiNai
	iniya kANka; ivaN taNika' enak kURi;
5	vinaval AnA mutu vAy iravala!
	taiit tigkaL taN kayam pOla,
	koLakkoLak kuRaipaTAk kUzuTai viyal n'akar,
	aTutI allatu cuTutI aRiyAtu;
	iru marun'tu viLaikkum n'al n'ATTup porun'an,
10	kiLLi vaLavan n'al icai uLLi,
	n'ARRa n'ATTattu aRu kAl paRavai
	ciRu veL Ampal jAgkar Utum
	kai vaL Ikaip paNNan ciRukuTip
	pAtiri kamazum Oti, oL n'utal,
15	in n'akai viRaliyoTu menmela iyalic
	celvaiAyin, celvai Akuvai;
	viRaku oy mAkkaL pon peRRannatOr
	talaippATu anRu, avan Ikai;
	n'inaikka vENTA; vAzka, avan tALE!

226

	ceRRanRu Ayinum, ceyirttanRu Ayinum,
	uRRanRu Ayinum, uyvu inRu mAtO;
	pATun'ar pOlak kaitozutu Etti,
	iran'tanRAkal vENTum polan' tAr
5	maNTu amar kaTakkum tAnait
	tiN tEr vaLavaR koNTa kURRE.

227

	n'ani pEtaiyE, n'ayan il kURRam!
	viraku inmaiyin vittu aTTu uNTanai;
	innum kANkuvai, n'an vAy Akutal;
	oLiRu vAL maRavarum, kaLiRum, mAvum,
5	kuruti am kurUup punal poru kaLattu oziya,
	n'ALum AnAn kaTan'tu aTTu, enRum n'in
	vATu paci aruttiya vacai tIr ARRal
	n'in Or anna pon iyal perum pUN
	vaLavan ennum vaNTu mUcu kaNNi
10	inaiyOR koNTanaiAyin,
	ini yAr, maRRu n'in paci tIrppOrE?

228

	kalam cey kOvE! kalam cey kOvE!
	iruL tiNin'tanna kurUut tiraL parUup pukai
	akal iru vicumpin UnRum cULai,
	n'anan' talai mUtUrk kalam cey kOvE!
5	aLiyai n'IyE; yAgku Akuvaikol?
	n'ilavarai cUTTiya n'IL n'eTun' tAnaip
	pulavar pukazn'ta poyyA n'al icai,
	viri katir jAyiRu vicumpu ivarn'tanna
	cEN viLagku ciRappin, cempiyar marukan
10	koTi n'uTagku yAnai n'eTumA vaLavan
	tEvar ulakam eytinan Atalin,
	annOR kavikkum kaN akan tAzi
	vanaital vETTanaiAyin, enaiyatUum
	iru n'ilam tikiriyA, peru malai
15	maNNA, vanaital ollumO, n'inakkE?

386

	n'eTu n'Ira n'iRai kayattup
	paTu mArit tuLi pOla,
	n'ey tuLLiya vaRai mukakkavum,
	cUTu kizittu vATuUn micaiyavum,
5	Un koNTa veN maNTai
	An payattAn muRRu azippavum,
	veytu uNTa viyarppu allatu,
	cey tozilAn viyarppu aRiyAmai
	IttOn, en'tai, icai tanatu Aka;
10	vayalE, n'ellin vEli n'ITiya karumpin
	pAttip pan malarp pUt tatumpina;
	puRavE, pul arun'tu pal AyattAn,
	vil irun'ta veg kuRumpinRu;
	kaTalE, kAl tan'ta kalan eNNuvOr
15	kAnal punnaic cinai n'ilaikkun'tu;
	kaziyE, ciRu veL uppin koLLai cARRi,
	perug kal n'al n'ATTu umaN olikkun'tu;
	anna n'al n'ATTup porun'am, yAmE;
	porAap porun'arEm;
20	kuNa ticai n'inRu kuTamutal celinum,
	kuTa ticai n'inRu kuNamutal celinum,
	vaTa ticai n'inRu tenvayin celinum,
	ten ticai n'inRu kuRukAtu n'ITinum,
	yANTum n'iRka, veLLi; yAm
25	vENTiyatu uNarn'tOn tAL vAziyavE!

393

	patimutal pazakAp pazagkaN vAzkkaik
	kuRu n'eTun' tuNaiyoTu kUmai vItalin,
	kuTi muRai pATi, oyyena varun'ti,
	aTal n'acai maRan'ta em kuzici malarkkum
5	kaTan aRiyALar piRa n'ATTu inmaiyin,
	'vaLLanmaiyin em varaivOr yAr?' ena,
	uLLiya uLLamoTu ulai n'acai tuNaiyA,
	.................... kavakam ellAm orupAl paTTena,
	malar tAr aNNal n'in n'al icai uLLi,
10	Irgkai maRan'ta en irum pEr okkal
	kUrn'ta evvam viTa, kozu n'iNam kizippa,
	kOTaip parutti vITu n'iRai peyta
	mUTaip paNTam miTai n'iRain'tanna,
	veN n'iNa mUri aruLa, n'AL uRa
15	InRa aravin n'A uruk kaTukkum en
	tonRu paTu citAar tuvara n'Ikki,
	pOtu viri pakanRaip putu malar anna,
	akanRu maTi kaligkam uTIi, celvamum,
	kETu inRu n'alkumati, peruma! mAcu il
20	mati purai mAk kiNai teLirppa oRRi,
	ATumakaL alkul oppa vATi,
	'kOTai Ayinum, kOTi...............................
	kAviri purakkum n'al n'ATTup porun'a!
	vAy vAL vaLavan! vAzka! enap
25	pITu kezu n'On tAL pATukam palavE.

397

	veLLiyum iru vicumpu Ertarum; puLLum
	uyar cinaik kuTampaik kural tORRinavE;
	poykaiyum pOtu kaN vizittana; paipayac
	cuTarum curugkinRu, oLiyE; pATu ezun'tu
5	iragkural muracamoTu valampuri Arppa,
	iravup puRagkaNTa kAlait tOnRi,
	eHku iruL akaRRum Emap pAcaRai,
	vaikaRai aravam kELiyar! 'pala kOL
	cey tAr mArpa! ezumati tuyil' ena,
10	teN kaN mAk kiNai teLirppa oRRi,
	n'eTug kaTait tOnRiyEnE; atu n'ayan'tu,
	'uLLi van'ta paricilan ivan' ena,
	n'eyyuRap poritta kuyyuTai n'eTuj cUTu,
	maNik kalan n'iRain'ta maNam n'ARu tERal,
15	pAmpu urittanna vAn pUg kaligkamoTu,
	mAri anna vaNmaiyin corin'tu,
	vEnil anna en veppu n'Igka,
	arug kalam n'alkiyOnE; enRum,
	ceRuvil pUtta cEyitazt tAmarai,
20	aRu tozil an'taNar aRam purin'tu eTutta
	tIyoTu viLagkum n'ATan, vAy vAL
	valam paTu tIvin polam pUN vaLavan;
	eRi tiraip perug kaTal iRutikkaN celinum,
	teRu katirk kanali ten ticait tOnRinum,
25	'en?' enRu ajcalam, yAmE; ven vEl
	aruj camam kaTakkum ARRal avan
	tirun'tu kazal n'On tAL taN n'izalEmE.