இவ்வோத்துகள் ஒன்றற்கொன்று இயைபுடைமை அவ்வவ் வோத்துக்களுட் கூறுதும்.
  

இனி,  இச்  சூத்திரம்  என்னுதலிற்றோவெனின்,  கூறக்கருதிய  பொருளெல்லாந் தொகுத்து உணர்த்துதல்
நுதலிற்று.
  

இதன் பொருள்:- கைக்கிளை   முதலா  -   கைக்கிளையெனப்பட்ட  ஒழுக்கம் முதலாக, பெருந்திணை
இறுவாய்  -  பெருந்திணையென்னும்   ஒழுக்கத்தினை   இறுதியாகவுடைய  ஏழனையும்,  முற்படக் கிளந்த
எழுதிணை என்ப - முற்படக் கூறப்பட்ட அகத்திணை யேழென்று கூறுவர் ஆசிரியர் என்றவாறு.
 

எனவே,     பிற்படக்  கூறப்பட்ட  புறத்திணையும்  ஏழுளவென்றவாறாயிற்று;  எனவே,  இப்பதினான்கு
மல்லது  வேறு  பொருளின்றென  வரையறுத்தாராயிற்று.  அகப்புறமும்   அவை   தம்முட்  பகுதியாயிற்று
முதலும் ஈறுங் கூறித் திணையேழெனவே, ‘நடுவணைந்திணை’ உளவாதல் பெறுதும். அவை மேற்கூறுப.
  

கைக்கிளை   யென்பது  ஒருமருங்கு  பற்றிய கேண்மை. இஃது ஏழாவதன் தொகை.¹ எனவே, ஒருதலைக்
காமமாயிற்று.  எல்லாவற்றினும் பெரிதாகிய  திணையாதலிற்  பெருந்திணையாயிற்று.  என்னை?  எண் வகை
மணத்தினுள்ளுங்  கைக்கிளை  முதல்  ஆறு   திணையும்   நான்கு  மணம்  பெற, தானொன்றுமே நான்கு
மணம்  பெற்று  நடத்தலின்.²  பெருந்திணையிறுவாய் - பண்புத்  தொகைப்  புறத்துப்  பிறந்த அன்மொழித்
தொகை.³
  

முற்படக்  கிளந்தவென  எடுத்த   லோசையாற்  கூறவே,  பிற்படக்  கிளந்த  எழுதிணை  யுளவாயிற்று.
அவை வெட்சி, வஞ்சி, உழிஞை, தும்பை, வாகை, காஞ்சி, பாடாண்டினை
  

1. கைக்கண்கிளை - சிறுமைக்கண் தோன்றும் உறவு.

2. பெருந்திணைப் பெயர்க்காரணம் பொருந்தாது. இளம்பூரணர் கூறிய முதற்காரணமே பொருந்தும்.

3. பெருந்திணையாகிய  இறுவாயையுடைய  ஒழுக்கங்கள்   என   விரிதலின்  பண்புத்தொகைப் புறத்துப்
பிறந்த அன்மொழித்தொகையாகும்.