24

	n'el ariyum irun' tozuvar
	cej jAyiRRu veyil munaiyin,
	teN kaTal tirai micaip pAyun'tu;
	tiN timil van paratavar
5	veppu uTaiya maTTu uNTu,
	taN kuravaic cIr tUgkun'tu;
	tUval kalitta tEm pAy punnai
	mel iNark kaNNi milain'ta main'tar
	el vaLai makaLirt talaik kai tarUun'tu;
10	vaNTu paTa malarn'ta taN n'aRug kAnal
	muNTakak kOtai oN toTi makaLir
	irum panaiyin kurumpai n'Irum,
	pUg karumpin tIm cARum,
	Ogku maNal kuvavut tAzait
15	tIm n'IroTu uTan virAay,
	mun' n'Ir uNTu mun'n'Irp pAyum;
	tAgkA uRaiyuL n'al Ur kezIiya
	OmpA Ikai mA vEL evvi
	punal am putavin mizalaiyoTu kazanik
20	kayal Ar n'Arai pOrvil cEkkum,
	pon aNi yAnait tol mutir vELir,
	kuppai n'ellin, muttURu tan'ta
	koRRa n'IL kuTai, koTit tErc ceziya!
	n'inRu n'ilaiiyar n'in n'ALmIn; n'illAtu
25	paTAac celIiyar, n'in pakaivar mInE
	n'innoTu, tonRu mUtta uyirinum, uyiroTu
	n'inRu mUtta yAkkai anna, n'in
	ATu kuTi mUtta vizut tiNaic ciRan'ta
	vALin vAzn'ar tAL valam vAztta,
30	iraval mAkkaL Ikai n'uvala,
	oN toTi makaLir polagkalattu En'tiya
	taN kamaz tERal maTuppa, makiz ciRan'tu,
	Agku initu ozukumati, peruma! 'Agku atu
	vallun'ar vAzn'tOr' enpa tol icai,
35	malar talai ulakattut tOnRi,
	palar, celac cellAtu, n'inRu viLin'tOrE.

35

	n'aLi iru mun'n'Ir ENi Aka,
	vaLi iTai vazagkA vAnam cUTiya
	maN tiNi kiTakkait taN tamizk kizavar,
	muracu muzagku tAnai mUvaruLLum,
5	aracu enappaTuvatu n'inatE, peruma!
	alagkukatirk kanali n'Alvayin tOnRinum,
	ilagkukatir veLLi ten pulam paTarinum,
	am taN kAviri van'tu kavarpu UTTa,
	tOTu koL vElin tORRam pOla,
10	ATu kaN karumpin veN pU n'uTagkum
	n'ATu enappaTuvatu n'inatE attai; Agka
	n'ATu kezu celvattup pITu kezu vEn'tE!
	n'inava kURuval; enava kENmati!
	aRam purin'tanna cegkOl n'ATTattu
15	muRai vENTu pozutil patan eLiyOr INTu
	uRai vENTu pozutil peyal peRROrE;
	jAyiRu cuman'ta kOTu tiraL koNmU
	mAka vicumpin n'aTuvu n'inRAgku,
	kaN pora viLagku n'in viN poru viyankuTai
20	veyil maRaik koNTanRO? anRE; varun'tiya
	kuTi maRaippatuvE; kUrvEl vaLava!
	veLiRRup panan' tuNiyin vIRRuvIRRuk kiTappa,
	kaLiRRuk kaNam poruta kaN akan paRan'talai,
	varupaTai tAgki, peyar puRattu Arttu,
25	porupaTai tarUum koRRamum uzupaTai
	UnRu cAl marugkin InRatan payanE;
	mAri poyppinum, vAri kunRinum,
	iyaRkai allana ceyaRkaiyil tOnRinum,
	kAvalarp pazikkum, ik kaN akal jAlam;
30	atu n'aRku aRin'tanaiAyin, n'Iyum
	n'otumalALar potumozi koLLAtu,
	pakaTu puRan'tarun'ar pAram Ompi,
	kuTi puRan'tarukuvai Ayin, n'in
	aTi puRan'tarukuvar, aTagkAtOrE.

