17

	ten kumari, vaTa perugkal,
	kuNa kuTa kaTalA ellai,
	kunRu, malai, kATu, n'ATu,
	onRu paTTu vazimoziya,
5	koTitu kaTin'tu, kOl tirutti,
	paTuvatu uNTu, pakal ARRi,
	initu uruNTa cuTar n'Emi
	muzutu ANTOr vazi kAvala!
	kulai iRaijciya kOL tAzai
10	akal vayal, malai vEli,
	n'ilavu maNal viyan kAnal,
	teN kazimicait tIp pUvin,
	taN toNTiyOr aTu porun'a!
	mAp payampin poRai pORRAtu,
15	n'ITu kuzi akappaTTa
	pITu uTaiya eRuz munpin,
	kOTu muRRiya kol kaLiRu
	n'ilai kalagkak kuzi konRu,
	kiLai pukalat talaikkUTiyAgku
20	n'I paTTa aru munpin
	perun' taLarcci, palar uvappa,
	piRitu cenRu, malar tAyattup
	palar n'AppaN mIkkURalin,
	'uNTAkiya uyar maNNum,
25	cenRu paTTa vizuk kalanum,
	peRal kUTum, ivan n'ejcu uRap peRin' enavum,
	'En'tu koTi iRaippuricai,
	vIgku ciRai, viyal aruppam,
	izan'tu vaikutum, ini n'Am ivan
30	uTanRu n'Okkinan, peritu' enavum,
	vERRu aracu paNi toTagku n'in
	ARRaloTu pukaz Etti,
	kANku van'ticin, peruma! INTiya
	mazai ena maruLum pal tOl, malai enat
35	tEn iRai koLLum irum pal yAnai,
	uTalun'ar uTka vIgki, kaTal ena
	vAn n'Irkku Ukkum tAnai, AnAtu
	kaTu oTugku eyiRRa aravut talai panippa,
	iTi ena muzagkum muracin,
40	varaiyA Ikaik kuTavar kOvE!

19

	imiz kaTal vaLaiiya INTu akan kiTakkai,
	tamiz talaimayagkiya talaiyAlagkAnattu,
	man uyirp panmaiyum, kURRattu orumaiyum,
	n'innoTu tUkkiya ven vEl ceziya!
5	'irum puli vETTuvan poRi aRin'tu mATTiya
	perug kal aTArum pOnm' ena virumpi,
	muyagkinEn allanO, yAnE mayagkik
	kunRattu iRutta kurIi inam pOla,
	ampu cenRu iRutta arum puN yAnait
10	tUmpuTait taTak kai vAyoTu tumin'tu,
	n'Ajcil oppa, n'ilam micaip puraLa,
	eRin'tu kaLam paTutta En'tu vAL valattar
	en'taiyoTu kiTan'tOr, em pun talaip putalvar;
	'inna viRalum uLakol, n'amakku?' ena,
15	mUtil peNTir kacin'tu aza, n'ANi,
	kURRuk kaNNOTiya veruvaru paRan'talai,
	ezuvar n'al valam kaTan'tOy! n'in
	kazUu viLagku Aram kavaiiya mArpE?

20

	iru mun'n'Irk kuTTamum,
	viyal jAlattu akalamum,
	vaLi vazagku ticaiyum,
	vaRitu n'ilaiiya kAyamum, enRAgku
5	avai aLan'tu aRiyinum, aLattaRku ariyai,
	aRivum, Iramum, perug kaNNOTTamum:
	cORu paTukkum tIyOTu
	cej jAyiRRut teRal allatu
	piRitu teRal aRiyAr, n'in n'izal vAzvOrE;
10	tiruvil allatu kolai vil aRiyAr;
	n'Ajcil allatu paTaiyum aRiyAr;
	tiRan aRi vayavaroTu tevvar tEya, ap
	piRar maN uNNum cemmal! n'in n'ATTu
	vayavuRu makaLir vETTu uNin allatu,
15	pakaivar uNNA aru maNNinaiyE;
	ampu tujcum kaTi araNAl,
	aRam tujcum cegkOlaiyE;
	putup puL varinum, pazam puL pOkinum,
	vituppuRavu aRiyA Emak kAppinai;
20	anaiyai AkalmARE,
	man uyir ellAm n'in ajcummE.

