சூ. 165 :	அரைஎன வரூஉம் பால்வரை கிளவிக்குப்
	புரைவ தன்றாற் சாரியை இயற்கை
(23)
க-து:	அரை என்னும் அளவுப் பெயர்வரின் மேல் எய்தியதனை விலக்குகின்றது.
பொருள்: மேற்கூறிய அளவைப் பெயர்களின்முன் அரை என்று சொல்லப்பட்டு வரும் ஒருபொருளின் செம்பாதியை வரைந்துணர்த்தும் சொல்லிற்கு இடையே, ஏ என்னும் சாரியை பெறும் இலக்கணம் ஒப்பதன்று எனக் கூறுவர் புலவர்.
எ-டு: உழக்கரை, செவிட்டரை; கழஞ்சரை, கஃசரை, தொடியரை, கொள்ளரை; ஒன்றரை, பத்தரை எனவரும் இவற்றுக்கு உம்மை விரித்துப் பொருள் கொள்க. கலவரை, செவிட்டரை என்பவற்றின் நிலைமொழித் திரிபை ஈண்டுப் ‘‘புரைவதன்று’’ என்பதனை மிகையாக்கி அதனான் முடிப்பார் உரையாளர். அவை (புள்ளிமய-24, குற்றுகரப்புண-20) அகத்தோத்தின் விதிப்படி முடிவனவாகலின்ஈண்டு அடக்குதல் வேண்டா என்க.