என் - எனின் எய்தியது விலக்குதல் நுதலிற்று. (இ - ள்.) மேற்கூறிய ஆக்கச் சொற்றான் காரணத்தை யொழியச்
சொல்லுதலுங் குற்றமில்லையென்று சொல்லுப ஆசிரியர்
வழக்கினிடத்து என்றவாறு. உம்மை யெதிர்மறையாகலான் காரணம்
கொடுத்துக் கூறல் வலியுடைத்து. (எ - டு.) மயிர் நல்லவாயின, பைங்கூழ் நல்லவாயின எனவரும். செய்யுள் விதியுள்வழிச் செய்யுளென்று கூறி, வாளாதேயோதுஞ்
சூத்திரமெல்லாம் வழக்கே நோக்குதல் நூற்கிடையாகலின் ‘வழக்கினுள்’
என்பது மிகை; அதனாற் செயற்கைப்பொருள் காரணங்கொடுத்து
ஆக்கங்கொடாதே சொல்லுதலும், காரணமும் ஆக்கமும் இரண்டுங்
கொடாதே சொல்லுதலுங் கொள்ளப்படும். (எ - டு.) கடுவுங் கைபிழி யெண்ணெயும் பெற்றமையான் மயிர்
நல்ல எனவும், பைங்கூழ்நல்ல எனவும் வரும். எனவே செயற்கைப்பொருள் காரணமும் ஆக்கமுங் கொடுத்தலும்,
காரணமொழிய ஆக்கங்கொடுத்தலும், ஆக்கமொழியக்
காரணங்கொடுத்தலும், காரணமும் ஆக்கமும் இரண்டுங் கொடாதே
சொல்லுதலும் என நான்குவகைத்து. இவற்றுள் முன்னையவிதியொன்றும்
மரபிலக்கணம்; பின்னைய மூன்றும் மரபுவழுவமைதி. அவற்றுள் இச்சுத்திரத்தாற் கூறியது பெரும்பான்மை, இலேசினாற்
கூறிய இரண்டுஞ் சிறுபான்மை யென உணர்க. இவை யமைவதற்குக்
காரணம் உணர்வா ருணர்வுவகைபற்றிப்போலும். (22) |