வேற்றுமை யாயின் ஏனை எகினொடு

தோற்றம் ஒக்கும் கன்னென் கிளவி

க-து:

பொருள் : வேற்றுமைப் பொருட்புணர்ச்சியாயின் கன் என்னும் சொல்,
பறவையை உணர்த்தும் எகின் என்னும்  சொல்லுக்குரிய  விதியொடு ஒத்து,
அகரம்  பெற்று,  வல்லெழுத்து  வரின்  மிக்கும், ஏனைக்  கணங்கள்வரின்
இயல்பாயும் புணரும்.
 

எ. டு:கன்னக்குடம், சாடி, தூதை, பானை எனவும் கன்னஞாற்சி, நீட்சி,
மாட்சி,  யாப்பு,  வன்மை   எனவும்   வரும்.   ‘தோற்றம்’  என்றதனான்
சிறுபான்மை கன்னந்தட்டு என மெல்லெழுத்து மிகுதலும் கொள்க.