(து - ம்.)என்பது, தலைமகன் பொருள்வயிற் பிரிதலாலே வருந்திய தலைமகளை "நீ வருந்தாது வலிதிற் பொறுத்திருப்பா"யென்ற தோழியைநோக்கி அவள் "யான் எங்ஙனம் ஆற்றுவேன்! பொருள்வயிற் பிரிந்தோர் ஆண்டு என்னை நினைப்பாராயின் எனக்குப் புரையேறும்; அப்படியுஞ் செய்யார் போலு"மென்று அழிந்து கூறாநிற்பது.
(இ - ம்.) இதனையும், "ஆவயின் வரூஉம் பல்வேறு நிலை" என்பதனாற் கொள்க.
| உள்ளார் கொல்லோ தோழி கொடுஞ்சிறை |
| உள்ளடி பொறித்த வரியுடைத் தலைய |
| நீரழி மருங்கின் ஈரயிர் தோன்ற |
| வளரா வாடை உளர்புநனி தீண்டலின் |
| 5 | வேழ வெண்பூ விரிவன பலவுடன் |
| வேந்துவீசு கவரியிற் பூம்புதல் அணிய |
| மழைகழி விசும்பின் மாறி ஞாயிறு |
| விழித்திமைப் பதுபோல் விளங்குபு மறைய |
| எல்லை போகிய பொழுதின் எல்லுறப் |
| 10 | பனிக்கால் கொண்ட பையுள் யாமத்துப் |
| பல்லிதழ் உண்கண் கலுழ |
| நில்லாப் பொருட்பிணிப் பிரிந்திசி னோரே. |
(சொ - ள்.) தோழி கொடுஞ்சிறை உள் அடி பொறித்த வரி உடைத் தலைய நீர் அழி மருங்கின் - தோழீ! வளைந்த சிறகையுடைய பறவைகளின் உள்ளங்காற் சுவடு பொருந்திய வரிகளை மேற்கொண்டுள்ள நீர்வற்றிய இடங்கள் தோறும்; ஈர் அயிர் தோன்ற - மெல்லிய நுண்மணல் தோன்றாநிற்ப; வளரா வாடை உளர்பு நனி தீண்டலின் - மெல்லென வீசும் வாடைக்காற்று உளர்ந்து மிகவும் தீண்டுதலினாலே; வேழ் வெண்பூ விரிவன பல உடன் வேந்து வீசு கவரியின் பூம்புதல் அணிய - கரும்பின் வெளிய பூப் பலவும் ஒருசேர விரிவனவாய் அரசனுக்கு வீசப்படும் கவரிபோல மெல்லிய புதல்தோறும் அழகு செய்யா நிற்ப; மழை கழி விசும்பின் மாறி விழித்து இமைப்பதுபோல் ஞாயிறு விளங்குபு மறைய - மேகங்கள் நீங்கிச் செல்லுகின்ற ஆகாயத்தில் மாறி மாறி விழித்து மூடி இமைப்பதுபோல் ஞாயிறு தோன்றித் தோன்றி மறையாநிற்ப; எல்லை போகிய பொழுதின் எல் உற - பகற்காலஞ் சென்ற மாலைப் பொழுதோடு இராக்காலம் வந்து சேர்தலும்; பனிக் கால் கொண்ட பையுள் யாமத்து - பனி நிலத்தில் விழத்தொடங்கிய துன்பத்தைத் தருகின்ற நடு யாமத்தில்; பல் இதழ் உண்கண் கலுழ - இமையையுடைய மையுண்ட கண்கள் நீர் பெருகி வடியும்படி அழாநிற்ப; நில்லாப் பொருள் பிணிப் பிரிந்திசினோர் - நிலைநில்லாத பொருளை ஈட்டுதலில் உள்ளம் பிணிப்புண்டு எம்மைப் பிரிந்து சென்ற காதலர்; உள்ளார் கொல் - இப்பொழுது யாம் படுந்துயரைக் கருதினாரேல், புரையேறல் தும்மல் முதலியவற்றால் அறிந்து இனி அவர் வருவர் போலுமென ஆற்றியிருப்பேமன்றோ? அங்ஙனம் இன்மையால் கருதியிருப்பாரல்லரோ? எ - று.
(வி - ம்.) கொடுஞ்சிறை: பறவைக்குச் சினையாகுபெயர். வேழம் - பேய்க் கரும்புமாம்.
நிலைநில்லாப் பொருள் பிணித்தலானே நிலைபெறக் கைவந்த இன்பத்தை நீத்துச் சென்றவராதலின், அறவரல்லரெனவும், அங்ஙனம், அறவரல்லாதார்க்குச் செய்ந்நன்றி மறப்பது இயல்பாதலிற் பண்டு நாம் பாலித்த நலனுண்டு துறந்து நம் காதலர் நம்மை உள்ளாருமாயினார் போலு மெனவுங் கொண்டு கூறினாளென்பது. கைகோள் - கற்பு. மெய்ப்பாடு - அழுகை. பயன் - அயாவுயிர்த்தல்.
(பெரு - ரை.) தொலைவிலுள்ள அன்புடையா ரொருவர் நினைத்துழி அன்பு செயப்பட்டார்க்குத் தும்மல் முதலியன தோன்றும் என்பது ஒரு நம்பிக்கை. இதனை,
| "வழுத்தினாள் தும்மினே னாக அழித்தழுதாள் |
| யார்உள்ளித் தும்மினீர் என்று" (குறள் - 1317 ) |
எனவருந் திருக்குறளானும் உணர்க.
(241)