இஃது, அவ்வீற்று அசைநிலை இடைச்சொல்லும் ஏழாம் வேற்றுமை இடப்பொருள் உணரநின்ற இடைச்சொற்களும் வினையெச்சமும் கூறுதல் நுதலிற்று. (இ-ள்) மன்னும் சின்னும் ஆனும் ஈனும் பின்னும் முன்னும் வினையெஞ்சு கிளவியும் - மன் என்னும் சொல்லும் சின் என்னும் சொல்லும் ஆன் என்னும் சொல்லும் ஈன் என்னும் சொல்லும் பின் என்னும் சொல்லும் முன் என்னும் சொல்லும் வினையெச்சமாகிய சொல்லும் , அன்ன இயல என்மனார் புலவர் - மேற்கூறிய இயல்பினவாய் னகரம் றகரமாய் முடியும் என்று சொல்லுவர் புலவர். எ - டு : அதுமற் கொண்கன் றேரே , காப்பும் பூண்டிசிற் கடையும் போகல் எனவும் ; ஆற்கொண்டான் , ஈற்கொண்டான் , புற்கொண்டான் , முற்கொண்டான் , சென்றான் , தந்தான் , போயினான் எனவும் ; வரிற்கொள்ளும் ; செல்லும் , தரும் , போம் எனவும் வரும் . பெயராந் தன்மையவாகிய ஆன் , ஈன்1 என்பனவற்றை முற்கூறாததனான் , ஆன்கொண்டான் , ஈன்கொண்டான் எனத் திரியாது முடிதலும் கொள்க. பின் , முன் என்பன பெயர் நிலையும் வினையெச்ச நிலையும் உருபு நிலையும் படும் . அவற்றுள் வினையெச்சநிலை ஈண்டு வினையெஞ்சு கிளவியும் என்பதனான் முடியும் . உருபுநிலை உருபியலுள் முடியும் . ஈண்டுப் பெயர் கூறுகின்றது . அப்பெயரை முன்கூறாததனால் பின் கொண்டான் , முன்கொண்டான் எனத் திரியாமையும் கொள்க. `இயல' , என்றதனான் , ஊன் என்னும் சுட்டு ஊன்கொண்டான் என இயல்பாய் முடிதல் கொள்க. (38)
1. ஆன் - அங்கு , ஈன் - இங்கு , ஊன் - உங்கு , உவ்விடம்.
|