இதுவும் அது. (இ-ள்) ஒன்று முதலாக பத்து ஊர்ந்து வரும் எல்லா எண்ணும் - ஒன்று என்னும் எண்ணுப்பெயர் முதலாகப் பத்து என்னும் எண்ணுப்பெயரால் ஊரப்பட்டுவரும் எல்லா எண்ணுப் பெயர்களும், சொல்லுங்காலை - முடிபு சொல்லுங்காலத்து, ஆன் இடைவரினும் மானம் இல்லை - அவ்வீற்றிற்கு மேற் கூறிய அன்னேயன்றி ஆன்சாரியை இடைவரினும் குற்றமில்லை, அவயின் அஃது என் கிளவி கெடும் - அவ்வான்சாரியை பெற்றவழி அஃது என்னும் சொல் கெடும், பஃகான்மெய் உய்தல் வேண்டும் - அது கெடுவழி அவ்வகரத்தான் ஊரப்பட்ட பகரமாகிய மெய் கெடாது நிற்றல் வேண்டும். எ - டு: ஒருபானை, ஒரு பானொடு; ஒருபஃதினை, ஒரு பஃதினொடு, இருபஃதினை , இருபஃதினொடு என ஒட்டுக. `சொல்லுங்காலை' என்றதனால், ஒன்பதென்னும் எண்ணுப் பெயரும் ஆன் பெற்று அவ்வீற்றின் அது என்னும் சொற்கெட்டு முடிதல் கொள்க. ஒன்பானை, ஒன்பானொடு என ஒட்டுக. (27)
|