21

	pula varai iRan'ta pukazcAl tOnRal!
	'n'ila varai iRan'ta kuNTu kaN akazi,
	vAn tOyvu anna puricai, vicumpin
	mIn pUttanna uruva jAyil,
5	katir n'uzaikallA maram payil kaTi miLai,
	arug kuRumpu uTutta kAnappEr eyil,
	karug kaik kollan cen' tI mATTiya
	irumpu uN n'Irinum mITTaRku aritu' ena,
	vEgkai mArpan iragka, vaikalum
10	ATu koLak kuzain'ta tumpai, pulavar
	pATutuRai muRRiya, koRRa vEn'tE!
	ikazun'ar icaiyoTu mAya,
	pukazoTu viLagkip pUkka, n'in vElE!

22

	tUgku kaiyAn Ogku n'aTaiya,
	uRaz maNiyAn uyar maruppina,
	piRai n'utalAn ceRal n'Okkina,
	pA aTiyAn paNai eruttina,
5	tEn citain'ta varai pOla,
	mijiRu Arkkum kamaz kaTAttu,
	ayaRu cOrum iruj cenniya,
	main'tu malin'ta maza kaLiRu
	kan'tu cErpu n'ilaii vazagka;
10	pAal n'inRu katir cOrum
	vAn uRaiyum mati pOlum
	mAlai veN kuTai n'IzalAn,
	vAL marugku ilOr kAppu uRagka;
	alagku cen'n'el katir vEyn'ta
15	Ay karumpin koTik kUrai,
	cARu koNTa kaLam pOla,
	vERu vERu polivu tOnRa;
	kuRRu AnA ulakkaiyAn
	kalic cummai viyal AgkaN,
20	polan' tOTTup pain' tumpai
	micai alagku uLaiya panaip pOz cerIi,
	cina mAn'tar veRik kuravai
	Ota n'Irin peyarpu pogka;
	vAy kAvAtu paran'tu paTTa
25	viyan pAcaRaik kAppALa!
	vEn'tu tan'ta paNi tiRaiyAn
	cErn'tavartam kaTumpu Arttum,
	Ogku kolliyOr, aTu porun'a!
	vEza n'Okkin viRal vej cEey!
30	vAziya, peruma! n'in varampu il paTaippE,
	n'iR pATiya vayagku cen' n'Ap
	pin piRar icai n'uvalAmai,
	OmpAtu Iyum ARRal em kO!
	'mAn'tarajcEral irumpoRai Ompiya n'ATE
35	puttEL ulakattu aRRu' enak kETTu van'tu,
	initu kaNTicin; peruma! munivu ilai,
	vERu pulattu iRukkum tAnaiyoTu,
	cORu paTa n'aTatti n'I tujcAymARE!

23

	'veLiRu il n'On kAzp paNai n'ilai munaii,
	kaLiRu paTin'tu uNTena, kalagkiya tuRaiyum;
	kAr n'aRug kaTampin pAcilait teriyal,
	cUr n'avai, murukan cuRRattu anna, n'in
5	kUr n'al ampin koTu vil kULiyar
	koLvatu koNTu, koLLA miccil
	koL patam oziya vIciya pulanum;
	vaTi n'avil n'aviyam pAytalin, UrtoRum
	kaTi maram tuLagkiya kAvum; n'eTu n'akar
10	vinai punai n'al il vev eri n'aippa,
	kanai eri uraRiya marugkum; n'Okki,
	n'aNNAr n'ANa, n'ALtoRum talaic cenRu,
	innum inna pala ceykuvan, yAvarum
	tunnal pOkiya tuNivinOn' ena,
15	jAlam n'eLiya INTiya viyan paTai
	AlagkAnattu amar kaTan'tu aTTa
	kAla munpa! n'in kaNTanen varuval
	aRu maruppu ezil kalai pulippAl paTTena,
	ciRu maRi tazIiya teRin'aTai maTap piNai
20	pULai n'ITiya veruvaru paRan'talai
	vELai veN pUk kaRikkum
	AL il attam Akiya kATE.

