126

	onnAr yAnai OTaip pon koNTu,
	pANar cenni poliyat taii,
	vATAt tAmarai cUTTiya vizuc cIr
	OTAp pUTkai uravOn maruka!
5	vallEm allEm Ayinum, vallE
	n'invayin kiLakkuvamAyin, kagkul
	tuyil maTin'tanna tUgku iruL iRumpin,
	paRai icai aruvi, muLLUrp porun'a!
	teRal aru marapin n'in kiLaiyoTum poliya,
10	n'ilamicaip paran'ta makkaTku ellAm
	pulan azukku aRRa an'taNALan,
	iran'tu cel mAkkaTku ini iTan inRi,
	paran'tu icai n'iRkap pATinan; ataRkoNTu
	cinam miku tAnai vAnavan kuTa kaTal,
15	polam taru n'AvAy OTTiya av vazi,
	piRa kalam celkalAtu anaiyEm attai,
	inmai turappa, icai tara van'tu, n'in
	vaNmaiyin toTuttanam, yAmE muL eyiRRu
	aravu eRi urumin muracu ezun'tu iyampa,
20	aNNal yAnaiyoTu vEn'tu kaLattu oziya,
	aruj camam tataiyat tAkki, n'anRum
	n'aNNAt tevvart tAgkum
	peNNai am paTappai n'ATu kizavOyE!

135

	koTuvari vazagkum kOTu uyar n'eTu varai,
	aru viTarc ciRu n'eRi ERalin, varun'ti,
	taTavaral koNTa takai mel otukkin,
	vaLaik kai viRali en pinnaL Aka,
5	pon vArn'tanna puri aTagku n'arampin
	vari n'avil panuval pulam peyarn'tu icaippa,
	paTumalai n'inRa payam kezu cIRiyAz
	olkal uLLamoTu oru puTait tazIi,
	pukazcAl ciRappin n'in n'al icai uLLi,
10	van'tanen en'tai! yAnE: enRum,
	manRu paTu paricilark kANin, kanRoTu
	kaRai aTi yAnai iriyal pOkkum
	malai kezu n'ATan! mA vEL Aay!
	kaLiRum anRE; mAvum anRE;
15	oLiRu paTaip puraviya tErum anRE;
	pANar, pATun'ar, paricilar, Agku avar,
	tamatu enat toTukkuvarAyin, 'ematu' enap
	paRRal tERRAp payag kezu tAyamoTu,
	anna Aka, n'in Uzi; n'innaik
20	kANTal vENTiya aLavai vENTAr
	uRu muraN kaTan'ta ARRal
	potu mIkkURRattu n'ATu kizavOyE!

137

	iragku muracin, inamcAl yAnai,
	mun'n'Ir ENi viRal kezu mUvarai
	innum Or yAn avA aRiyEnE;
	n'IyE, mun yAn aRiyumOnE tuvanRiya
5	kayattu iTTa vittu vaRattin cAvAtu,
	kazaik karumpin olikkun'tu,
	koNTal koNTa n'Ir kOTai kAyinum,
	kaN anna malar pUkkun'tu,
	karug kAl vEgkai malarin, n'ALum
10	pon anna vI cuman'tu,
	maNi anna n'Ir kaTal paTarum;
	cev varaip paTappai n'Ajcil porun'a!
	ciRu veL aruvip perug kal n'ATanai!
	n'I vAziyar! n'in tan'tai
15	tAy vAziyar, n'iR payan'ticinOrE!

148

	kaRagku micai aruviya piRagku malai n'aLLi! n'in
	acaivu il n'On tAL n'acai vaLan Etti,
	n'ALtoRum n'an kalam kaLiRRoTu koNarn'tu,
	kUTu viLagku viyal n'akar, paricil muRRu aLippa;
5	pITu il mannarp pukazcci vENTi,
	ceyyA kURik kiLattal
	eyyAtAkinRu, em ciRu cen' n'AvE.

