(து - ம்.) என்பது, சென்று வினைமுடித்துவந்த தலைமகன் பரத்தையொடு முயங்கியதறிந்து நொந்துபுலந்த தலைவியைத் தோழி நெருங்கி 'நீ தலைவனோடிருந்தும் வருந்துவதென்னென்றாட்கு அவள் அறியாதார்க்கு அங்ஙனமே தோன்றுமாயினும் அவன் பரத்தைமார்பின்கண்ணே தன்னை மடுப்பானாயினான்; என்னை அன்பின்றி முயங்குவானாதலின், அவன் முயக்கந்தான் யாது பயனுடையதாகு'மென்று வருந்திக்கூறாநிற்பது.
(சொ - ள்) இதற்கு,
| "கொடுமை யொழுக்கத்துத் தோழிக் குரியவை, |
| வடுவறு சிறப்பிற் கற்பிற் றிரியாமைக், |
| காய்தலு முவத்தலும் பிரித்தலும் பெட்டலும், |
| ஆவயின் வரூஉம் பல்வேறு நிலையினும்" (தொல். கற். 6) |
என்னும் விதிகொள்க. இதன்கண் காய்தலின் பாற்படுமென்க.
| கற்றை ஈந்தின் முற்றுக்குலை யன்ன |
| ஆளில் அத்தத் தாளம் போந்தைக் |
| கோளுடை நெடுஞ்சினை ஆண்குரல் விளிப்பிற் |
| புலியெதிர் வழங்கும் வளிவழங்கு ஆரிடைச் |
| 5 | சென்ற காதலர் வந்தினிது முயங்கிப் |
| பிரியாது ஒருவழி உறையினும் பெரிதழிந்து |
| உயங்கினை மடந்தை என்றி தோழி |
| அற்றும் ஆகுமஃது அறியா தோர்க்கே |
| வீழாக் கொள்கை வீழ்ந்த கொண்டி |
| 10 | மல்லல் மார்பு மடுத்தனன் |
| புல்லுமற் றெவனோ அன்பிலங் கடையே. |
(சொ - ள்.) தோழி ஈந்தின் கற்றை முற்றுக் குலை அன்ன ஆள் இல் அத்தத் தாளம் போந்தை - தோழீ! ஈந்தினது திரட்சியையுடைய முற்றிய குலைபோன்ற மக்களியங்காத நெறியின்கண்ணமைந்த தாளிப்பனையினது; கோள்உடை நெடுஞ்சினை ஆண்குரல் விளிம்பின் - குலைகளையுடைய நெடிய மடலிலிருந்து ஆண்பறவை தன் பெண்பறவையைக் கூவின்; புலி எதிர் வழங்கும் - அவ் வொலியைக் கேட்ட புலி எதிரோசை எழும்படி முழங்காநிற்கும்; வளி வழங்கும் ஆர் இடைச் சென்ற காதலர் - கோடைக்காற்று வீசுகின்ற அரிய நெறியிலே சென்ற காதலர்; வந்து இனிது முயங்கிப் பிரியாது ஒருவழி உறையினும் - மீண்டு வந்து இனிதாக நின்னை முயங்கி நீங்காது நீங்களிருவரும் ஓரிடத்தே உறையுங்காலையும்; பெரிது அழிந்து மடந்தை ! உயங்கினை என்றி - நீ பெரிதும் நெஞ்சழிந்து மடந்தையே ஏன் வருந்துகின்றனை? என்று கூறாநின்றனை; அஃது அறியாதோர்க்கு அற்றும் ஆகும் - அவ்வுண்மையை அறியாதவர்க்கு அத்தன்மையாகவேதான் காணப்படும்; வீழாக் கொள்கை வீழ்ந்த கொண்டிமல்லல் மார்பு மடுத்தனன் - நம் காதலன் முன்பு பிற மாதரை விரும்பாத கோட்பாட்டையுடையனாயிருந்து இப்பொழுது தன்னை விரும்பிய பரத்தையினிடத்துத் தன் வளப்பம் பொருந்திய மார்பை மடுப்பானாயினான், இங்ஙனம் பிறள் ஒருத்திபால் அன்பு வைத்தால் என்மாட்டு அவனுக்கு எவ்வண்ணம் அன்பு தோன்றும்?; அன்பு இலங்கடை புல்லு எவன்? - அன்பென்பது இல்லாதவழி என்னை அவன் தழுவிக் கொள்வதனாலும் யான் அவனைத் தழுவிக் கொள்வதனாலும் யாது பயன்படும்?; எ - று.
(வி - ம்.) கோள் - காய். கொண்டி - கொள்ளைகொள்ளும் பரத்தை.
இறைச்சி :- (1) ஈந்தின் முற்றுக்குலைபோன்றது தாளிப்பனங்குலையென்றது பரத்தையும் என்போலத் தலைமகனுக் குரியளாயினாளென்றதாம்.
இறைச்சி :- (2) தாளிப்பனைமடலி லிருந்து ஆண்பறவை பெண்பறவையை விளித்தால் புலி எதிரொலியெடுப்ப முழங்காநிற்குமென்றது - இல்லகத்திருக்கும் யான் கணவனை விரும்பி ஏற்பின் அயலே பரத்தை முழக்கத்தோடு தலைவனை அழையாநிற்கு மென்றதாம்.
மெய்ப்பாடு - அழுகை. பயன் - தலைவி புலவிகூர்தல்.
(பெரு - ரை.) கற்றை ஈந்தின் என்பது தொடங்கி . . . . .. உயங்கினை என்னுந் துணையும் தோழி கூற்றைத் தலைவிகொண்டு கூறினபடியாம். அவனுடைய வீழாக்கொள்கைகள் அணைத்து வீழ்ந்தன; இப்பொழுது அவன் மல்லல் மார்பு கொண்டு மடுத்தனன் எனப் பொருள் கோடலுமாம்.
(174)