25

	mIn tikaz vicumpil pAy iruL akala
	INTu celal marapin tan iyal vazAatu,
	uravuc cinam tirukiya uru kezu jAyiRu,
	n'ilavut tikaz matiyamoTu, n'ilam cErn'tAagku,
5	uTal arun' tuppin onRumozi vEn'tarai
	aNagku arum paRan'talai uNagkap paNNi,
	piNiyuRu muracam koNTa kAlai,
	n'ilai tiripu eRiya, tiN maTai kalagkic
	citaital uyn'tanRO, n'in vEl ceziya!
10	mulai poli Akam uruppa n'URi,
	meym maRan'tu paTTa varaiyAp pUcal
	oL n'utal makaLir kaimmai kUra,
	avir aRal kaTukkum am men
	kuvai irug kUn'tal koytal kaNTE.

26

	n'aLi kaTal irug kuTTattu
	vaLi puTaitta kalam pOla,
	kaLiRu cenRu kaLan akaRRavum,
	kaLan akaRRiya viyal AgkaN
5	oLiRu ilaiya eHku En'ti,
	araicu paTa amar uzakki,
	urai cela muracu vauvi,
	muTit talai aTuppu Aka,
	punal kuruti ulaik koLIi,
10	toTit tOL tuTuppin tuzan'ta valciyin,
	aTukaLam vETTa aTu pOrc ceziya!
	AnRa kELvi, aTagkiya koLkai,
	n'An maRai mutalvar cuRRam Aka,
	mannar Eval ceyya, manniya
15	vELvi muRRiya vAy vAL vEn'tE!
	n'ORROr manRa n'in pakaivar, n'innoTu
	mARRAr ennum peyar peRRu,
	ARRAr Ayinum, ANTu vAzvOrE.

31

	ciRappuTai marapin poruLum inpamum
	aRattu vazippaTUum tORRam pOla,
	iru kuTai pinpaTa Ogkiya oru kuTai,
	uru kezu matiyin, n'ivan'tu, cEN viLagka,
5	n'al icai vETTam vENTi, vel pOrp
	pAcaRai allatu n'I ollAyE;
	n'utimukam mazugka maNTi, onnAr
	kaTi matil pAyum n'in kaLiRu aTagkalavE;
	'pOr' enin, pukalum punai kazal maRavar,
10	'kATu iTaik kiTan'ta n'ATu n'ani cEeya;
	celvEm allEm' ennAr; 'kallen
	vizavuTai AgkaN vERRup pulattu iRuttu,
	kuNa kaTal pinnatu Aka, kuTa kaTal
	veN talaip puNari n'in mAn kuLampu alaippa,
15	vala muRai varutalum uNTu' enRu alaman'tu,
	n'ejcu n'aTugku avalam pAya,
	tujcAk kaNNa, vaTa pulattu aracE.

33

	kAn uRai vAzkkai, kata n'Ay, vETTuvan
	mAn tacai corin'ta vaTTiyum, AymakaL
	tayir koTu van'ta tacumpum, n'iRaiya,
	Erin vAzn'ar pEr il arivaiyar
5	kuLak kIz viLain'ta kaLak koL veNNel
	mukan'tanar koTuppa, ukan'tanar peyarum
	tennam poruppan n'al n'ATTuLLum,
	Ez eyil katavam eRin'tu, kaikkoNTu, n'in
	pEzvAy uzuvai poRikkum ARRalai;
10	pATun'ar vajci pATa, paTaiyOr
	tAtu eru maRukin pAcaRai poliya,
	pularAp paccilai iTai iTupu toTutta
	malarA mAlaip pan'tu kaNTanna
	Un cORRu amalai pAN kaTumpu aruttum
15	cemmaRRu amma, n'in vem munai irukkai
	vallOn taiiya vari vanappu uRRa
	allip pAvai ATu vanappu Eyppa,
	kAma iruvar allatu, yAmattut
	tani makan vazagkAp pani malark kAvin,
20	otukkuin tiNi maNal putup pUm paLLi
	vAyil mATan'toRum mai viTai vIzppa,
	n'I Agkuk koNTa vizavinum palavE.

37

	n'ajcuTai vAl eyiRRu, ain' talai cuman'ta,
	vEka ven' tiRal, n'Akam pukkena,
	vicumpu tIp piRappat tiruki, pacug koTip
	peru malai viTarakattu urum eRin'tAgku,
5	puL uRu punkaN tIrtta, veL vEl,
	cinam kezu tAnai, cempiyan maruka!
	karAam kalitta kuNTu kaN akazi,
	iTam karug kuTTattu uTan tokku OTi,
	yAmam koLpavar cuTar n'izal katUum
10	kaTu muraN mutalaiya n'eTu n'Ir ilajci,
	cempu uRaz puricai, cemmal mUtUr,
	vampu aNi yAnai vEn'tu akattu uNmaiyin,
	'n'alla' ennAtu, citaittal
	vallaiyAl, n'eTun'takai! ceruvattAnE.