45

	irum panai veN tOTu malain'tOn allan;
	karuj cinai vEmpin teriyalOn allan;
	n'inna kaNNiyum Ar miTain'tanRE; n'innoTu
	poruvOn kaNNiyum Ar miTain'tanRE;
5	oruvIr tORpinum, tORpa n'um kuTiyE;
	iruvIr vERal iyaRkaiyum anRE; atanAl,
	kuTipporuL anRu, n'um ceyti; koTit tEr
	n'um Or anna vEn'tarkku
	meym mali uvakai ceyyum; iv ikalE.

56

	ERRu valan uyariya eri maruL avir caTai,
	mARRu arug kaNicci, maNi miTaRROnum;
	kaTal vaLar puri vaLai puraiyum mEni,
	aTal ven' n'Ajcil, panaik koTiyOnum;
5	maNNuRu tiru maNi puraiyum mEni,
	viN uyar puL koTi, viRal veyyOnum,
	maNi mayil uyariya mARA venRi,
	piNimuka Urti, oN ceyyOnum ena
	jAlam kAkkum kAla munpin,
10	tOlA n'al icai, n'AlvaruLLum,
	kURRu ottIyE, mARRu aruj cIRRam;
	vali ottIyE, vAliyOnai;
	pukaz ottIyE, ikazun'ar aTun'anai;
	muruku ottIyE, munniyatu muTittalin;
15	Agku Agku avar avar ottalin, yAgkum
	ariyavum uLavO, n'inakkE? atanAl,
	iravalarkku arug kalam arukAtu IyA,
	yavanar n'an kalam tan'ta taN kamaz tERal
	pon cey punai kalattu En'ti, n'ALum
20	oN toTi makaLir maTuppa, makiz ciRan'tu,
	Agku initu ozukumati! Ogku vAL mARa!
	am kaN vicumpin Ar iruL akaRRum
	veg katirc celvan pOlavum, kuTa ticait
	taN katir matiyam pOlavum,
25	n'inRu n'ilaiiyar, ulakamOTu uTanE!

58

	n'IyE, taN punal kAvirik kizavanai; ivanE,
	muzu mutal tolain'ta kOLi Alattuk
	kozu n'izal n'eTuj cinai vIz poRuttAgku,
	tollOr mAyn'tenat tuLagkal cellAtu,
5	n'al icai mutu kuTi n'aTukku aRat tazIi,
	iLaiyatu Ayinum kiLai arA eRiyum
	arun'arai urumin, porun'araip poRAac
	ceru mAN pajcavar ERE; n'IyE,
	aRam tujcu uRan'taip porun'anai; ivanE,
10	n'ellum n'Irum ellArkkum eLiya ena,
	varaiya cAn'tamum, tiraiya muttamum,
	imiz kural muracam mUnRuTan ALum
	tamiz kezu kUTal taN kOl vEn'tE;
	pAl n'iRa uruvin panaik koTiyOnum,
15	n'Il n'iRa uruvin n'EmiyOnum, enRu
	iru perun' teyvamum uTan n'inRAagku,
	uru kezu tORRamoTu uTkuvara viLagki,
	innIr Akalin, iniyavum uLavO?
	innum kENmin: n'um icai vAziyavE;
20	oruvIr oruvIrkku ARRutir; iruvIrum
	uTan n'ilai tiriyIr Ayin, imiztiraip
	pauvam uTutta ip payam kezu mA n'ilam
	kaiyakappaTuvatu poy AkAtE;
	atanAl, n'alla pOlavum, n'ayava pOlavum,
25	tollOr cenRa n'eRiya pOlavum,
	kAtal n'ejcin n'um iTai pukaRku alamarum
	Etil mAkkaL potumozi koLLAtu,
	inRE pOlka, n'um puNarcci; venRu venRu
	aTu kaLattu uyarka, n'um vElE; koTuvarik
30	kOLmAk kuyinRa cEN viLagku toTu poRi
	n'eTu n'Irk keNTaiyoTu poRitta
	kuTumiya Aka, piRar kunRu kezu n'ATE.

