மொழி மரபு 1. சார்பெழுத்துக்கள் மொழிகளிற் பயிலுமாறு குற்றியலிகரத்திற்கு இடனும் பற்றுக்கோடும்
35.	புணரியல் நிலையிடைக் குறுகலும் உரித்தே உணரக் கூறின் முன்னர்த் தோன்றும்.

இஃது, குற்றியலிகரம் புணர்மொழியுள்ளும் வருமென்று உணர்த்துதல் நுதலிற்று. புணர் இயல் நிலை இடையும்- இரு மொழி தம்மிற் புணர்தல் இயன்ற நிலைமைக்கண்ணும், குறுகல் உரித்து- அவ் விகரம் குறுகுதலுடைத்து, உணரக் கூறின்-(ஆண்டை இடத்தினையும் பற்றுக்கோட்டினையும் ஈண்டு) உணரக் கூறப் புகின், முன்னர் தோன்றும்-(அது வேண்டுவதில்லை) குற்றியலுகரப்புணரியலுள் (அவ்விடனும் பற்றுக்கோடும்) தோன்றும். `புணரிய னிலை யிடையும்' என மொழிமாற்றி உரைக்க முன்னர்த் தோன்றுமாறு: "யகரம் வரும்வழி யிகரங் குறுகும் உகரக் கிளவி துவரத் தோன்றாது" (குற்றியலுகரப் புணரியல்-(5)) உகரம் சார்ந்த வல்லெழுத்துப் பற்றுக்கோடு. எ - டு: நாகியாது, வரகியாது, தெள்கியாது, எஃகியாது, கொக்கியாது, குரங்கியாது என வரும். (2)