இ - ள். எண்ணுக்குறித்த ஏகாரம் சொற்றொறுங் கொள்ளாது ஒருவழிக் கொளினும் எண்ணுக் குறித்து நடக்கும், எ - று.

எ - டு. தோற்றம் இசையே நாற்றஞ் சுவையே, உறலோடாங் கைம் புலனென மொழிப என்புழி, இடையிட்டு வந்தும் எண்ணுக் குறித்தது.

(39)

எண்ணின்கண் வருவன சில இடைச்சொல் உணர்த்துதல்
நுதலிற்று.

இ - ள். உம்மை தொக்க எனவின் திரிபாகிய எனா என்னுஞ் சொல்லும், ஆவீறாகிய என்று என்னும் சொல்லும் எண்ணின்கட் பட்டன. எனவும் என்பது எனா எனவும், என்று என்பது என்றா எனவும் வரும், எ - று.

எ - டு. வளிநடந் தன்ன வாஅய்ச்செல் லிவுளியொடு--கொடி நுடங்கு மிசைய தேரின ரெனாஅக்--கடல்கண் டன்ன வொண்படைத் தானையொடு--மலைமாறு மலைக்கும் களிற்றின ரெனாஅ (புறம்-197) என்பதனுள் எனவும் என்பது எனா என்றுவந்து எண்ணுக் குறித்தவாறு கண்டுகொள்க. ஒப்பு முருபும் வெறுப்பு மென்றா, கற்பு மேரு மெழிலு மென்றா (பொருளியல்-53). என்பதனுள் என்று என்பது ஆவொடு கூடி எண்ணுக் குறித்தவாறு கண்டுகொள்க.

(40)

எண்ணிடைச் சொற்களுக்கு முடிபு வேற்றுமை

எண்ணுதற் குரியதோர் மரபு உணர்த்துதல் நுதலிற்று.

இ - ள். மேற் சொல்லப்பட்ட எனா என்றா என்பனவற்றான் வரும் எண்ணிறுதியும், பெயர்க்குரி மரபினாலெண்ணப்படும் செவ்வெண் இறுதியும், ஏகாரத்தான் எண்ணப்பட்ட எண்ணின் முடிவும் யாதானும் ஒரு நெறியான் வரினும் தொகையின்றி வழங்கா, எ - று.