42

	AnA Ikai, aTu pOr, aNNal! n'in
	yAnaiyum malaiyin tOnRum; peruma! n'in
	tAnaiyum kaTal ena muzagkum; kUr n'unai
	vElum minnin viLagkum; ulakattu
5	araicu talai panikkum ARRalaiAtalin,
	purai tIrn'tanRu; atu putuvatO anRE;
	taN punal pUcal allatu, n'on'tu,
	'kaLaika, vAzi, vaLava!' enRu, n'in
	munaitaru pUcal kanavinum aRiyAtu,
10	puli puRagkAkkum kuruLai pOla,
	melivu il cegkOl n'I puRagkAppa,
	peru viRal yANarttu Aki, arin'ar
	kIz maTaik koNTa vALaiyum, uzavar
	paTai miLirn'tiTTa yAmaiyum, aRain'ar
15	karumpil koNTa tEnum, perun' tuRai
	n'Ir taru makaLir kuRRa kuvaLaiyum,
	van pulak kELirkku varu virun'tu ayarum
	men pula vaippin n'al n'ATTup porun'a!
	malaiyin izin'tu, mAk kaTal n'Okki,
20	n'ila varai izitarum pal yARu pOla,
	pulavar ellAm n'in n'OkkinarE;
	n'IyE, marun'tu il kaNicci varun'ta vaTTittuk
	kURRu vekuNTanna munpoTu,
	mARRu iru vEn'tar maN n'OkkinaiyE.

43

	n'ilamicai vAzn'ar alamaral tIra,
	teRu katirk kanali vemmai tAgki,
	kAl uNavu Aka, cuTaroTu koTkum
	avircaTai munivarum maruLa, koTun'ciRaik
5	kUr ukirp parun'tin ERu kuRittu, orIi,
	tan akam pukka kuRu n'aTaip puRavin
	taputi ajcic cIrai pukka
	varaiyA Ikai uravOn maruka!
	n'ErArk kaTan'ta muraN miku tiruvin
10	tEr vaN kiLLi tampi! vAr kOl,
	koTumara maRavar peruma! kaTu mAn
	kai vaN tOnRal! aiyam uTaiyEn:
	'Ar punai teriyal n'in munnOr ellAm
	pArppAr n'Ovana ceyyalar; maRRu itu
15	n'IrttO n'inakku?' ena veRuppak kURi,
	n'in yAn pizaittatu n'OvAy enninum,
	n'I pizaittAy pOl n'ani n'ANinaiyE;
	'tammaip pizaittOrp poRukkum cemmal
	ik kuTip piRan'tOrkku eNmai kANum' ena,
20	kANtaku moympa! kATTinai; Akalin,
	yAnE pizaittanen; ciRakka n'in AyuL
	mikku varum in n'Irk kAviri
	ekkar iTTa maNalinum palavE!

44

	irum piTit tozutiyoTu perug kayam paTiyA,
	n'elluTaik kavaLamoTu n'eym miti peRAa,
	tirun'tu arai n'On veLil varun'ta oRRi,
	n'ilamicaip puraLum kaiya, veytu uyirttu,
5	alamaral yAnai urum ena muzagkavum,
	pAl il kuzavi alaRavum, makaLir
	pU il vaRun' talai muTippavum, n'Ir il
	vinai punai n'al il inaikUuk kETpavum,
	innAtu amma, Igku initu iruttal;
10	tun arun' tuppin vaya mAn tOnRal!
	aRavai Ayin,' n'inatu' enat tiRattal;
	maRavai Ayin, pOroTu tiRattal;
	aRavaiyum maRavaiyum allaiyAka,
	tiRavAtu aTaitta tiN n'ilaik katavin
15	n'IL matil oru ciRai oTugkutal
	n'ANuttakavu uTaittu, itu kANugkAlE.

