கிளந்த அல்ல செய்யுளுள் திரிநவும்

வழங்கியல் மருங்கின் மருவொடு திரிநவும்

விளம்பிய இயற்கையின் வேறுபடத் தோன்றின்

வழங்கியல் மருங்கின் உணர்ந்தனர் ஒழுக்கல்

நன்மதி நாட்டத்து என்மனார் புலவர்

க-து :

பொருள்:  இவ்வதிகாரத்துக் கிளந்து  ஓதப்பட்டவை  யல்லாதனவாய்ச்
செய்யுளின்கண்   திரிந்து  முடிவனவும்,  இருவகை   வழக்கின்  கண்ணும்
வழங்குமிடத்தான் மருவித் திரிவனவும், இவ்வதிகாரத்துக் கூறிய  இலக்கண
மரபினின்று வேறுபடக்காணின் அவற்றை நல்லளவையாகிய ஆராய்ச்சியான்
வழக்கு  நடக்குமிடத்தை  உணர்ந்து,  கூறப்பெற்ற  இலக்கண  நெறியொடு
பொருந்த நடத்துக என்று கூறுவர் புலவர். மதி=அளவு,  ஒழுக்கல்  என்றது
கற்பிக்கும் ஆசிரியரை நோக்கிக் கூறியதாம்.
 

எ-டு:  (1) தடவுத்திரை - தடவுநிலைக்கொன்றை  என   அகர   ஈற்று
உரிச்சொல்  உகரம் பெற்று வந்தது. தடந்தோள் என மெல்லெழுத்து மிக்கு
வந்தது.
 

இங்ஙனம்   ஓசை   முதலாய    நயத்தானும்   ஒப்புமையாக்கத்தானும் இருவழியும் வேறுபட்டு வருவனவெல்லாம் இடம் நோக்கி அறிந்து கொள்க.
 

இன்னும் (சோழன்நாடு) சோணாடு (மலையமான்நாடு) மலாடு (பொதுவில்)
பொதியில் என்றாற் போல  எடுத்தோதானவாய்  வரும்  மரூஉ  மரபுகளை எல்லாம் இதனான் அமைத்துக் கொள்க.
 

குற்றியலுகரப் புணரியல் முற்றியது.

தொல்காப்பியம்-எழுத்ததிகாரம்

ஆராய்ச்சிக் காண்டிகையுரை நிறைந்தது.