பரணர். (பி-ம்.) 1. ‘வாரலோ வாரலெஞ்சேரி’; 2. ‘பெருமா காவிரி’; 4. ‘சேந்தனுறந்தை’; 5. ‘அரியரி லம்புகவிளங்கோட்டு வேட்டை’; 7. ‘தொழுதன கண்ணே’.
(ப-ரை.) பெரும-, காவிரி பலர் ஆடு பெருதுறை - காவிரி நதியினது பலர் நீராடுகின்ற பெரிய நீர்த்துறையின்கண் வளர்ந்த. மருதொடு பிணித்த - மருத மரத்தில் கட்டிய, ஏந்து கோடு யானை - மேல் உயர்ந்த கொம்பை உடைய யானைகளை உடைய, சேந்தன் தந்தை - சேந்தனுடைய தந்தையும், அரியலம்புகவின் - கள்ளாகிய உணவையும், அம் தோடு வேட்டை - அழகிய விலங்குத் தொகுதியை வேட்டையாடும் தொழிலையும், நிரையம் ஒள்வாள் - பகைவருக்கு நரக வாழ்வைப் போன்ற துன்பத்தைத் தரும் ஒள்ளிய வாளையும் உடைய, இளையர் பெருமகன் - இளைய வீரர்களுடைய தலைவனுமாகிய, அழிசி ஆர்க்காடு அன்ன - அழிசியினது ஆர்க்காடென்னும் நகரத்தைப் போன்ற, இவள் பழி நீர் மாண் நலம் - இவளது குற்றந் தீர்ந்த மாட்சி மைப்பட்ட அழகு, தொலைதல் கண்டு - அழிதலைக் கண்ட பின், எம் சேரி - எமது சேரிக்கண், வாரல் - வருதலை யொழிவாயாக; நின் தார் தாரல் - நின் மாலையைத் தருதலை யொழிக; அலர் ஆகின்று - பழிமொழி உண்டாகின்றது.
(முடிபு) பெரும, இவள் நலம் தொலைதல் கண்டு வாரல்; தாரல்.
(கருத்து) நீ ஈண்டு வாரற்க.
(வி-ரை.) இவள் நலம் தொலைதல் கண்டாய்; இனி இவள்பால் நினக்கு இன்பம் பிறவாது; ஆதலின் வாரற்க என்று வாயில் மறுத்தாள்.
அலர் - பரத்தையர் கூறும் பழிமொழி; ‘தலைவி தலைவனைத் தன்பாலே இருத்திக் கொண்டாள்' எனக் கூறுவது. ஆற்றங்கரைகளிலும் துறைகளிலும் மருத மரங்களை வளர்த்தல் வழக்கம்.
அரியலம் புகவு: அம் சாரியை. புகவு - உணவு; புகா என்பதன் விகாரம். அரியலம் புகவின் இளையரென்க. இது வீர பானம்; "கள்ளி னிரும்பைக் கலஞ்செல வுண்டு" (மதுரைக். 228) என்பதையும் அதன் உரையையும் பார்க்க. தோடு - விலங்கின் தொகுதி. நிரைய வொள்வாள் -பகைவருக்கு நரக வேதனையை உண்டாக்கும் ஒள்ளிய வாள்;
| "நிரைகளி றொழுகிய நிரைய வெள்ளம்" (பதிற். 15:4.) |
| "நிரயத் தானை" (சிலப். 26:37.) |
என்பவற்றின் உரையைப் பார்க்க.
சேந்தன் என்பவனுடைய தந்தை அழிசி என்பதும் அவனுக்கு ஆர்க்காடு உரியது என்பதும்,
| "நோவினி வாழிய நெஞ்சே மேவார் |
| ஆரரண் கடந்த மாரி வண்மகிழ்த் |
| திதலை யெஃகிற் சேந்தன் றந்தை |
| தேங்கமழ் விரிதா ரியறே ரழிசி |
| வண்டுமூசு நெய்த னெல்லிடை மலரும் |
| அரியலங் கழனி யார்க்கா டன்ன |
| காமர் பணைத்தோ ணலம்வீ றெய்திய |
| வலைமான் மழைக்கட் குறுமகள் |
| சின்மொழித் துவர்வாய் நகைக்குமகிழ்ந் தோயே" (நற். 190) |
என்னும் பாட்டினாலும் அறியப்படுகின்றன.
இரண்டாவது கருத்து: ‘வாரல் எம் சேரி; தாரல் நின்தார்; இவள் நலம் தொலைதல் கண்டு அலராகின்று' என்று கூட்டி, ‘எமக்கு நீ வருதலும் நின்தார் தருதலும் உடன்பாடல்லவேனும். ஊரினர் கூறும் பழிமொழியை அஞ்சினேம்; ஆதலின் நினக்கு உடம்பட்டேம்' எனக் கூற்றெச்சம் வருவித்துரைக்க.
ஒப்புமைப் பகுதி 1. சேரி: குறுந். 231:1.
தலைவி தலைவனது தாரை விரும்பாமை: "பல்லார்தோடோய்ந்து வருதலாற் பாய்புனல், நல்வய லூரநின் றார்புலால்" (தொல். கிளவி.56, ந. மேற்.); "ஒல்லேங் குவளைப் புலாஅன் மகன்மார்பிற், புல்லெருக்கங்கண்ணி நறிது" (தொல். கிளவி.55, சே. மேற்.)
2. அலராகின்றது: ஐங். 132:3; அகநா. 96:18.
ஆகின்று: குறுந். 15:4, ஒப்பு.
3. பெருந்துறை மருது: "உளைப்பூ மருதத்துக் கிளைக்குரு கிருக்கும், தண்டுறை", "முடமுதிர் மருதத்துப் பெருந்துறை", "மருதுயர்ந் தோங்கியவிரிபூம் பெருந்துறை", "கரைசேர் மருதம்" (ஐங். 7:4-5, 31:3, 33:2, 74:3); "திருமருத முன்றுறை", "திருமருத நீர்ப்பூந் துறை", "தீம்புனல் வையைத் திருமருத முன்றுறையால்", "திருமருத முன்றுறை முற்றங் குறுகி" (பரி. 7:83, 11:30, 22:45, திரட்டு, 2:72); "திசை திசை தேனார்க்குந் திருமருத முன்றுறை" (கலி. 26:13); "வருபுனல் வையை வார்மண லகன்றுறைத், திருமரு தோங்கிய விரிமலர்க் காவின்", "துறையணி மருதமொடு" (அகநா. 36:9-10, 97:19); "உயர்சினை மருதத் துறை" (புறநா. 243:6); "வருபுனல் வையை மருதோங்கு முன்றுறை" (சிலப். 14:72.)
5-6. "மட்டப் புகாவிற் குட்டுவ ரேறே" (பதிற். 90:26.)
8. மாணலம்: குறுந். 74:5, ஒப்பு.
(258)