61

	koNTaik kUzait taN tazaik kaTaiciyar
	ciRu mAN n'eytal AmpaloTu kaTkum,
	malagku miLir, ceRuvin taLampu taTin'tu iTTa
	pazana vALaip parUuk kaN tuNiyal
5	putu n'el veN cORRuk kaNNuRai Aka,
	vilAp puTai marugku vicippa mAn'ti,
	n'ITu katirk kazanic cUTu taTumARum
	van kai vinaijar pun talaic ciRAar
	tegku paTu viyan pazam munaiyin, tan'taiyar
10	kuRaikkaN n'eTum pOr ERi, vicaittu ezun'tu
	cezug kOL peNNaip pazam toTa muyalum,
	vaikal yANar, n'al n'ATTup porun'an,
	eHku viLagku taTak kai iyal tErc cenni,
	cilait tAr akalam malaikkun'ar uLar enin,
15	tAm aRikuvar tamakku uRuti; yAm avan
	ezu uRaz tiNi tOL vazu inRu malain'tOr
	vAzak kaNTanRum ilamE; tAzAtu,
	tirun'tu aTi porun'ta vallOr
	varun'tak kANTal, ataninum ilamE.

85

	ennaikku Ur iHtu anmaiyAnum,
	ennaikku n'ATu iHtu anmaiyAnum,
	'ATu ATu' enpa, oru cArOrE;
	'ATu anRu' enpa, oru cArOrE;
5	n'alla, pallOr iru n'an moziyE;
	am cilampu olippa OTi, em il,
	muzAaraip pOn'tai porun'ti n'inRu,
	yAn kaNTanan, avan ATu AkutalE.

99

	amararp pENiyum, Avuti aruttiyum,
	arum peRal marapin karumpu ivaN tan'tum,
	n'Ir aka irukkai Azi cUTTiya
	tol n'ilai marapin n'in munnOr pOla,
5	Ikai am kazal kAl, irum panam puTaiyal,
	pU Ar kAvin, puniRRup pulAl n'eTu vEl,
	ezu poRi n'ATTattu ezAat tAyam
	vazu inRu eytiyum amaiyAy, ceru vETTu,
	imiz kural muracin ezuvaroTu muraNic
10	cenRu, amar kaTan'tu, n'in ARRal tORRiya
	anRum, pATun'arkku ariyai; inRum
	paraNan pATinan maRkol maRRu n'I
	muraN miku kOvalUr n'URi, n'in
	araN aTu tikiri En'tiya tOLE!

229

	ATu iyal azal kuTTattu
	Ar iruL arai iravil,
	muTap panaiyattu vEr mutalAk
	kaTaik kuLattuk kayam kAya,
5	pagkuni uyar azuvattu,
	talai n'ALmIn n'ilai tiriya,
	n'ilai n'ALmIn atan etir Ertara,
	tol n'ALmIn tuRai paTiya,
	pAcic cellAtu, Ucit tunnAtu,
10	aLakkart tiNai viLakkAkak
	kanai eri parappa, kAl etirpu pogki,
	oru mIn vIzn'tanRAl, vicumpinAnE;
	atu kaNTu, yAmum piRarum pal vERu iravalar,
	'paRai icai aruvi n'al n'ATTup porun'an
15	n'Oy ilanAyin n'anRuman til' ena
	azin'ta n'ejcam maTiuLam parappa,
	ajcinam; ezu n'AL van'tanRu, inRE;
	main'tuTai yAnai kai vaittu uRagkavum,
	tiN piNi muracam kaN kizin'tu uruLavum,
20	kAval veNkuTai kAl parin'tu ulaRavum,
	kAl iyal kali mAk kati ila vaikavum,
	mElOr ulakam eytinan; Akalin,
	oN toTi makaLirkku uRu tuNai Aki,
	tan tuNai Ayam maRan'tanankollO
25	pakaivarp piNikkum ARRal, n'acaivarkku
	aLan'tu koTai aRiyA Ikai,
	maNi varai anna mAayOnE?

