இஃது, அவ்வீற்றிற் சிலவற்றிற்கு இயல்புகூறி எய்தியது விலக்குதலும் எய்தாதது எய்துவித்தலும் நுதலிற்று. (இ-ள்) ஆவும் மாவும் விளிப்பெயர்க்கிளவியும்- ஆ என்னும் பெயர்ச்சொல்லும் மா என்னும் பெயர்ச்சொல்லும் விளித்தலையுடைய பெயராகிய உயர்திணைச்சொல்லும், யா என் வினாவும் பலவற்று இறுதியும்-யா என்னும் வினாப்பெயரும் அஃறிணைப்பன்மைப்பொருளை உணர்த்தும் ஆகாரவீற்று முற்று வினைச்சொல்லும், ஏவல் குறித்த உரையசைமியாவும்-முன்னிலையில் ஏவல் வினைச்சொல்லைக் குறித்துவரும் உரையசையாகிய மியா என்னும் ஆகாரவீற்று இடைச்சொல்லும், தன் தொழில் உரைக்கும் வினாவின் கிளவியொடு அன்றி அனைத்தும்- தனது தொழிலினைச் சொல்லும் ஆகார வினாவினையுடைய வினைச்சொல்லுமாகிய அவ்வனைத்தும், இயல்பு என மொழிப-இயல்பாய் முடியும் என்று சொல்லுவர் புலவர். எ - டு: ஆகுறிது, சிறிது, தீது, பெரிது எனவும்; மாகுறிது, சிறிது, தீது, பெரிது எனவும்; ஊராகொள், செல், தா, போ எனவும் வரும்; யாகுறிய, சிறிய, தீய, பெரிய எனவும்; உண்ணா குதிரை, செந்நாய், தகர், பன்றி எனவும்; கேண்மியாகொற்றா, சாத்தா, தேவா, பூதா எனவும்; உண்கா1 கொற்றா, சாத்தா, தேவா, பூதா எனவும் வரும். விளிப்பெயர்க் கிளவியும், பலவற்றிறுதியும், ஏவல்குறித்த உரையசை மியாவும், தன்றொழிலுரைக்கும் வினாவும் எய்தாதது எய்துவிக்கப்ட்டன. ஊரா கொள் என்பது உயிரீறாகிய உயர்திணைப் பெயரென்பதனுள் அடங்காதோ வெனின், முன் (உயிர் மயங்கியல்-8) கூறிற்றே கூறுக. (22)
1. `உண்கா' என்பது யானுண்பேனோ என்னும் பொருட்டு (நச்.)
|