154

	tirai poru mun'n'Irk karai n'aNic celinum,
	aRiyun'ark kANin, vETkai n'Ikkum
	cil n'Ir vinavuvar, mAn'tar; atu pOl,
	aracar uzaiyarAkavum, purai tapu
5	vaLLiyOrp paTarkuvar, pulavar: atanAl,
	yAnum, 'peRRatu Utiyam; pERu yAtu?' ennEn;
	uRRanen Atalin uLLi van'tananE;
	'I' ena irattalO aritE; n'I atu
	n'alkinum, n'alkAy Ayinum, vel pOr
10	eRi paTaikku OTA ANmai, aRuvait
	tU viri kaTuppat tuvanRi mImicait
	taN pala izitarum aruvi n'in
	koN perug kAnam, pATal enakku eLitE.

161

	n'INTu oli azuvam kuRaipaTa mukan'tukoNTu,
	INTu celal koNmU vENTuvayin kuzIi,
	peru malai anna tOnRala, cUl mutirpu,
	urum uraRu karuviyoTu, peyal kaTan iRuttu,
5	vaLa mazai mARiya enRUzk kAlai,
	manpatai ellAm cenRu uNa, kagkaik
	karai poru mali n'Ir n'iRain'tu tOnRiyAgku,
	emakkum piRarkkum cemmalaiAkalin,
	'anpu il ATavar konRu, ARu kavara,
10	cenRu talaivarun'a alla, anpu inRu,
	van kalai teviTTum, aruj curam iRan'tOrkku,
	iRRai n'ALoTum yANTu talaippeyara' enak
	kaN poRi pOkiya kacivoTu uran azin'tu,
	arun' tuyar uzakkum en perun' tunpuRuvi n'in
15	tAL paTu celvam kANtoRum maruLa,
	panai maruL taTak kaiyoTu muttup paTa muRRiya
	uyar maruppu En'tiya varai maruL n'On pakaTu,
	oLi tikaz OTai poliya, marugkil
	paTu maNi iraTTa, ERic cemmAn'tu,
20	celal n'acaii uRRanen viRal miku kurucil!
	inmai turappa, icaitara van'tu, n'in
	vaNmaiyin toTutta en n'ayan'tanai kENmati!
	vallinum, vallEn Ayinum, vallE,
	en aLan'tu aRin'tanai n'OkkAtu, ciRan'ta
25	n'in aLan'tu aRimati, peruma! enRum
	vEn'tar n'ANap peyarvEn; cAn'tu arun'tip
	pal poRik koNTa En'tu ezil akalam
	mAN izai makaLir pullutoRum pukala,
	n'AL muracu iragkum iTanuTai varaippil n'in
30	tAL n'izal vAzn'ar n'an kalam mikuppa,
	vAL amar uzan'ta n'in tAnaiyum,
	cIr miku celvamum, Ettukam palavE.

168

	aruvi Arkkum kazai payil n'anan' talaik
	kaRi vaLar aTukkattu malarn'ta kAn'taL
	kozug kizagku miLirak kiNTi, kiLaiyoTu,
	kaTug kaN kEzal uzuta pUzi,
5	n'al n'AL varu patam n'Okki, kuRavar
	uzAatu vittiya parUuk kural ciRu tinai
	mun'tu viLai yANar n'AL putitu uNmAr
	marai An kaRan'ta n'urai koL tIm pAl,
	mAn taTi puzukkiya pulavu n'ARu kuzici
10	vAn kEz irum puTai kazAatu, ERRi,
	cAn'ta viRakin uvitta punkam
	kUtaLam kaviniya kuLavi munRil,
	cezug kOL vAzai akal ilaip pakukkum
	UrAk kutiraik kizava! kUrvEl,
15	n'aRai n'Art toTutta vEgkai am kaNNi,
	vaTi n'avil ampin villOr peruma!
	kai vaL Ikaik kaTu mAn koRRa!
	vaiyaka varaippil tamizakam kETpa,
	poyyAc cen' n'A n'eLiya Ettip
20	pATupa enpa paricilar, n'ALum
	IyA mannar n'ANa,
	vIyAtu paran'ta n'in vacai il vAn pukazE.

