:: TVU ::

332

உரியியல்

சூ. 385 :	ஐயமும் கரிப்பும் ஆகலும் உரித்தே
(88)
உரை:மேற்கூறிய கடி என்னும் சொல் ஐயமும் கரிப்பும் ஆகிய பொருள்கட்காகி வருதலும் உரித்தாகும். ஐயம் குறிப்புரிச் சொல். கரிப்பு - பண்புரிச்சொல். எ-டு : 'கடுத்தனள் அல்லளோ அன்னை' எனவும் "கடிமிளகு தின்ற கல்லா மந்தி" எனவும் வரும். "கடா" என்பது இதனடியாகப் பிறந்த பெயராகும் (கடா-ஐயவினா).
சூ. 386 :	ஐ வியப்பாகும்
(89)
உரை:ஐ என்னும் குறிப்புரிச்சொல் வியப்பென்னும் பொருட்காகி வரும். எ-டு : ஐதே காமம் யானே...(நற்-143) எனவரும். இது பெயர்ப்போலியாக வரும்
சூ. 387 :	முனைவு முனிவாகும்
(90)
உரை:முனைவு என்னும் குறிப்புரிச் சொல் முனிதலென்னும் பொருட்காகி வரும். எ-டு : சேற்றுநிலை முனைஇய செங்கட் காரான் (அகம்-46) எனவரும். முனை - முன்னர் - முனைந்தான்-முற்பட்டான் எனவரும் பெயர்-வினைகள் வேறு. இது வேறு.
சூ. 388 :	வையே கூர்மை
(91)
உரை:வை என்னும் குறிப்புரிச்சொல் கூர்மை என்னும் பொருள்பற்றி வரும். எ-டு : வைந்நுனைப்பகழி (முல்லை-73) எனவரும். இது பெயர்ப்போலியாக வரும்.
சூ. 389 :	எறுழ் வலியாகும்
(92)
உரை:எறுழ் என்னும் குறிப்புரிச் சொல் வலிமை என்னும் பொருட்காகிவரும். எ-டு : போரெறுழ் திணிதோள் (பெரும்பாண்-63) எனவரும். இது பெயர்ப்போலியாக வரும்.
சூ. 390 :	மெய்பெறக் கிளந்த உரிச்சொல் லெல்லாம்
	முன்னும் பின்னும் வருபவை நாடி
	ஒத்த மொழியாற் புணர்த்தனர் உணர்த்தல்
	தத்தம் மரபிற் றோன்றுமன் பொருளே
(93)
க-து:	பயிலாதவற்றைப் பயின்றவை சார்த்தி.....எச்சொல்லாயினும் பொருள் வேறு கிளத்தல் (உரி-1) என்னும் நூற்பா உரிச் சொற்குப் பொருளுணர்த்துமாறு கூறிற்று. இச்சூத்திரம் ஓர் உரிச்சொல் பல பொருட்கும் பல உரிச்சொற்கள் ஒரு பொருட்கும் உரிமைபெற்று வருங்கால் அவ்உரிச்சொற்களை இருவகை வழக்கினும் ஒருவன் வழங்குமாறு கூறுகின்றது.