ஓதினார். (16) 

மன்ற என்னும் இடைச்சொல்லின் பொருள்

267. மன்றவென் கிளவி தேற்றஞ் செய்யும். 

இதுவும் அது. 

(இ-ள்.) மன்ற என் கிளவி தேற்றம் செய்யும்-மன்ற என்னுஞ் சொல்
தெளிவுப்பொருண்மை உணர்த்தும், எ-று. 

(எ-டு.) ‘மடவை   மன்ற   வாழிய  முருகே!’ (நற்.34)  என  மன்ற
அறியாமையையே தெளிவித்தது. (17) 

தஞ்சம் என்னும் இடைச்சொல்லின் பொருள்

268. தஞ்சக் கிளவி எண்மைப் பொருட்டே. 

இதுவும் அது. 

(இ-ள்.) தஞ்சக்  கிளவி எண்மைப்  பாருட்டே - தஞ்சம் என்னுஞ்
சொல் எளிது என்னும் பொருண்மையை உடைத்து எ-று.

(எ-டு.) ‘முரசுகெழு   தாயத்தரசோ   தஞ்சம்’   (புறம். 73:3) எனத்
 தஞ்சம் அரசு கொடுத்தல் எளிது என நின்றது. (18)  

அந்தில் என்னும் இடைச்சொல்லின் பொருள்

269. அந்தி லாங்க அசைநிலைக் கிளவியென்று
ஆயிரண் டாகும் இயற்கைத் தென்ப.  

இது, பொருள்படுமாறும் அசைநிலையாமாறுங் கூறுகின்றது. 

(இ-ள்.)   அந்தில் ஆங்கு அசைநிலைக் கிளவி என்று  ஆயிரண்டு
ஆகும் இயற்கைத்து என்ப- அந்தில் என்னுஞ் சொல் ஆங்கு  என்னும்
இடப்  பொருள் உணர்த்துதலும் அசைநிலைச்சொல் ஆதலும்  என்னும்
அவ்விரண்டு  கூறாம்  இயற்கையை  யுடைத்து என்று கூறுவர்  புலவர்,
எ-று. 

(எ-டு.)  ‘வருமே     சேயிழை    அந்தில்,’ (குறுந். 293) ‘அந்தில்
கச்சினன்    கழலினன்’ (அகம்.76:6,7) என இடமும்  அசைநிலையுமாய்
நின்றது. (19) 

கொல் என்னும் இடைச்சொல்லின் பொருள்

270. கொல்லே ஐயம். 

இது, ‘கொல்’ பொருள்படுமாறு கூறுகின்றது. 

 கொல்லே   ஐயம்   -  கொல்  என்னுஞ்  சொல்  ஐயப்
பொருண்மையை உணர்த்தும், எ-று.

(எ-டு.) ‘யாதுகொல் மற்றவர் நிலையே!’ (அகம்.139:17)

‘அதனை     வுண்டுகொல்  மதிவல்  லோர்க்கே!’  (அகம்.  48:26)
எனத்துணி    வின்கண்   ஐயஞ்   சிறிது   நினைத்தலும்   ஒன்றென
முடித்தலான் கொள்க. (20)  

எல் என்னும் இடைச்சொல்லின் பொருள்

271. எல்லே இலக்கம்.  

இதுவும் அது.

(இ-ள்)  எல்லே  இலக்கம்  - எல்  என்னுஞ்  சொல்  விளங்குதற்
பொருண்மை உணர்த்தும், எ-று.

(எ-டு.) ‘எல்வளை எம்மொடு நீ வரின்’ (கலி.13:10) என வரும். (21) 

ஆர் என்னும் இடைச்சொல் முடிபு

272. இயற்பெயர் முன்னர் ஆரைக் கிளவி
பலர்க்குரி எழுத்தின் வினையொடு முடிமே.  

இஃது, ஆர் என்னும் இடைச்சொல் முடிபு கூறுகின்றது.

(இ-ள்) யற்பெயர்  முன்னர்  ஆரைக்கிளவி  -  இரு  திணைக்கும்
இயலும் பெயர்க்கும்