அசைநிலை யாமாறு உணர்த்துதல் நுதலிற்று.

இ - ள். இயற்பெயர் முன்னர் வரும் ஆர் என்னும் இடைச் சொல் ஒருமைப் பொருண்மேல் வரினும், பலர்க்குரித்தாகிய எழுத்தினையுடைய வினையொடு முற்றுப் பெறும்: அது அசை நிலைக்கிளவி ஆகுமிடனறிந்து கொள்க, எ - று.

வந்தது கண்டு வாராதது முடித்தல் என்பதனால் பிறபெயர்க் கண்ணும் என்பன கொள்க.

“பலர்க்குரி யெழுத்தின் வினையொடு முடிமே” என்ற உம்மை எச்சமாகலான், ஒருமையான் வரவும் பெறும் என்றவாறு.

இதனானே, இடைச்சொற்பற்றிவரும் பால் வழுவும், திணை வழுவும் அமைத்தவாறாயிற்று.

எ - டு. சாத்தனார், சாத்தியார், நம்பியார், நங்கையார், முடவனார், முடத்தியார், தாயார், தந்தையார், கிளியார், மயிலார் என்பன ஒருமையுணர நின்றனவாயினும், வினையோடு வருங்கால் வந்தார் எனவரும். நம்பியார் வந்தான், நங்கையார் வந்தாள் என இவ்வாறு வருதற்கேற்பனவுங் கொள்க. ²“ஒருவரைக் கூறும் பன்மைக் கிளவியும்” என்பதனுள் அடங்காதோ எனின், ஆண்டு உரைத்த விடையே ஈண்டும் உரைக்க.

ஆர் என்பது இடைச்சொல்லாயின், இப்பெயருடையார் பலர் வந்துழிக் கூறுமாறு என்னை யெனின், அதனானே யன்றே மார் என்பது வேறு எடுத்தோதல் வேண்டிற்று. ³“எல்லா உயிரொடுஞ் செல்லுமார் முதலே” என்புழி, ஆர் அசைநிலையாயிற்று.

(22)

1. இச்சூத்திரத்தை இரு சூத்திரமாகக் கொள்வர் ஏனை உரையாளர்கள்.

2. கிளவியாக்கம். 27.

3. மொழிமரபு. 28.