அரைமாத்திரையினும்  குறுகி நிற்குமாறு: கொக்குக்குறிது, கச்சுச்சுருக்கம்,
பத்துத்துடி,   செப்புப்புதிது  எனவரும்.   இவற்றை   விட்டிசையாது  கூறி
மாத்திரை குறைந்து நிற்றலை அறிக. கொக்குக்கடிது, கச்சுச்சிறிது  என்பவை
கூறுவோன் முயற்சியை ஒட்டிக்  குறுகியும்  நிற்கும்;  குறுகாதும்   நிற்கும்.
கொக்குச்  சிறிது,  கச்சுப்  பெரிது என  வரும் வல்லெழுத்துப் பிறிதாயின்
குறுகாது.
 

குறுகல்,      நீளல்,    மிகுதல்,    திரிதல்   என்பவை   ஒலிபற்றிய
இலக்கணமாதலின் இவற்றை வாயாற் சொல்லிச் செவிமடுத்தறிக.
 

யகரம் வருவழி இகரம் குறுகும்

உகரக் கிளவி துவரத் தோன்றாது  

க-து :

பொருள்:  குறித்துவரு கிளவியின் முதலாக யகரம் வரும்வழி ஆண்டுக்
குற்றியலிகரம் வந்து  தனது அரைமாத்திரையினும் குறுகி  நிற்கும். அவ்வழி
நிறுத்த சொல்லின் ஈறாகிய குற்றியலுகர எழுத்தொலி முற்றாகத் தோன்றாது.
 

இகரம்   உகரம்  எனப்பட்டவை  குற்றியலிகரம், குற்றியலுகரம் என்பது
அதிகாரத்தாற் பெறப்பட்டது.
 

குற்றியலுகர   ஈற்றின்   முன்  யகரம்   வந்து  புணருங்கால் ஆண்டு
யகரத்தொடு ஒலி ஒற்றுமையுடைய குற்றியலிகரம் ஆசாக வருதலும், அஃது
அரைமாத்திரையே     உடைய   சார்பெழுத்தாகலின்   குற்றியலுகரத்தின்
மேல் ஏறி முடிதற்காகாமையும் நோக்கிக் குற்றியலுகரம் தான் ஊர்ந்து நின்ற
மெய்யை  நிறுத்தித் தன் ஓசை தோன்றாது  என்றார்.உகரம் கெடும் எனின்
மொழிப்பொருள்   திரியுமாதலின்,   ‘உகரக் கிளவி   துவரத்  தோன்றாது’
என்றார்.    கிளவி    என்றது   அவ்   எழுத்தொலியை.  குற்றியலிகரம்
யகரமெய்யைச்   சார்ந்தேவரும்   என்பதனை மியா   என்னும்   அசைச்
சொல்லானும்   அறிக.   மற்று, நாகு + யாது = நாகியாது   என  வந்துழி
நிலைமொழி குற்றியலுகர ஈற்றுச் சொல்லாகப் பொருள் தருமாறு யாங்ஙனம்
எனின்? நாய்- நாஇ என யகரப் புள்ளிக்கு இகரமும் மனம் - மனன்; அறம்
- அறன் என மகரப்புள்ளிக்கு னகரப் புள்ளியும்   பொருள்   சிதையாமல்
மாற்றெழுத்தாக வருமாறு போலக்  குற்றியலுகரம் யகரமெய்யொடு  புணரும்
புணர்மொழிக்கண்  குற்றியலிகரம் அதற்கு   மாற்றெழுத்தாக   வருமென்க.
இதனை முடிந்தது காட்டல் என்னும் உத்தியான் ஆசிரியர் கொள்ள வைத்த
சதுரப் பாட்டினையும் அறிந்துகொள்க.