51

	n'Ir mikin, ciRaiyum illai; tI mikin,
	man uyir n'izaRRum n'izalum illai;
	vaLi mikin, valiyum illai; oLi mikku
	avaRRu Or anna cinap pOr vazuti,
5	'taN tamiz potu' enap poRAan, pOr etirn'tu,
	koNTi vENTuvan Ayin, 'koLka' enak
	koTutta mannar n'aTukku aRRanarE;
	aLiyarO aLiyar, avan aLi izan'tOrE
	n'uN pala citalai aritu muyanRu eTutta
10	cem puRRu Iyal pOla,
	oru pakal vAzkkaikku ulamaruvOrE!

52

	aNagkuTai n'eTug kOTTu aLaiyakam munaii,
	muNagku n'imir vayamAn muzu vali oruttal,
	Un n'acai uLLam turappa, irai kuRittu,
	tAn vENTu marugkin vETTu ezun'tAgku,
5	vaTa pula mannar vATa, aTal kuRittu,
	innA vem pOr iyal tEr vazuti!
	itu n'I kaNNiyatu Ayin, iru n'ilattu
	yArkol aLiyartAmE? UrtoRum
	mIn cuTu pukaiyin pulavu n'ARu n'eTug koTi
10	vayaluzai marutin vAgkucinai valakkum
	peru n'al yANarin orIi, iniyE
	kali kezu kaTavuL kan'tam kaiviTap
	pali kaN mARiya pAzpaTu potiyil,
	n'arai mUtALar n'Ay iTak kuzin'ta
15	vallin n'al akam n'iRaiya, pal poRik
	kAna vAraNam Inum
	kATu Aki viLiyum n'ATu uTaiyOrE!

53

	mutir vAr ippi mutta vAr maNal,
	katir viTu maNiyin kaN poru mATattu,
	ilagku vaLai makaLir teRRi ATum
	viLagku cIr viLagkil vizumam konRa
5	kaLam koL yAnai, kaTu mAn, poRaiya!
	virippin akalum; tokuppin ejcum;
	mammar n'ejcattu emmanOrkku orutalai
	kaimmuRRala, n'in pukazE, enRum;
	oLiyOr piRan'ta im malar talai ulakattu
10	vAzEm enRalum aritE 'tAzAtu
	ceRutta ceyyuL cey cen' n'Avin,
	veRutta kELvi, viLagku pukazk kapilan
	inRu uLan Ayin, n'anRuman' enRa n'in
	ATu koL varicaikku oppa,
15	pATuval mannAl, pakaivaraik kaTappE.

54

	em kOn irun'ta kampalai mUtUr,
	uTaiyOr pOla iTaiyinRu kuRuki,
	cemmal n'AL avai aNNAn'tu pukutal
	em ana vAzkkai iravalarkku eLitE;
5	iravalarkku eNmai allatu puravu etirn'tu,
	vAnam n'ANa, varaiyAtu, cenROrkku
	AnAtu Iyum kavi kai vaNmaik
	kaTu mAn kOtai tuppu etirn'tu ezun'ta
	n'eTumozi mannar n'inaikkum kAlai,
10	pAcilait toTutta, uvalaik kaNNi,
	mAcu uN uTukkai, maTi vAy, iTaiyan
	ciRu talai AyamoTu kuRukalcellAp
	puli tujcu viyan pulattaRRE
	vali tujcu taTak kai avanuTai n'ATE.

61

	koNTaik kUzait taN tazaik kaTaiciyar
	ciRu mAN n'eytal AmpaloTu kaTkum,
	malagku miLir, ceRuvin taLampu taTin'tu iTTa
	pazana vALaip parUuk kaN tuNiyal
5	putu n'el veN cORRuk kaNNuRai Aka,
	vilAp puTai marugku vicippa mAn'ti,
	n'ITu katirk kazanic cUTu taTumARum
	van kai vinaijar pun talaic ciRAar
	tegku paTu viyan pazam munaiyin, tan'taiyar
10	kuRaikkaN n'eTum pOr ERi, vicaittu ezun'tu
	cezug kOL peNNaip pazam toTa muyalum,
	vaikal yANar, n'al n'ATTup porun'an,
	eHku viLagku taTak kai iyal tErc cenni,
	cilait tAr akalam malaikkun'ar uLar enin,
15	tAm aRikuvar tamakku uRuti; yAm avan
	ezu uRaz tiNi tOL vazu inRu malain'tOr
	vAzak kaNTanRum ilamE; tAzAtu,
	tirun'tu aTi porun'ta vallOr
	varun'tak kANTal, ataninum ilamE.

