ஆசிரியர் பெயர் தெரியவில்லை. (பி-ம்.) 2. ‘மமர்ந்த’, ‘மாந்த’; 3. ‘கான்பின்பட’; 7. ‘கழிதலானா’; 8. ‘றெரியிழை கண்ணே’.
(ப-ரை.) பூ குழையோய் - பொலிவை உடைய குழையை அணிந்தோய், மணிவார்ந்தன்ன - நீல மணி ஒழுகினாற் போன்ற, மா கொடி அறுகை - கரிய கொடியாகிய அறுகினது, பிணி கால் மெல் கொம்பு - பிணிப்பு நீங்கிய மெல்லிய தண்டை, பிணையொடும் ஆர்ந்த - பெண் மானோடு வயிறு நிரம்ப உண்ட, மான் ஏறு உகளும் - ஆண் மான் துள்ளுகின்ற, கானம் பின்பட - காடு பின்னாகச் சென்று, வினை நலம் படீஇ வருதும் - தொழில் நன்மை உண்டாகப் பெற்று மீண்டு வருவேம்; அ வரை - அக்காலத்தளவும், தாங்கல் ஒல்லுமோ - நின்னாற் பொறுத்திருத்தல் இயலுமோ? என சொல்லா முன்னர் - என்று நாம் சொல்லாமைக்கு முன்னமே, தெரிவை கண் - தலைவியின் கண்கள், நில்லா ஆகி - பழைய நிலையில் நில்லாமல் கலங்கி, நீர் விலங்கு அழுதல் ஆனா - நீரால் மாறுபடுதலை உடைய அழுகை அமையாவாகி, தேர் விலங்கின - எம் தேரைத் தடை செய்தன.
(முடிபு) ‘பூங்குழையோய், கானம் பிற்பட வினைநலம் படீஇ வருதும்; தாங்கல் ஒல்லுமோ? எனச் சொல்லா முன்னர், தெரிவை கண்அழுதல் ஆனாவாகித் தேரை விலங்கின.
(கருத்து) தலைவி என் பொருட்பிரிவுக்கு உடம்படாமையின் யான் செல்லேன்.
(வி-ரை.) மணி - நீலமணி. பிணி என்றது அறுகினது இலை இளைதாக இருக்குங்கால் அமைந்துள்ள முறுக்கு. மென் கொம்பாதலின் ஆர்ந்தது. கானம் பிற்பட என்றது கானத்தைக் கடந்தென்றபடி. ஆண்டுச்செல்வேனாயினும் பிணைமானும் மானேறும் ஒன்றுபட்டு உகளும் காட்சி கண்டு மேற் செல்லாது மீள்வேன் என்பது குறிப்பு.
வினைநலம்படுதல் - பொருள் முயற்சி முற்றுப் பெறுதல். வரை என்றது அளவு; அஃது ஈண்டுக் கால அளவு குறித்தது. தாங்கல் - பிரிவினால் உண்டாகும் துன்பங்களைப் பொறுத்தல். பூங்குழை - பூத்தொழில் அமைந்த குழை எனினுமாம்.
நீர் விலங்கு அழுதல் - நீர் கண்ணில் உள்ள பாவையை மறைக்கின்ற அழுகை என்பதும் ஆம்; "பாவை மாய்த்த பனிநீர் நோக்கமொடு" (அகநா. 5:21.)
கண் தேர் விலங்கினவென்று கூறினும், அவள் அழுதல் கண்டு நான் செலவு தவிர்ந்தேன் என்பது கருத்து. தெரிவை: தலைவி என்னும் பொருட்டாய் நின்றது.
ஒப்புமைப் பகுதி 1. அறுகின் கொடிக்கு நீலமணி: "பழங்கன்று கறிக்கும் பயம்பம லறுகைத், தழங்குகுரல் வானின் றலைப்பெயற் கீன்ற, மண்ணுமணி யன்ன மாயிதழ்ப் பாவை" (அகநா. 136:11-3.)
2-3. பிணையும் மானும் உகளுதல்: குறுந். 65:1-3, ஒப்பு. பிணையும் மானேறும்: குறுந். 319:1. 1-3. அறுகம்புல்லை மான் பிணையோடு உண்ணல்: அகநா. 23:7-9; பு.வெ. 277.
5. காமந் தாங்குதல்: குறுந். 241:1. தாங்கல் ஒல்லுமோ: அகநா. 333:5.
(256)