(து - ம்.) என்பது, அங்ஙனம் வந்துமீளுந் தலைமகனைத் தோழி இவள் நின்பால் அன்புடையளாதலிற் பகலும் வருகின்றனை, இங்கு நீ வந்துபோவதனை எங்கள் ஐயன்மார் அறியின் இல்வயிற் செறிப்பராதலின், இரவில் வருவாயாக என்று கூறினவள் அவ்வண்ணம் நீ இரவில் வருவதற்கும் இவ்வூர் துறையின்கண்ணே இரவிலுந் துயிலாத அம்பற்பெண்டிரையுடையதா யிராநின்றதென அதனையு மறுத்து வரைவு தோன்றக் கூறாநிற்பது.
(இ - ம்.) இதற்கும் முன் செய்யுட்குக் கூறிய விதியேயாம்.
| இவள்தன், காமம் பெருமையிற் காலையென்னாள்நின் |
| அன்புபெரி துடைமையின் அளித்தல் வேண்டிப |
் | பகலும் வருதி பல்பூங் கானல் |
| இந்நீ ராகலோ இனிதால் எனின்இவள் |
| 5 | அலரின் அருங்கடிப் படுகுவள் அதனால் |
| எல்லி வம்மோ மெல்லம் புலம்ப |
| சுறவினங் கலித்த நிறையிரும் பரப்பின் |
| துறையினுந் துஞ்சாக் கண்ணர் |
| பெண்டிரும் உடைத்திவ் வம்பல் ஊரே. |
(சொ - ள்.) மெல்லம் புலம்ப இவள் தன் காமம் பெருமையின் காலை என்னாள் நின் அன்பு பெரிது உடைமையின் - மெல்லிய நெய்தல் நிலத்தலைவனே இவள் தன்னுடைய காமமிகுதியாலே இது காலைப் பொழுதாமே என்று கருதாளாகி நின்னாலே செய்யப்படும் அன்பைப் பெரிதும் பாராட்டுதல் உடைமையால்; அளித்தல் வேண்டிப் பகலும் பல் பூங் கானல் வருதி - இவளைத் தலையளி செய்யவேண்டி நீ பகற்பொழுதின் கண்ணும் பலவாய மலர்களையுடைய கழியருகிலுள்ள சோலையில் அன்று கொண்ட குறிவயின் வாராநின்றனை; இந் நீர் ஆகலோ இனிது எனின் - இங்ஙனம் நீயிர் இருவீரும் களவின் ஒழுகுதல் இனிதேயா மென்றாலோ; அலரின் இவள் அருங்கடிப் படுகுவள் - ஊரார் கூறும் பழி மொழியே காரணமாக இவள் மீள்வதற்கரிய சிறையின்கண்ணே படுத்தப் படா நிற்பள்காண்!; அதனால் எல்லி வம் - ஆதலின் இனி நீ இராப் பொழுதையில் இங்கு வருகுவாயாக!; (என்றலும் அவன் இரவிலும் வருவானேயன்றி வரைந்து எய்துவன் எனக் கொண்டு மீட்டும் சேர்ப்பனே!) இவ் அம்பல் ஊர் - நீ அங்ஙனம் இரவின் வருவையாயினும் பழிச்சொல்லை மேலேறட்டுக் கூறா நிற்கும் இவ்வூர்; சுறவு இனம் கலித்த நிறை இரும் பரப்பின் துறையினும் - சுறாமீனினம் மிக்க நிறைந்த கடற்பரப்பிலுள்ள துறையிடத்தும்; துஞ்சாக் கண்ணர் பெண்டிரும் உடைத்து - துயிலாத கண்ணினராகிய கொடிய மாதரையும் உடையராயிராநின்றது; ஆதலின் இரவின் வருதலினும் இடும்பை எய்தும் போலும்; எ - று.
(வி - ம்.) கடி - காவல். கலித்தல் - மிகுதல். வருதியென்றது வந்து மீள்வானை நோக்கிக் கூறியது: நிகழ்கால வினைமுற்று.
இரவுக்குறி நேர்வாள் போன்று எல்லிவம்மோ வென்றாள். இரவுவரின் அவர்கண்டு பூசலிட்டுத் தலைமகளை இல்வயிற் செறிப்பரென அறிவுறுத்த வேண்டி இவ்வூர் துறையிலே துஞ்சாக்கண்ணராகிய பெண்டிரையுடையது என்றாள், இஃது, அழிவில் கூட்டத் தவன் புணர்வுமறுத்தல்.
இறைச்சி :- சுறாமீனிருக்குங் கடலினது துறையிலே துஞ்சாத கண்ணையுடையரான மாதரை இவ்வூருடையதென்றது, தலைவியிருக்கின்ற மனையின்கண்ணே துஞ்சாத கண்ணளாகிய அன்னையை யாம் உடையேமாய் இராநின்றே மென்றதாம்.
மெய்ப்பாடு - பெருமிதம். பயன் - வரைவுகடாதல்.
(பெரு - ரை.) இவள்தானும் காமம் பெரிதுண்மையால் காலைப் பொழுதென்று கருதாளாய் நினக்கு உடன்பட்டு ஒழுகுகின்றாள்; நீதானும் அன்பு பெரிதுடைமையின் அவளை அளித்தற்குப் பகலென்று கருதாமல் வாராநின்றாய் என்பது கருத்து.
இன்னீர் ஆகலோ என்றும் பாடம் : இத்தன்மையீர் ஆதல் இனிதே யாம் என்க. எல்லி வருதற்கும் இடையூறாகத் துஞ்சாக்கண்ணராகிய பெண்டிரையும் உடைத்து ஆதலால் விரைந்து வரைந்துகோடலே அறிவுடைமையாம் என்றுணர்த்தியபடியாம்.
(223)