(து - ம்.) என்பது, அன்னை வெறியெடுக்கின்றாளெனத் தோழி தலைவியை அஞ்சுவித்து வெறியயருங்களத்தின்கண் அறத்தொடு நிற்குமாறு கூறியதுவும் ஆகும். (உரை இரண்டற்கும் ஒக்கும்.)
(இ - ம்.) இதனை, "நாற்றமும்" என்னும் நூற்பாவின்கண் 'களனும் பொழுதும் வரைநிலை விலக்கிக் . . . . .பிறவும் (தொல். கள. 23) என்பதன்கண் அமைத்துக்கொள்க.
| சுனைப்பூக் குற்றும் தொடலை தைஇயும் |
| மலைச்செங் காந்தள் கண்ணி தந்தும் |
| தன்வழிப் படூஉம் நம்நயந்து அருளி |
| வெறியென உணர்ந்த அரிய அன்னையைக் |
| 5 | கண்ணினுங் கனவினுங் காட்டி இந்நோய் |
| என்னினும் வாராது மணியின் தோன்றும் |
| அம்மலை கிழவோன் செய்தனன் இதுவெனின் |
| படுவண்டு ஆர்க்கும் பைந்தார் மார்பின் |
| நெடுவேட்கு ஏதம் உடைத்தோ |
| 10 | தொடியோய் கூறுமதி வினவுவல் யானே. |
(சொ - ள்.) தொடியோய் யான் வினவுவல் - தொடியினையுடையாய் யான் நின்னையொரு செயலை வினவுகின்றேன்; சுனைப்பூ குற்றும் தொடலை தைஇயும் மலைச் செங்காந்தள் கண்ணி தந்தும் - அதுதான் யாதெனிலோ?; கேள்! சுனையின்கணுள்ள மலர் கொய்தும் அவற்றை மாலையாகத் தொடுத்தும் மலையிலுள்ள செங்காந்தள் மலர்கொய்து அம்முருகவேள் போர்க்குச் சூடும் கண்ணியாக அமைத்தும் சார்த்தி; தன் வழிபடூஉம் நம் நயந்து அருளி - அவனை வழிபாடுசெய்கின்ற நம்மை ஆதரஞ் செய்யுமாறு விரும்பியருளி்; வெறி என உணர்ந்த அரிய அன்னையை - நாம் இப்பொழுது கொண்டிருக்கிற காமநோய் 'முருகு அணங்கியது காரணமாக வந்த இவள் மேனியின் வேறுபாடுதான் வெறியயர்ந்தால் நீங்கும்' என மாறாக நினைந்துடைய அம் மாறுபாடு எவ்வழியினாலும் நீங்கரிய நம் அன்னைக்கு; கண்ணினுங் கனவினும் காட்டி -கண்ணாலே குறிப்பாகக் காட்டுவதனோடு உறங்கும்பொழுது அவளது கனவின்கண்ணும் வந்து தோன்றித் தன்வடிவு புலப்படக்காட்டி; இந் நோய் என்னினும் வாராது - இக் காமநோய் என்னாலும் வேறுபிற அணங்குகளாலும் எய்தியதொன்றன்றுகண்டாய்; மணியின் தோன்றும் அம் மலை கிழவோன் இது செய்தனன் எனின் - வேறு யாவன் இதனைத் தோற்றுவித்தனன்கொல் என வினவின் 'நோக்குவோர்க்கு நீலமணி போலத் தோன்றாநிற்கும் அழகிய மலையையுடைய ஒருதோன்றலே இதனைச் செய்தனன்' என்று கூறுவானெனின்; படுவண்டு ஆர்க்கும் பைந்தர் மார்பின் நெடுவேட்கு ஏதம் உடைத்தோ - அதனாலே பொருந்திய வண்டுக ளாரவாரிக்கும் பசிய மாலையையணிந்த மார்பையுடைய அந் நெடிய முருகவேளுக்கு ஒரு குற்றமுமுண்டாகுமோ?; கூறுமதி - அதனை ஆராய்ந்து கூறிக்காண்; எ - று.
(வி - ம்.) அன்னையை: உருபுமயக்கம். கண்ணி - போர்க்குச் சூடும் பூ. தெய்வமாதலின் கனவினுங்காட்ட அமையும். ஞாயிற்றின் வெம்மையாலே வறளாது மழைபெய்து நிறம்பெறுதலின் மணிபோலத் தோன்றும் என்றதாம்.
இறைச்சி :- ஒன்றினேம் யாமென்று புகல்புக்க எம்மைக் கைவிட்ட அன்னோன் மலையாயிருந்தும், நீலமணிபோலத் தோன்றி விளங்காநிற்கும். இஃதென்ன வியப்போவெனப் பொருளின்புறத்தே தோன்றியதாம். மெய்ப்பாடு - பெருமிதம். பயன் - வரைவுகடாதல்.
(பெரு - ரை.) இதன்கண் முதல் துறைக்கு அன்னை களவொழுக்கத்தை அறியாதவளாய் வெறியாடமுயல்கின்றாள் அதனால் தலைவிக்கு வரும் ஏதம் பலவாம் ஆதலின் விரைந்து வரைந்து கொள்வாயாக என்பது குறிப்பெச்சமாகவும்,
இரண்டாவது துறைக்குத் தோழி தலைவியை நோக்கி அன்னை வெறியெடுக்க முயல்கின்றாள்; நீ தானும் மறைபுலப்படுத்தும் கருத்துடையையல்லை; இனி யாம் வாளாவிருத்தல் கூடாது; மறைபுலப்படுத்தல் வேண்டும். நின் கருத்தியாது என்று வினவுதல் குறிப்பெச்சமாகக் கோடல் வேண்டும்.
(173)