66

	n'aLi iru mun'n'Ir n'AvAy OTTi,
	vaLi tozil ANTa uravOn maruka!
	kaLi iyal yAnaik karikAlvaLava!
	cenRu, amark kaTan'ta n'in ARRal tOnRa
5	venROy! n'inninum n'allan anRE
	kali koL yANar veNNip paRan'talai,
	mikap pukaz ulakam eyti,
	puRap puN n'ANi, vaTakkirun'tOnE?

76

	oruvanai oruvan aTutalum, tolaitalum,
	putuvatu anRu; iv ulakattu iyaRkai;
	inRin UgkO kELalam tiraL arai
	manRa vEmpin mAc cinai oN taLir
5	n'eTug koTi uzijaip pavaroTu miTain'tu,
	ceRiyat toTutta tEm pAy kaNNi,
	oliyal mAlaiyoTu, poliyac cUTi,
	pATu in teN kiNai kaRagka, kANtaka,
	n'ATu kezu tiruvin, pacum pUN, ceziyan
10	pITum cemmalum aRiyAr kUTi,
	'porutum' enRu tantalai van'ta
	punai kazal ezuvar n'al valam aTagka,
	oru tAn Akip porutu, kaLattu aTalE.

77

	kiNkiNi kaLain'ta kAl oN kazal toTTu,
	kuTumi kaLain'ta n'utal vEmpin oN taLir
	n'eTug koTi uzijaip pavaroTu milain'tu,
	kuRun' toTi kazitta kaic cApam paRRi,
5	n'eTun' tErk koTujci poliya n'inROn
	yArkol? vAzka, avan kaNNi! tAr pUNTu,
	tAli kaLain'tanRum ilanE; pAl viTTu
	ayiniyum inRu ayinRananE; vayinvayin
	uTanRu mEl van'ta vampa maLLarai
10	viyan'tanRum, izin'tanRum, ilanE; avarai
	azun'tap paRRi, akal vicumpu Arppu eza,
	kavizn'tu n'ilam cEra aTTatai
	makizn'tanRum, malin'tanRum, ataninum ilanE.

78

	vaNagku toTaip polin'ta vali kezu n'On tAL,
	aNagku arug kaTun' tiRal ennai muNagku n'imirn'tu,
	aLaic ceRi uzuvai iraikku van'tanna
	malaippu arum akalam matiyAr, cilaittu ezun'tu,
5	'vizumiyam, periyam, yAmE; n'ammin
	porun'anum iLaiyan; koNTiyum peritu' ena,
	eLLi van'ta vampa maLLar
	pullen kaNNar; puRattil peyara,
	INTu avar aTutalum ollAn, ANTu avar
10	mAN izai makaLir n'ANinar kaziya,
	tan'tai tam Ur AgkaN,
	teN kiNai kaRagkac cenRu, ANTu aTTananE.

79

	mUtUr vAyil panik kayam maNNi,
	manRa vEmpin oN kuzai malain'tu,
	teN kiNai munnark kaLiRRin iyali,
	vem pOrc ceziyanum van'tanan; etirn'ta
5	vampa maLLarO palarE;
	ejcuvar kollO, pakal tavac ciRitE?

81

	Arppu ezu kaTalinum peritu; avan kaLiRE
	kArp peyal urumin muzagkal AnAvE;
	yArkol aLiyartAmE Ar n'Arc
	ceRiyat toTutta kaNNik
5	kavi kai maLLan kaippaTTOrE?

82

	cARu talaikkoNTena, peN IRRu uRRena,
	paTTa mAri jAnRa jAyiRRu,
	kaTTil n'iNakkum izicinan kaiyatu
	pOz tUNTu Uciyin virain'tanRu mAtO
5	Ur koLa van'ta porun'anoTu,
	Ar punai teriyal n'eTun'takai pOrE!

