கருப்பொருள் வகை

19. ஆரணங் குயர்ந்தோ ரல்லோர் புள்விலங்
கூர்நீர் பூமர முணாப்பறை யாழ்பண்
டொழிலெனக் கருவீ ரெழுவகைத் தாகும்.

(இ - ம்.) கருப்பொருளின் பாகுபாடு உணர்த்துதல் நுதலிற்று.

(இ - ள்.) தெய்வம் முதலாகத் தொழில் ஈறாகச் சொல்லப்பட்ட பதினான்கு வகையினை உடைத்தாங் கருப்பொருள் என்றவாறு.

என்னை?

¹"தெய்வ முணாவே மாமரம் புட்பறை
செய்தி யாழின் பகுதியொடு தொகைஇ
இவ்வகை பிறவுங் கருவென மொழிப"

என்றாராகலின்.

மற்று, அக் கருப்பொருள் எண் பதினான்கு என்று வரையறுத்தது என்னை? ²இதனுள் எடுத்தோதப்பட்டது எட்டன்றோ வெனின், ஒழிந்த ஆறும் இச் சூத்திரத்துப் 'பிற' என்னும் இலேசானே பெறப்பட்டன என்க.

(19)

குறிஞ்சிக் கருப்பொருள்

20. விறற்சேய் பொருப்பன் வெற்பன் சிலம்பன்
குறத்தி கொடிச்சி குறவர் கானவர்
குறத்தியர் கிளிமயில் மறப்புலி ³குடாவடி
⁴கறையடி சீயஞ் சிறுகுடி யருவி
நறுஞ்சுனை வேங்கை குறிஞ்சி காந்தள்
ஆரந் தேக்ககில் அசோகம் நாகம்.

1. தொல், பொருள், அகத்திணையியல், சூ: 18.

2. மேற்காட்டிய தொல்காப்பியச்சூத்திரத்துள்.

3. குடாவடி - கரடி: வளைவாகிய அடியை உடையது என்பது இதன் பொருள்.
குடா - வளைவு.

4. கறையடி - யானை: உரல்போன்ற அடியை உடையது என்பது இதன் பொருள்.
கறை - உரல்.