(து - ம்.) என்பது, வரைபொருட் பிரிந்துவந்த தலைவனைத் தோழி நீ முன்னர் இரவின் வந்து முயங்கியதனாலாய குறிப்புக்களைக் கண்ட அன்னை வினவலும் இவள் விடைகூற அறியாளாய் என்னை நோக்கினளாக, யான் சந்தனவிறகின் கொள்ளியைக் காட்டி இதனாலுண்டாயினவென் றுய்வித்தே னெனத் தானாற்றுவித்திருந்த அருமை தோன்றக் கூறாநிற்பது.
(இ - ம்.) இதற்கு, "வரைவுடம் பட்டோற் கடாவல் வேண்டினும்" (தொல்-கள- 23) என்னும் விதி கொள்க,
| ஓங்குமலை நாட ஒழிகநின் வாய்மை |
| காம்புதலை மணந்த கல்லதர்ச் சிறுநெறி |
| உறுபகை பேணாது இரவின் வந்திவள் |
| பொறிகிளர் ஆகம் புல்லத் தோள்சேர்பு |
| 5 | அறுகாற் பறவை அளவில மொய்த்தலிற் |
| கண்கோ ளாக நோக்கிப் பண்டும் |
| இனையை யோவென வினவினள் யாயே |
| அதனெதிர் சொல்லா ளாகி அல்லாந்து |
| என்முக நோக்கி யோளே அன்னாய் |
| 10 | யாங்குணர்ந் துய்குவள் கொல்லென மடுத்த |
| சாந்த ஞெகிழி காட்டி |
| ஈங்கா யினவால் என்றிசின் யானே. |
(சொ - ள்.) ஓங்கு மலை நாட நின் வாய்மை ஒழிக - ஓங்கிய மலைநாடனே ! நீ கூறும்வாய்மைகள் எல்லாம் இப்படியே பொய்த்தொழிவனவாகுக !; காம்பு தலை மணந்த கல் அதர்ச் சிறுநெறி உறுபகை பேணாது - மூங்கில்கள் நெருங்கிய கற்பாறை நெறியாகிய சிறிய வழியில் இரைதேடியுழலுகின்ற வேங்கை முதலாயமிக்க பகையைப் பொருட்படுத்தாது; இரவின் வந்து இவள் பொறி கிளர் ஆகம் புல்லத் தோள் சேர்பு அறுகால் பறவை அளவு இல மொய்த்தலின் - இரவிடைவந்து இவளது திருவிளங்கிய மார்பை முயங்கி மகிழ, அதனால் உண்டாகிய புதுமணத்தைக் கருதி இவளுடைய தோளைச்சார்ந்து வண்டுகள் அளவில்லாதன மொய்த்தலினாலே; யாய் கண் கோள் ஆக நோக்கிப் பண்டும் இனையையோ ? என வினவினள் - எம் அன்னை தன் கண்களாலே கொல்லுபவள் போல் நோக்கி "நீ இதன் முன்னும் இப்படி வண்டுகளால் மொய்க்கப்பெற்ற தோளினையுடையையோ?" என்று வினவினள்; அதன் எதிர் சொல்லாள் ஆகி அல்லாந்து என்முகம் நோக்கியோள் - அங்ஙனம் வினவலும், இவள் அதற்கு எதிர்மொழி சொல்ல அறியாளாய் வருத்தமுற்று என் முகத்தை நோக்கி நின்றாள்; யாங்கு உணர்ந்து உய்குவள் கொல் என - அதனை அறிந்த யான் இவள் எப்படி ஆராய்ந்து மறைத்துக் கூறி யுய்குவள் என்றெண்ணி அன்னையை நோக்கி; மடுத்த சாந்தம் ஞெகிழி காட்டி-அடுப்பிலிட்ட சந்தன விறகின் கொள்ளியை எடுத்துக் காட்டி; அன்னாய் ஈங்கு ஆயின என்றிசின் - அன்னாய் ! இவ்விறகினை அடுப்பிலிடுதலும் இதிலுள்ள சுரும்புகள் இவளுடைய தோளில் மொய்க்கின்றன காண் ! என மறைத்துக் கூறினேன்; இங்ஙனம் எத்துணை நாள் நீ வரைந்து கொள்ளுதல் காரணமாகப் பொய்கூறி யுய்விப்பது ? (எ - று)
(வி - ம்.) காம்பு - மூங்கில். ஞெகிழி - கொள்ளி. கோள் - கொலை, வாய்மை - இகழ்ச்சிக் குறிப்பு; குறித்த பருவங்கடந்து வருதலின். இஃது அழிவில் கூட்டத் தவன்புணர்வு மறுத்தல்.
புதுமண நோக்கி வண்டு மொய்த்தலை அன்னை யறிந்துடையளாதலிற் கண்கோளாக நோக்கி எனக் கூறினாள். களவொழுக்கம் நீட்டித்திருக்குங் கொலென்னும் ஐயமுடையாளாதலிற் பண்டும் இனையையோவென வினவினளென்றாள். இவை படைத்து மொழி கிளவி; விரைவில் வரைந்து கொள்ளவேண்டி யென்க. பின்னது செவிலி தோழியை வினாயதைக்கொண்டு கூறியது. மெய்ப்பாடு - அச்சத்தைச் சார்ந்த பெருமிதம். பயன் - வரைவு கடாதல்.
(பெரு - ரை.) தலைவன், உதோ அணுமையிலேயே வரைந்து கொள்வல் வரைந்து கொள்வல் என்று பின்னரும் வரைந்து கோடலிற் கருத்தின்றிக் களவின்பமே காமுற்று வருதலின் நின் வாய்மை ஒழிக என்றாள். என்முக நோக்கினள் என்றது கட்டுரையின்மை என்னும் மெய்ப்பாடு.
(55)