200

	pani varai n'ivan'ta pAcilaip palavin
	kani kavarn'tu uNTa karu viral kaTuvan
	cem muka man'tiyoTu ciRan'tu, cEN viLagki,
	mazai micai aRiyA mAl varai aTukkattu,
5	kazai micait tujcum kallaka veRpa!
	n'iNam tinRu cerukkiya n'erupput talai n'eTu vEl,
	kaLam koNTu kanalum kaTugkaN yAnai,
	viLagku maNik koTum pUN, viccikkOvE!
	ivarE, pUt talai aRAap punai koTi mullai
10	n'At tazumpu iruppap pATAtuAyinum,
	'kaRagku maNi n'eTun' tEr koLka!' enak koTutta
	paran'tu Ogku ciRappin pAri makaLir;
	yAnE, paricilan, mannum an'taNan; n'IyE,
	varicaiyil vaNakkum vAL mEmpaTun'an;
15	n'inakku yAn koTuppak koNmati cinap pOr
	aTagkA mannarai aTakkum
	maTagkA viLaiyuL n'ATu kizavOyE!

201

	'ivar yAr?' enkuvaiAyin, ivarE,
	UruTan iravalarkku aruLi, tEruTan
	mullaikku Itta cellA n'al icai,
	paTu maNi yAnai, paRampin kOmAn
5	n'eTu mAp pAri makaLir; yAnE
	tan'tai tOzan; ivar en makaLir;
	an'taNan, pulavan, koNTu van'tananE.
	n'IyE, vaTapAl munivan taTavinuL tOnRi,
	cempu punain'tu iyaRRiya cEN n'eTum puricai,
10	uvarA Ikai, tuvarai ANTu,
	n'ARpattonpatu vazimuRai van'ta
	vELiruL vELE! viRal pOr aNNal!
	tAr aNi yAnaic cETTu irug kOvE!
	AN kaTan uTaimaiyin, pAN kaTan ARRiya
15	oliyaR kaNNip pulikaTi mAal!
	yAn tara, ivaraik koNmati! vAn kavittu
	irug kaTal uTutta iv vaiyakattu, arun' tiRal
	pon paTu mAl varaik kizava! ven vEl
	uTalun'ar uTkum tAnai,
20	keTal arugkuraiya n'ATu kizavOyE!

202

	veTcik kAnattu vETTuvar ATTa,
	kaTci kANAk kaTamA n'al ERu
	kaTaRu maNi kiLara, citaRu pon miLira,
	kaTiya katazum n'eTu varaip paTappai
5	venRi n'ilaiiya vizup pukaz onRi,
	iru pAl peyariya uru kezu mUtUr,
	kOTi pala aTukkiya poruL n'umakku utaviya
	n'ITu n'ilai araiyattuk kETum kEL, ini:
	n'un'tai tAyam n'iRaivuRa eytiya
10	oliyal kaNNip pulikaTi mAal!
	n'um pOl aRivin n'umaruL oruvan
	pukazn'ta ceyyuL kazAattalaiyai
	ikazn'tatan payanE; iyal tEr aNNal!
	evvi tol kuTip paTIiyar, maRRu, 'ivar
15	kai vaN pAri makaLir' enRa en
	tERRAp puncol n'ORRicin; peruma!
	viTuttanen; velIiyar, n'in vElE! aTukkattu,
	arumpu aRa malarn'ta karug kAl vEgkai
	mAt takaTTu oL vI tAya tuRukal
20	irum puli varip puRam kaTukkum
	perug kal vaippin n'ATu kizavOyE!

203

	'kazin'tatu pozin'tu' ena vAn kaNmARinum,
	'tollatu viLain'tu' ena n'ilam vaLam karappinum,
	ellA uyirkkum illAl, vAzkkai;
	'innum tam' ena emmanOr irappin,
5	'munnum koNTir' ena, n'ummanOr maRuttal
	innAtu amma; iyal tEr aNNal!
	illatu n'irappal ARRAtOrinum,
	uLLi varun'ar n'acai izappOrE;
	anaiyaiyum allai, n'IyE; onnAr
10	Ar eyil avarkaTTAkavum, 'n'umatu' enap
	pAN kaTan iRukkum vaLLiyOy!
	pUN kaTan, en'tai! n'I iravalarp puravE.

