(து - ம்) என்பது, வினைவயிற் பிரிந்த தலைமகன் குறித்த பருவத்து வந்திலனென்று கவன்ற தலைமகளைத் தோழி நெருங்கி, மடந்தாய்! சென்று வினைமுடித்தமையால் உடன்சென்றிருந்த வீரர் பலரும் மலர்சூடி வந்தனர்காண்; நம் காதலரும் இப் பனிக்காலத்து ஆண்டுத் தங்கி வருந்தாது இன்னே வருவரென்று கூறுபவள் உள்ளுறையால் நீ துன்புறாது இல்லறம் நிகழ்த்துவாயாக வென்றும் ஆராய்ந்து கூறாநிற்பது.
(இ - ம்) இதனை, "பிறவும் வகைபட வந்த கிளவி" (தொல். கற். 9) என்பதனாற் கொள்க.
| கொடுங்கண் காக்கைக் கூர்வாய்ப் பேடை |
| நடுங்குசிறைப் பிள்ளை தழீஇக் கிளைபயிர்ந்து |
| கருங்கண் கருனைச் செந்நெல்வெண் சோறு |
| சூருடைப் பலியொடு கவரிய குறுங்கால் |
| 5 | கூழுடை நன்மனைக் குழுவின இருக்கும் |
| மூதில் அருமன் பேரிசைச் சிறுகுடி |
| மெல்லியல் அரிவைநின் பல்லிருங் கதுப்பிற் |
| குவளையொடு தொடுத்த நறுவீ முல்லைத் |
| தளையவிழ் அலரித் தண்நறுங் கோதை |
| 10 | இளையருஞ் சூடி வந்தனர் நமரும் |
| விரியுளை நன்மா கடைஇப் |
| பரியாது வருவர்இப் பனிபடு நாளே. |
(சொ - ள்) கொடுங் கண் காக்கைக் கூர்வாய்ப் பேடை - வட்டமாகிய கண்களையும் கூரிய வாயையும் உடைய காக்கைப் பேடை; நடுங்கு சிறைப் பிள்ளை தழீஇ - நடுங்குகின்ற சிறகையுடைய தன் பிள்ளையைத் தழுவிக் கொண்டு; கிளை பயிர்ந்து - சுற்றத்தையும் விளித்து; கருங் கண் கருனைச் செந் நெல் வெள்சோறு சூர் உடைப் பலியொடு கவரிய - கரிய கண்ணையுடைய கருனைக் கிழங்கின் பொரிக் கறியோடு கூடிய செந்நெல் அரிசியாலாக்கிய வெளிய சோற்றுத் திரளையைத் தெய்வத்துக்கிடும் பலியுடனே கவர்ந்து கொள்ளுமாறு; குறுங் கால் கூழ் உடை நல் மனைக் குழுவின இருக்கும் - குறிய கால் நாட்டிக் கட்டிய மிக்க உணவையுடைய நல்ல மனையின்கண்ணே கூடினவாயிருக்கும்; மூதில் அருமன் பேர் இசைச் சிறுகுடி - பழைமையான வீடுகளையுடைய அருமன் என்பவனது பெரிய புகழ் பொருந்திய சிறுகுடி என்னும் ஊரிலிராநின்ற; மெல் இயல் அரிவை - மெத்தென்ற சாயலையுடைய அரிவையே!; நின் பல் இருங் கதுப்பின் குவளையொடு தொடுத்த நறு வீ முல்லைத் தளை அவிழ் அலரி - நினது பலவாகிய கரிய கூந்தலிற் சூடிய மாலை போலக் குவளை மலரொடு இடையிட்டுத் தொடுத்த நறிய பூவையுடைய முல்லையின் மூட்டுவாய் அவிழ்ந்த மலராகிய; தண் நறுங் கோதை - தண்ணிய நன்மணமுடைய பூமாலையை; இளையரும் சூடி வந்தனர் - உடன் சென்றிருந்த வீரரெல்லாருஞ் சூடி வந்தனர்; இப் பனி படு நாள் நமரும் பரியாது - அதனால் இப் பனி மிக்க பருவத்திலேதானே நங்காதலரும் ஆண்டுத் தங்கி வருந்தாது; விரி உளை நல் மா கடைஇ வருவர் - விரிந்த பிடரிமயிரையுடைய நல்ல குதிரையைச் செலுத்திக் கொண்டு இன்னே வருகுவர்; ஆதலின் வருந்தாதே கொள்! எ - று.
(வி - ம்) சிறுகுடிபோன்ற அரிவையெனினுமாம்.
வினைமுடித்த மகிழ்ச்சிகூறக் கேட்டவளவே ஆற்றுமாதலின் அது தோன்ற வீரர் மலர்சூடிவந்தன ரென்றாள். அவ் வினை முடித்தலிற் சோர்விலரென்பது குறிப்பிப்பாள் பரியாது வருவரென்றாள்.
உள்ளுறை :-காக்கையின் பெடை தன் பார்ப்பைத் தழுவிக் கொண்டு சோற்றுப்பலியைக் கவரவேண்டிக் கிளையையழைத்து மனையின்கண்ணே சூழ்ந்திருக்குமென்றது, நீயும் நின்மகவைத் தழுவினையாகிக் கேள்வன் கொணருகின்ற நிதியத்தை ஆர்த்துமாறு சுற்றத்தாரை யழைத்துச் சூழ இருத்தி மனையறம் நிகழ்த்துவாயாக என்றதாம். கைகோள் - கற்பு. மெய்ப்பாடு - பெருமிதம். பயன் - தலைவியை ஆற்றுவித்தல்.
(பெரு - ரை) அருமன் - சிறுகுடி என்னும் ஊரிலுள்ள பெருங்குடித் தோன்றல்; இவனைக் 'கள்ளில் ஆத்திரேயனார் என்னும் நல்லிசைப் புலவரும்' "ஆதியருமன் மூதூ ரன்ன" எனப் பாராட்டியிருத்தலைக் குறுந்தொகை (2")க்கண் காண்க.
(367)