மூப்பே பிணியே வருத்தம் மென்மையொடு

யாப்புற வந்த இளிவரல் நான்கே

க - து :
 

பொருள் :திட்பமுறவந்த   இளிவரல்   என்னும்   மெய்ப்பாட்டிற்குக்
காரணமாகிய பொருள்  மூப்பும்  பிணியும்  வருத்தமும்  மென்மையுமாகிய
நான்குமாம் எனக் கூறுவர் புலவர்.
 

இவையும் இருபாலும் பற்றி வரும்.
 

1. மூப்பாவது :முதுமை.  அஃதாவது  புலன்கள்  பொறிவழி  நிகழாது
இளைத்தலும் எழிலும் இளமையும் கழிதலுமாம்.
 

வாழும் நாளொடு யாண்டுபல உண்மையின்

தீர்தல் செல்லாதென் உயிரெனப் பலபுலந்து

கோல்கா லாகக் குறும்பல ஒதுங்கி

நூல்விரித் தன்ன கதுப்பினள் கண்டுயின்று

முன்றிற் போகா முதிர்வினள் யாயும்

இது தனக்குற்ற மூப்புப்பற்றி வந்த இளிவரல்.
 

மூத்துத்தலை யிறைஞ்சிய நின்னொடு யானே

போர்த்தொழில் தொடங்க நாணுவல்

இது பிறர் மூப்புப்பற்றி வந்த இளிவரல்.
 

2. பிணியாவது நீங்காப் பசியும்  நேராத  காமமும்  உறங்கா நிலையும்
ஊறுசெய் நோயும் இவை போல்வன பிறவுமாம்.
 

ஊரலர் தூற்றுமிவ் வுய்யா விழுமத்துப்

பீரலர் போலப் பெரிய பசந்தன

நீரலர் நீலம்என அவர்க்கஞ் ஞான்று

பேரஞர் செய்த என்கண்

இது தன்கண் உற்ற நோய்பற்றி வந்த இளிவரல்.
 

சேயள் அரியோட் படர்தி

நோயை நெஞ்சே நோய்ப்பா லோயே

எனத்தன்  நெஞ்சினை   வேறுநிறுத்தித்  தலைவன்  கூறலின்  இது  பிறர்
கட்டோன்றிய பிணிபற்றி வந்த இளிவரலாம்.
 

3. வருத்தமாவது இடுக்கண்.அஃதாவது எளிதின் முடியாமல் அரிதின்
முயலும் முயற்சியான் வரும் துன்பம்.
 

மதுகை யின்றி வயிற்றுத்தீத் தணியத்

தாமிரந் துண்ணும் அளவை

ஈன்ம ரோஇவ் வுலகத் தானே

என்பது தனக்குற்ற வருத்தம் பற்றி வந்த இளிவரலாம்.
 

ஒன்றுஇரப்பான் போல்எளி வந்தும் சொல்லும்-உலகம்

புரப்பான் போல்வதோர் மதுகையு முடையன்

அன்னான் ஒருவன்றன் ஆண்டகை விட்டென்னைச்

சொல்லஞ் சொற்கேட்டி ...?

என்பது பிறர்க்குற்ற வருத்தங் காரணமாகப் பிறந்த இளிவரல்.
 

4. மென்மையாவது :   ஆற்றலும்      திறனும்     அமையாமையும்
வலியின்மையுமாம்.  மென்மை   எனினும்   நொய்மை  எனினும்  ஒக்கும்.
நல்குரவெண்பார்   இளம்பூரணர்,   அஃது   அழுகைக்குப்   பொருளாகக்
கூறினமையான் சாலாதென்க.
 

பன்மாயக் கள்வன் பணிமொழி யன்றோநம்

பெண்மை யுடைக்கும் படை

என்பது தன் மாட்டமைந்த மென்மைபற்றி வந்த இளிவரல்.
 

கடந்தடு தானை மூவிரும் கூடி

உடன்ற னிராயினும் பறம்புகொளற் கரிதே

என்பது பிறர் மென்மை பற்றி வந்த இளிவரலாம்.
 

"யாப்புற" என்றதனான் "யானை,  ஒருகை  உடையது  எறிவலோயானும்
இருகை சுமந்து வாழ்வேன்" எனப் பகைக்கு மென்மை  கற்பித்துக்  கூறலும்
இளிவரலாய் அடங்குமென்க.