204

	'I' ena irattal izin'tanRu; atan etir,
	'IyEn' enRal ataninum izin'tanRu;
	'koL' enak koTuttal uyarn'tanRu; atan etir,
	'koLLEn' enRal ataninum uyarn'tanRu;
5	teN n'Irp parappin imiz tiraip perug kaTal
	uNNAr Akupa, n'Ir vETTOrE;
	Avum mAvum cenRu uNa, kalagki,
	cERRoTu paTTa ciRumaittuAyinum,
	uNn'Ir marugkin atar pala Akum;
10	puLLum pozutum pazittal allatai,
	uLLic cenROrp paziyalar; atanAl
	pulavEn vAziyar, Ori! vicumpil
	karuvi vAnam pOla
	varaiyAtu curakkum vaLLiyOy! n'innE.

205

	muRRiya tiruvin mUvar Ayinum,
	peTpinRu Ital yAm vENTalamE;
	viRal cinam taNin'ta virai parip puravi
	uRuvar cel cArvu Aki, ceRuvar
5	tAL uLam taputta vAL miku tAnai,
	veL vI vElik kOTaip porun'a!
	ciRiyavum periyavum puzai keTa vilagkiya
	mAn kaNam tolaicciya kaTu vicaik kata n'Ay,
	n'On cilai, vETTuva! n'Oy ilaiyAkuka!
10	Ar kali yANart tarIiya, kAl vIzttu,
	kaTalvayin kuzIiya aNNal am koNmU
	n'Ir inRu peyarAvAgku, tEroTu
	oLiRu maruppu En'tiya cemmal
	kaLiRu inRu peyarala, paricilar kaTumpE.

206

	vAyilOyE! vAyilOyE!
	vaLLiyOr cevimutal vayagkumozi vitti, tAm
	uLLiyatu muTikkum uranuTai uLLattu
	varicaikku varun'tum ip paricil vAzkkaip
5	paricilarkku aTaiyA vAyilOyE!
	kaTumAn tOnRal n'eTumAn ajci
	tan aRiyalankol? en aRiyalankol?
	aRivum pukazum uTaiyOr mAyn'tena,
	vaRun' talai ulakamum anRE; atanAl,
10	kAvinem kalanE; curukkinem kalappai;
	maram kol taccan kai val ciRAar
	mazuvuTaik kATTakattu aRRE
	et ticaic celinum, at ticaic cORE.

207

	ezu ini, n'ejcam! celkam; yArO,
	paruku anna vETkai ilvazi,
	arukil kaNTum aRiyAr pOla,
	akam n'aka vArA mukan azi paricil
5	tAL ilALar vELAr allar?
	'varuka' ena vENTum varicaiyOrkkE
	peritE ulakam; pENun'ar palarE;
	mILi munpin ALi pOla,
	uLLam uL avin'tu aTagkAtu, veLLena
10	n'OvAtOnvayin tiragki,
	vAyA van kanikku ulamaruvOrE.

208

	'kunRum malaiyum pala pin oziya,
	van'tanen, paricil koNTanen celaRku' ena
	n'inRa en n'ayan'tu aruLi, 'Itu koNTu,
	Igkanam celka, tAn' ena, ennai
5	yAgku aRin'tananO, tAgku arug kAvalan?
	kANAtu Itta ip poruTku yAn Or
	vANikap paricilan allen; pENi,
	tinai anaittuAyinum, initu avar
	tuNai aLavu aRin'tu, n'alkinar viTinE.

379

	yAnE peRuka, avan tAL n'izal vAzkkai;
	avanE peRuka, en n'A icai n'uvaRal;
	n'el ari tozuvar kUr vAL mazugkin,
	pinnai maRattOTu ariya, kal cettu,
5	aLLal yAmaik kUn puRattu urijcum
	n'el amal puravin ilagkai kizavOn
	villiyAtan kiNaiyEm; peruma!
	'kuRun' tAL ERRaik kozug kaN av viLar
	n'aRu n'ey urukki, n'AT cORu IyA,
10	vallan, en'tai, paci tIrttal' ena,
	kon varal vAzkkai n'in kiNaivan kURa,
	kETTataRkoNTum vETkai taNTAtu,
	viN tOy talaiya kunRam pinpaTa,
	......................................ra van'tanen, yAnE
15	tAy il tUvAk kuzavi pOla, Agku at
	tiruvuTait tiru manai, aitu tOnRu kamaz pukai
	varu mazai magkulin maRukuTan maRaikkum
	kuRumpu aTu kuNTu akaz n'IL matil UrE.