249

	katir mUkku Aral kIz cERRu oLippa,
	kaNaik kOTTu vALai mIn'Irp piRaza,
	erip pUm pazanam n'erittu uTan valaijar
	arik kural taTAriyin yAmai miLira,
5	panai n'ukumpu anna cinai mutir varAloTu,
	uRaz vEl anna oN kayal mukakkum,
	akal n'ATTu aNNal pukAvE, n'erun'aip
	pakal iTam kaNNip palaroTum kUTi,
	oruvazippaTTanRu; mannE! inRE,
10	aTagkiya kaRpin, Ay n'utal maTan'tai,
	uyar n'ilai ulakam avan puka,.... vari
	n'IRu ATu cuLakin cIRiTam n'Ikki,
	azutal AnAk kaNNaL,
	mezukum, Appi kaN kaluz n'IrAnE.

265

	Ur n'ani iRan'ta pAr mutir paRan'talai,
	Ogku n'ilai vEgkai oL iNar n'aRu vIp
	pOn'tai am tOTTin punain'tanar toTuttu,
	pal An kOvalar paTalai cUTTa,
5	kal AyinaiyE kaTu mAn tOnRal!
	vAn ERu puraiyum n'in tAL n'izal vAzkkaip
	paricilar celvam anRiyum, viri tArk
	kaTum pakaTTu yAnai vEn'tar
	oTugkA venRiyum, n'innoTu celavE.

297

	peru n'Ir mEval taNNaTai erumai
	iru maruppu uRazum n'eTu mAN n'eRRin
	paim payaRu utirtta kOtin kOl aNai,
	kanRuTai marai At tujcum cIRUrk
5	kOL ivaN vENTEm, puravE; n'Ar ari
	n'anai mutir cATi n'aRavin vAztti,
	tuRai n'ani kezIik kampuL Inum
	taNNaTai peRutalum urittE vain' n'uti
	n'eTu vEl pAyn'ta mArpin,
10	maTal van pOn'taiyin, n'iRkumOrkkE.

340

	aNit tazai n'uTagka OTi, maNip poRik
	kural am kunRi koLLum iLaiyOL,
	mA makaL
	....................... l ena vinavuti, kEL, n'I:
5	eTuppave...,..................................................
	..........................main'tar tan'tai
	irum panai anna perug kai yAnai
	karan'tai am ceRuvin peyarkkum
	perun' takai mannarkku varain'tirun'tananE.

375

	alagku katir cuman'ta kalagkaR cUzi,
	n'ilaitaLarvu tolain'ta olku n'ilaip pal kAR
	potiyil oru ciRai paLLi Aka,
	muzAaraip pOn'tai ara vAy mA maTal
5	n'Arum pOzum kiNaiyoTu curukki,
	Erin vAzn'ar kuTimuRai pukAa,
	'Uz iran'tu uNNum uyaval vAzvaip
	puravu etirn'tu koLLum cAnROr yAr?' enap
	piracam tUgkum aRAa yANar,
10	varai aNi paTappai, n'al n'ATTup porun'a!
	poyyA Ikaik kazal toTi Aay!
	yAvarum inmaiyin kiNaippa, tAvatu,
	peru mazai kaTal paran'tAagku, yAnum
	oru n'in uLLi van'tanen; atanAl
15	pulavar pukkil Aki, n'ilavarai
	n'ilIiyar attai, n'IyE! onRE
	n'in inRu vaRuvitu Akiya ulakattu,
	n'ilavanmArO, puravalar! tunni,
	periya Otinum ciRiya uNarAp
20	pITu inRu perukiya tiruvin,
	pATu il, mannaraip pATanmAr, emarE!