புறஞ்செயச் சிதைதல் புலம்பித் தோன்றல்

கலங்கி மொழிதல் கையற வுரைத்தலொடு

புலம்பிய நான்கே ஆறென மொழிப

க - து :

பொருள் :புறஞ்செயச்  சிதைதல்,   புலம்பித்   தோன்றல்,   கலங்கி
மொழிதல்,  கையறவு   உரைத்தல்   எனப்   புலப்படுத்தப்பட்ட   நான்கு
பொருளும் ஆறாங் கூறென விளம்புவர் ஆசிரியர்.
 

இவை  களவியலுட்  கூறிய  நோக்குவவெல்லாம்  அவையே   போறல்
மறத்தல்,  மயக்கம்  (கள-9)  காட்சி   ஆசையிற்   களம்புக்குக்   கலங்கி
வேட்கையில்    மயங்கிக்   கையறு   பொழுதினும்,   (கள-17)   நொந்து
தெளிவொழிப்பினும், தமர்தற்காத்த காரண மருங்கினும், பொழுதும்  ஆறும்
புரைவதன்மையின்   அழிவுதலை   வந்த   சிந்தைக்  கண்ணும்,  (கள-21)
எனவரும்   கிளவி    முதலாயவற்றிற்குரியவாக   நிகழும்   மெய்பாட்டுப்
பொருள்கள்  என்பது  விளங்கப்  புலம்பிய  நான்கே  என்றார்.  புலம்பிய
என்றது புலஞ்செய்த என்றவாறாம். சொல்லிய எனினும் ஒக்கும். புலம்பல் -
சொல்லுதல், அறிவித்தல்.
 

1. புறஞ்செயச் சிதைதலாவது:  செவிலியும்  ஆயத்தாரும்   செய்யும்
ஒப்பனைகள் தலைவன் கண்டு  பயனுறாது  கழிதலைக்  கருதி  அவர்தாம்
ஒப்பனை செய்யும்வழி உள்ளம் சிதைந்து வருந்துதல். இஃது  அழுகைக்குப்
பொருளாக வரும். எடுத்துக்காட்டு வந்துழிக் கண்டு கொள்க.
 

2. புலம்பித் தோன்றலாவது:   தலைவியின்   நெஞ்சம்    தலைவன்
வழிச்சென்று இணைந்து நிற்றலான் பண்டுபோலக்  கலந்து  விளையாடாமல்
ஆயத்தாரிடையே இருந்தும் தான்தனியள் போலக் காணப்படுதல்.
 

இரும்பனந் தீம்பிழி உண்போர் மகிழும்

ஆர்கலி யாணர்த் தாயினும், தேர்கெழு

மெல்லம் புலம்பன் பிரியின் புல்லெனப்

புலம்பாகின்றே தோழி

எனவரும்.
 

இதுவும் அழுகைக்குப்  பொருளாக  அமையும். இளிவரல்  என்பதற்கும்
ஏற்கும்.
 

3. கலங்கி மொழிதலாவது :  தலைவன்  வரைபொருள்  முதலியவை
பற்றிப்   பிரிந்தமையான்   உற்ற   நிறையழிதுயரம்   காரணமாக   மறை
புலப்படாமாறு உளங்கலங்கிப் பேசுதல்.
 

நக்கு நலனும் இழந்தாள் இவளென்னும்

தக்கவிர் போலும், இழந்திலேன் மன்னோ

மிக்கவென் நாணும் நலனுமென் உள்ளமும்

அக்கால் அவனுழை ஆங்கே ஒழிந்தன்று

உக்காண், இஃதோர் உம்புயிர்க் கூற்றாகச்

செக்கரம் புள்ளித் திகிரி அலவனொடியான்

தக்கது பன்மாண் நினைந்து

எனவரும். இஃது இளிவரலுக்குப் பொருளாக அமையும்.
 

4. கையறவுரைத்தலாவது :  தனிமையுறுத்தும்    தாங்காத்   துயரான்
தடுமாறும் நெஞ்சினளாய தலைவி தனது அச்சமும் நாணும் மடனும் இகந்து
தானுற்ற அவலத்தைச் சுற்றமறியப் பேசுதல்.
 

நினையுமென் உள்ளம்போல் நெடுங்கழி மலர்கூம்ப

இனையுமென் நெஞ்சம்போல் இனங்காப்பார் குழல்தோன்ற

சாயஎன் கிளவிபோல் செவ்வழியாழ் இசைநிற்பப்

போயவென் ஒளியேபோல் ஒருநிலையே பகல்மாயக்

காலன் போல்வந்த கலக்கத் தோடென்றலை

மாலையும் வந்தின்றினி

என வரும்.
 

இதுவும் இளிவரலுக்குப்  பொருளாக  அமையும்.  கலங்கி  மொழிதலும்
கையறவுரைத்தலும்    அகனைந்திணைக்கண்    விரவும்   பெருந்திணைப்
பகுதிகளாகும்.