தாய்அறி வுறுதல் செவிலியொ டொக்கும் 

நற்றாய் தலைவி யொழுக்கத்தை அறியுமாறு கூறுகின்றது.
 

பொருள் :தலைவியது களவொழுக்கத்தை நற்றாய் அறிந்துகொள்ளுதல்
செவிலி அறிந்து கோடலொடு ஒக்கும்.
 

"தாய்க்கும்    வரையார்   உணர்வுடம்  படினே' என்றதனான் ஈண்டுச்
செவிலியொடு   ஒக்கும்  என்றார். அங்ஙனம் மதியுடம்பட்டு உணராதவழிச்
செவிலி அறத்தொடு நிற்றலான் உணரும் என்பது இதன் பயனாம்.
 

"எனவாங்கு, அறத்தொடு நின்றேனைக் கண்டு திறம்பட 

என்னையர்க் குய்த்துரைத்தாள் யாய்" 

என்பதனாற் கண்டு கொள்க.
 

அம்பலும் அலரும் களவுவெளிப் படுத்தலின் 

அங்கதன் முதல்வன் கிழவ னாகும் 

களவொழுக்கம்   புறத்தார்க்குப்   புலப்படுமாறும்    அதற்குக்
காரணம் ஆமாறும் கூறுகின்றது.
 

பொருள் : அயலவர்  நிகழ்த்தும்   அம்பலும்   தூற்றும்    அலரும்
தலைவியது   களவொழுக்கத்தைப்   பிறரறியப்   புலப்படுத்தும்.   அவை
அங்ஙனம் புலப்படுத்தலான் அதற்குக் காரணமாவான் தலைவனாவான்.
 

இரவுக்குறிக்கண்ணும்   பகற்குறிக்கண்ணும்   வந்து      செல்வானைக்
காண்டலான் களவு புலப்பாடாகும் என்க.
 

"நீர்ஒலித் தன்ன பேஎர் 

அலர்நமக் கொழிய அழப்பிரிந் தோரே". 

என்பதனான் தலைவன் காரணமாதல் அறிக.
 

வெளிப்பட வரைதல் படாமை வரைதல்என்று 

ஆயிரண் டென்ப வரைத லாறே 

களவின்    முடிபாகிய   வரைதல்     பற்றியதொரு முறைமை
கூறுகின்றது.
 

பொருள் : களவொழுக்கம்   புறத்தார்க்கும்   வெளிப்பாடான பின்னர்
வரைந்து கோடலும் வெளிப்படாததற்கு   முன்னர் வரைந்து கோடலும் என
வரைதல் பற்றிய முறைமை இருவகைப்படுமென்று கூறுவர் நூலோர்.