93

	tiN piNi muracam izumena muzagkac
	cenRu, amar kaTattal yAvatu? van'tOr
	tAr tAgkutalum ARRAr, veTipaTTu,
	OTal marIiya pITu il mannar
5	n'OyppAl viLin'ta yAkkai tazIi,
	kAtal maRan'tu, avar tItu marugku aRumAr,
	aRam puri koLkai n'AnmaRai mutalvar
	tiRam puri pacum pul parappinar kiTappi,
	'maRam kan'tAka n'al amar vIzn'ta
10	n'IL kazal maRavar celvuzic celka!' ena
	vAL pOzn'tu aTakkalum uyn'tanar mAtO
	vari jimiRu Arkkum vAy puku kaTAattu
	aNNal yAnai aTu kaLattu oziya,
	aruj camam tataiya n'URi, n'I,
15	perun' takai! vizup puN paTTa mARE.

94

	Urk kuRumAkkaL veN kOTu kazAalin,
	n'Irt tuRai paTiyum perug kaLiRu pOla
	iniyai, peruma! emakkE; maRRu atan
	tun arug kaTAam pOla
5	innAy, peruma! n'in onnAtOrkkE.

98

	munait tevvar muraN aviyap
	porak kuRukiya n'uti maruppin n'in
	inak kaLiRu celak kaNTavar
	matil katavam ezuc cellavum,
5	piNan azugkak kaLan uzakkic
	celavu acaiiya maRuk kuLampin n'in
	ina n'al mAc celak kaNTavar
	kavai muLLin puzai aTaippavum,
	mArpuRac cErn'tu olkAt
10	tOl ceRippu il n'in vEl kaNTavar
	tOl kaziyoTu piTi ceRippavum,
	vAL vAytta vaTup paran'ta n'in
	maRa main'tar main'tu kaNTavar
	puN paTu kuruti ampu oTukkavum,
15	n'IyE, aiyavi pukaippavum tAgkAtu, oyyena,
	uRumuRai marapin puRam n'inRu uykkum
	kURRattu anaiyai; Akalin, pORRAr
	iragka viLivatukollO varampu aNain'tu
	iRagkukatir alamvaru kazani,
20	perum punal paTappai, avar akan talai n'ATE!

99

	amararp pENiyum, Avuti aruttiyum,
	arum peRal marapin karumpu ivaN tan'tum,
	n'Ir aka irukkai Azi cUTTiya
	tol n'ilai marapin n'in munnOr pOla,
5	Ikai am kazal kAl, irum panam puTaiyal,
	pU Ar kAvin, puniRRup pulAl n'eTu vEl,
	ezu poRi n'ATTattu ezAat tAyam
	vazu inRu eytiyum amaiyAy, ceru vETTu,
	imiz kural muracin ezuvaroTu muraNic
10	cenRu, amar kaTan'tu, n'in ARRal tORRiya
	anRum, pATun'arkku ariyai; inRum
	paraNan pATinan maRkol maRRu n'I
	muraN miku kOvalUr n'URi, n'in
	araN aTu tikiri En'tiya tOLE!

100

	kaiyatu vElE; kAlana punai kazal;
	meyyatu viyarE; miTaRRatu pacum puN;
	vaTkar pOkiya vaLar iLam pOn'tai
	uccik koNTa Uci veN tOTTu,
5	veTci mA malar, vEgkaiyoTu viraii,
	curi irum pittai poliyac cUTi,
	varivayam poruta vayak kaLiRu pOla,
	innum mARAtu cinanE; annO!
	uyn'tanar allar, ivan uTaRRiyOrE;
10	ceRuvar n'Okkiya kaN, tan
	ciRuvanai n'Okkiyum, civappu AnAvE.

104

	pORRumin, maRavIr! cARRutum, n'ummai:
	Urk kuRumAkkaL ATak kalagkum
	tAL paTu cil n'Irk kaLiRu aTTu vIzkkum
	IrppuTaik karAattu anna ennai
5	n'uN pal karumam n'inaiyAtu,
	'iLaiyan' enRu ikazin, peRal aritu, ATE.

