இதுவுமது.
பெயர் : கரைவாய்ப் பருதி. 1 - 7. இழையர்.........சுரத்தலின். உரை : இழையர் குழையர் நறுந் தண் மாலையர் -இழையினையும்
குழையினையும் நறிய தண்ணிய மாலையினையும் ; சுடர் நிமிர் அவிர்
தொடி செறித்த முன் கை - ஒளி மிக்கு விளங்குகின்ற தொடியைச்
செறிய அணிந்த முன் கையினையும்; திறல் விடு திருமணி - மிக்க
வொளி திகழும் அழகிய மணி மாலை கிடந்து; இலங்கு மார்பின் -
விளங்குகின்ற மார்பினையுமுடைய; வண்டுபடு கூந்தல் - வண்டு
மொய்க்கும் கூந்தலை ; முடி புனை மகளிர் - கொண்டையாக
முடித்துக் கைசெய்து கொண்டுள்ள பாடல் மகளிர் ; தொடைபடு பேர்
யாழ் - நரம்புத் தொடையினையுடைய பேரியாழின்கண் ; பாலை
பண்ணி - பாலைப் பண்ணையமைத்து; பணியா மரபின் உழிஞை பாட
- பகைவர்க்குப் பணியாத முறைமையினையுடைய உழிஞைத் திணைச்
செயலைப் புகழ்ந்து பாட ; இனிது புறந் தந்து -அவர்களை நன்கு
ஓம்பி ; அவர்க்கு இன் மகிழ் சுரத்தலின் - அவர்கட்கு இனிய
மகிழ்ச்சியினைத் தன் கொடையாலும் முகமலர்ச்சியாலும் செய்தலாலே
எ - று. இழையரும் குழையரும் மாலையரும் ஆகிய மகளிர் பாட என
இயையும். முன் கையினையும் மார்பினையுமுடைய மகளிர் என
முடிக்க. |