இஃது , மூன்றாம் வேற்றுமைத் திரிபு உணர்த்துதல் நுதலிற்று. (இ-ள்) புள்ளி இறுதியும் உயிர் இறு கிளவியும் - புள்ளியீற்றுச் சொல்லும் , உயிரீற்றுச் சொல்லும் வல்லெழுத்து மிகுதி சொல்லிய முறையான் - வல்லெழுத்தினது மிகுதி மேற்சொல்லும் முறைமையான் , தம்மின் ஆகிய தொழிற்சொல் முன்வரின் - அம் மூன்றாவதன் பொருளாகிய வினைமுதற் பொருள்கள் தம்மான் உளவாகிய வினைச்சொற்கள் தாம் அவற்று முன் வரின் , மெய்ம்மையாகலும் உறழத் தோன்றலும் அ முறை இரண்டும் உரியவை உள - இயல்பாகலும் உறழத்தோன்றுதலுமாகிய அம்முறைமையினையுடைய இரண்டு செய்கையும் உரியன உள . வேற்றுமை மருங்கின் போற்றல் வேண்டும் - அவற்றை மேலே வேற்றுமைப் பொருட்புணர்ச்சி முடிபு சொல்லுமிடத்துப் போற்றியறிதல் வேண்டும். எ - டு: நாய்கோட்பட்டான் , புலிகோட்பட்டான் , சாரப்பட்டான் , தீண்டப்பட்டான் , பாயப்பட்டான் என இவை இயல்பு . சூர்கோட்பட்டான் , சூர்க்கோட்பட்டான் , வளிகோட்பட்டான் , வளிக்கோட்பட்டான் என இவை உறழ்ச்சி. புள்ளியீறு உயிரீறு என்றதனால் , பேஎய்கோட்பட்டான் , பேஎய்க்கோட்பட்டான் என்னும் உறழ்ச்சியுள் எகரப்பேறு கொள்க . உரியவையுள என்றதனான் , பாம்புகோட்பட்டான் , பாம்புக்கோட்பட்டான் என்னும் உறழ்ச்சியுள் நிலைமொழி யொற்றுத் திரியாமையும் திரிதலும் கொள்க. (14)
|