125

	paruttip peNTin panuval anna,
	n'eruppuc cinam taNin'ta n'iNam tayagku kozug kuRai,
	parUuk kaL maNTaiyoTu, Uz mARu peyara
	uNkum, en'tai! n'iR kANku van'ticinE,
5	n'aLLAtAr miTal cAytta
	vallALa! n'in makiz irukkaiyE.
	uzuta n'On pakaTu azi tinRAgku
	n'al amiztu Aka, n'I n'ayan'tu uNNum n'aRavE;
	kunRattu anna kaLiRu peyara,
10	kaTan'tu aTTu venROnum, n'iR kURummE;
	'velIiyOn ivan' ena,
	'kazal aNip polin'ta cEvaTi n'ilam kavarpu
	virain'tu van'tu, camam tAgkiya,
	val vEl malaiyan allan Ayin,
15	n'al amar kaTattal eLituman, n'amakku' enat
	tORROntAnum, n'iR kURummE,
	'tolaiiyOn ivan' ena,
	oru n'I Ayinai peruma! peru mazaikku
	irukkai cAnRa uyar malait
20	tirut taku cEey! n'iR peRRicinOrkkE.

167

	n'IyE, amar kANin amar kaTan'tu, avar
	paTai vilakki etir n'iRRalin,
	vAaL vAytta vaTu Az yAkkaiyoTu,
	kELvikku iniyai; kaTku innAyE:
5	avarE, n'iR kANin puRam koTuttalin,
	URu aRiyA mey yAkkaiyoTu,
	kaNNukku iniyar; cevikku innArE:
	atanAl, n'Iyum onRu iniyai; avarum onRu iniyar;
	ovvA yA uLa, maRRE? vel pOrk
10	kazal punai tirun'tu aTik kaTu mAn kiLLi!
	n'innai viyakkum iv ulakam; aHtu
	ennO? peruma! uraitticin emakkE.

168

	aruvi Arkkum kazai payil n'anan' talaik
	kaRi vaLar aTukkattu malarn'ta kAn'taL
	kozug kizagku miLirak kiNTi, kiLaiyoTu,
	kaTug kaN kEzal uzuta pUzi,
5	n'al n'AL varu patam n'Okki, kuRavar
	uzAatu vittiya parUuk kural ciRu tinai
	mun'tu viLai yANar n'AL putitu uNmAr
	marai An kaRan'ta n'urai koL tIm pAl,
	mAn taTi puzukkiya pulavu n'ARu kuzici
10	vAn kEz irum puTai kazAatu, ERRi,
	cAn'ta viRakin uvitta punkam
	kUtaLam kaviniya kuLavi munRil,
	cezug kOL vAzai akal ilaip pakukkum
	UrAk kutiraik kizava! kUrvEl,
15	n'aRai n'Art toTutta vEgkai am kaNNi,
	vaTi n'avil ampin villOr peruma!
	kai vaL Ikaik kaTu mAn koRRa!
	vaiyaka varaippil tamizakam kETpa,
	poyyAc cen' n'A n'eLiya Ettip
20	pATupa enpa paricilar, n'ALum
	IyA mannar n'ANa,
	vIyAtu paran'ta n'in vacai il vAn pukazE.

174

	aNagkuTai avuNar kaNam koNTu oLittena,
	cEN viLagku ciRappin jAyiRu kANAtu,
	iruL kaN keTutta paruti jAlattu
	iTumpai koL paruvaral tIra, kaTun' tiRal
5	ajcana uruvan tan'tu n'iRuttAgku,
	aracu izan'tirun'ta allal kAlai,
	muracu ezun'tu iragkum muRRamoTu, karai porutu
	iragku punal n'eritaru miku perug kAviri
	mallal n'al n'ATTu allal tIra,
10	poyyA n'Avin kapilan pATiya,
	mai aNi n'eTu varai AgkaN, oyyenac
	cerup pukal maRavar celpuRam kaNTa
	eL aRu ciRappin muLLUr mImicai,
	aru vazi irun'ta peru viRal vaLavan
15	mati maruL veNkuTai kATTi, ak kuTai
	putumaiyin n'iRutta pukaz mEmpaTun'a!
	viTarp puli poRitta kOTTai, cuTarp pUN,
	curumpu Ar kaNNi, perum peyar n'um mun
	INTuc cey n'al vinai ANTuc cenRu uNIiyar,
20	uyarn'tOr ulakattup peyarn'tanan Akalin,
	ARu kol marugkin mAtiram tuzavum
	kavalai n'ejcattu avalam tIra,
	n'I tOnRinaiyE n'irait tAr aNNal!
	kal kaN poTiya, kAnam vempa,
25	malku n'Ir varaippin kayam pala uNagka,
	kOTai n'ITiya paitu aRu kAlai,
	iru n'ilam n'eLiya INTi,
	urum uraRu karuviya mazai pozin'tAgkE.