கைக்கிளை இன்னதென்பது

3. அவற்றுட்
கைக்கிளை யுடைய தொருதலைக் காமம்.

(இ - ம்.) நிறுத்தமுறையானே கைக்கிளைக்குரிய காமப்பொருள் உணர்த்துதல் நுதலிற்று.

(இ - ள்.) மேற்சொல்லப்பட்ட அகப்பொருள் விகற்பமாகிய ஏழனுட் கைக்கிளை என்பதனுடைய பொருள் ஒரு தலைக்காமம் என்றவாறு.

அவற்றுள் என்பதனை மேல்வருகின்ற சூத்திரம் இரண்டற்குந் தந்துரைக்க.

(3)

ஐந்திணை இன்னதென்பது

4. ஐந்திணை யுடைய தன்புடைக் காமம்.

(இ - ம்.) ஐந்திணைக்குரிய காமப்பொருள் உணர்த்துதல் நுதலிற்று.

(இ - ள்.) ஐந்திணை என்பதனுடைய பொருள் அன்புடைக் காமம் என்றவாறு.

(4)

பெருந்திணை இன்னதென்பது

5. பெருந்திணை என்பது பொருந்தாக் காமம்.

(இ - ம்.) பெருந்திணைக்குரிய காமப்பொருள் உணர்த்துதல் நுதலிற்று.

(இ - ள்.) பெருந்திணை என்பதனுடைய பொருள் பொருந்தாக் காமம் என்றவாறு.

இவற்றின் விகற்பமெல்லாம் மேலே காட்டப்படும்.

(5)

ஐந்திணையின் பெயர்

6. குறிஞ்சி பாலை முல்லை மருதம்
நெய்தல் ஐந்திணைக் கெய்திய பெயரே.

(இ - ம்.) நிலம் வகுக்கப்படாத கைக்கிளையும் பெருந்திணையும் ஒழித்து - நிலம்
வகுக்கப்படும் ஐந்திணைக்கும் உரிய பெயர் உணர்த்துதல் நுதலிற்று.

(இ - ள்.) குறிஞ்சியும் பாலையும் முல்லையும் மருதமும் நெய்தலும் அவ்வைந்து திணைக்கும் பொருந்திய பெயராம் என்றவாறு.