(து - ம்,) என்பது, வினைவயிற் பிரிந்து சென்ற தலைமகன் குறித்த பருவத்து வாராமையால் வருந்திய தலைவியைத் தோழிநோக்கி 'அவர் குறித்த கார்ப்பருவம் இப்பொழுதுதான் தொடங்குகின்றது; காதலர் சேய்மைக் கண்ணே அயல்நாட்டிலிருப்பவராயினும், நம்மீது மிகு பேரன்புடையராதலின் தவிராது வருவர் நீ வருந்தாதே'யென வலியுறுத்திக் கூறாநிற்பது.
(இ - ம்.) இதனை, "பிறவும் வகைபட வந்த கிளவி" என்பதனால் (தொல். கற். 9) அமைத்துக் கொள்க.
| மலர்ந்த பெய்கைப் பூக்குற்று அழுங்க |
| அயர்ந்த ஆயங் கண்ணினிது படீஇயர் |
| அன்னையுஞ் சிறிதுதணிந்து உயிரினள் இன்னீர்த் |
| தடங்கடல் வாயில் உண்டுசில் நீரென |
| 5 | மயிலடி இலைய மாக்குரல் நொச்சி |
| மனைநடு மௌவலொடு ஊழ்முகை அவிழக் |
| காரெதிர்ந் தன்றாற் காலை காதலர் |
| தவச்சேய் நாட்டர் ஆயினும் மிகப்பேர் |
| அன்பினர் வாழி தோழி நன்புகழ் |
| 10 | உலப்பின்று பெறினும் தவிரலர் |
| கேட்டிசின் அல்லனோ விசும்பின் றகவே. |
(சொ - ள்.) தோழி வாழி மலர்ந்த பொய்கைப் பூ குற்று அழுங்க அயர்ந்த ஆயம் இனிது கண்படீஇயர் - தோழீ! வாழி அகன்று விரிந்த பொய்கையின் கண்ணுள்ள மலர்களைக் கொய்து வந்த துவட்சியால் வருந்திய தோழியர் குழாமெல்லாம் தம் மெய்ந்நோவொழிந்து இனிதாக வுறங்கவேண்டி; அன்னையும் சிறிது தணிந்து உயிரினள் - அன்னையும் நம்மீதுகொண்ட சினம் சிறிது தணிந்து உயிர்ப்புடையளாயினாள்; கார் இன் நீர் தடங்கடல் நீர் சில் என வாயில் உண்டு- அவள் அங்ஙனமாகிய பொழுது முகிலும் இனிய நீரையுடைய பெரிய கடலின் நீர் சில என்னும் படியாக வாயினாலுண்டு; மயில் அடி இலைய மா குரல் நொச்சி மனை நடு மௌவலொடு ஊழ்முகை அவிழ காலை எதிர்ந்தன்று - மயிலின் அடிபோன்ற கரிய கதிராகிய பூந்துணரையுடைய நொச்சி வேலியின்மீது இல்லின் நடுமுற்றத்தில் முளைகொண்டெழுந்த முல்லை கூரை மேலாலே சென்று படர்ந்து அவ்விரண்டும் முறையே அரும்பவிழ்ந்து மலருமாறு இன்று நாட்காலை எதிர்போந்து கார்ப்பருவம் செய்யலாகியது கண்டாய், அஃது அங்ஙனமாக; காதலர் தவச் சேய் நாட்டர் ஆயினும் - இப்பொழுது நங்காதலர் மிக்க சேய்மையின் கண்ணதாகிய நாட்டில் உறைபவராயினும்; மிக பேர் அன்பினர் உலப்பு இன்றுநன் புகழ் பெறினும் தவிரலர் - நம்பால் மிகப் பெரிய அன்புடையராதலின் அங்கே தாங்கொண்ட வினை முடித்தலால் அளவில்லாத புகழையடைவதாயினும் குறித்த பருவவரவின்கண் வாராது ஆண்டுறைபவரல்லர், அவர் வருமளவும் நீ வருந்தாதே கொள்!; இன்று விசும்பு அகவு கேட்டிசின் அல்லனோ - இன்றுதான் பருவந் தொடங்குகின்ற தென்பதன் குறியாக அம்மேக முழங்கு மிடியோசையை யான் கேளாநின்றேனல்லனோ? எ - று.
(வி - ம்.) மலர்தல் - விரிதல். குறுதல் - பறித்தல். உயிரினள் சினமடங்குழிப் பெருமூச்சு விடுதலுடையளாயினாள்.
நமது நிலையிலா இன்பத்தை மேற்கொண்டு நிலைத்த புகழையும் விரும்புகிலரெனத் தவப்பேரன்பினரென்பதனை வலியுறுத்தினாளென்பது.
இறைச்சி :- புறத்துள்ள நொச்சிவேலியின்மீது மனையகத் தெழுந்த மௌவல் சென்று படர்ந்து இரண்டும் மலராநிற்குமென்றது, அயனாட்டு அரசகுமாரனாகிய நின்காதலனொடு ஈண்டிம் மனையகத்துப் பிறந்த நீ சென்று கூடிமணந்து இருவரும் ஒருதன்மையான மகிழ்ச்சியீராய் மக்களொடு மகிழ்ந்து மனையறங்காத்து வைகுவிர் என்றதாம். மெய்ப்பாடு - பெருமிதம். பயன் - தலைவியை ஆற்றுவித்தல்.
(பெரு - ரை.) பொய்கை மலர்ந்த பூக்குற்று என மாறிப் பொய்கையின்கண் மலர்ந்த மலர்களைக் கொய்து எனினுமாம். இன்னீர் என்புழி காட்சிக்கினிய நீர் என்க. நொச்சியும் மௌவலும் முகையவிழ என்பது கருத்து. மனைநடு மௌவல் என்றது மனையின்கண் நட்டு வளர்க்கும் முல்லை என்றவாறு; உரையாசிரியர் இங்ஙனம் கூறாமல், நொச்சி வேலியின் மீது இல்லின் நடு முற்றத்தில் முளைகொண்டெழுந்த முல்லை கூரைமேலாலே சென்று படர்ந்து எனப் பெரிது இடர்ப்பட்டுரை கூறுதல் காண்க. விசும்பின் தகவு எனக் கண்ணழித்து அதற் கேற்ப வுரைப்பினுமாம்.
(115)