இ - ள். உயர்திணை இடத்துள்ள பொருளைச் சுட்டிய விளியேற்கும் பெயர் இ, உ, ஐ, ஓ என்னும் ஈற்றினை யுடைய அக் கூற்று நான்கு, எ - று.

உயர்திணை மருங்கினுள்ள பொருள் சுட்டிய என்றமையான் உயர்திணைப் பெயரென வகுத்தோதப் படுவனவும், விரவுப் பெயருள் உயர்திணை குறித்தனவும் கொள்ளப்படும்.

(3)

இகர ஐகார ஈறுகள் விளியேற்குமாறு

இகர ஐகார ஈற்றுப் பெயர் விளி ஏற்குமாறு உணர்த்துதல்
நுதலிற்று.

இ - ள். இகரம் ஈகாரமாய்த் திரிந்தும், ஐகாரம் ஆய் எனத் திரிந்தும் விளி ஏற்கும், எ - று.

எ - டு. நம்பி, சாத்தி என்பன நம்பீ, சாத்தீ என விளி யேற்கும். நங்கை நங்காய் எனவும், தந்தை தந்தாய் எனவும் வரும்.

(4)

ஓகாரமும் உகரமும் விளியேற்குமாறு

உகர ஓகார ஈற்றுப் பெயர் விளி யேற்குமாறு உணர்த்துதல்
நுதலிற்று.

இ - ள். ஓகாரமும், உகரமும் ஏகாரம் பெற்று விளி யேற்கும்; ஆண்டுக் குற்றிய லுகரமே ஈறாகுவது, எ - று.

எ - டு. கோ, கோவே; வேந்து, வேந்தே என வரும், பிறவு மன்ன.

(5)

ஏனை உயிர் உயர்திணையில் விளியேலாமை

ஐயந்தீர்த்தல் நுதலிற்று.

இ - ள். மேற் சொல்லப்பட்ட உயிரல்லாத உயிர்கள் உயர்திணையிடத்து வரின் விளி ஏலா, எ - று.

1. இதனை இரண்டு சூத்திரங்களாகக் கொள்வர் ஏனை யுரையாளர்.