:: TVU ::

550

பால காண்டம்

879.	திணி ஆர் சினை மா மரம் யாவையும் செக்கர் பாய. தணியாத நறுந் தளிர் தந்தன போன்று தாழ. அணி ஆர் ஒளி வந்து நிரம்பலின். அங்கம் எங்கும். மணியால் இயன்ற மலை ஒத்தது - அம் மை இல் குன்றம்.
திணி ஆர் சினை - வலிமையான கிளைகள் கொண்ட; மா மரம் யாவையும் - பெரிய மரங்கள் யாவும்; செக்கர் பாய - செவ்வானத்தின் ஒளி வீசுவதால்; தணியாத நறுந்தளிர் - குறையாத சிறந்த தளிர்கள்; ஈன்றன போன்று தாழ - புதிதாகத் தழைத்தன போல விளங்க; அங்கம் எங்கும் - தன்னுடல் முழுவதும்; அணி ஆர் ஒளி - அழகிய அந்தச் செந்நிற ஒளி; வந்து நிரம்பலின் - வந்து நிறைவதால்; அம்மை இல் குன்றம் - குற்றமற்ற அந்த மலையானது; மணியால் இயன்ற - செந்நிறமுள்ள மணிகளால் இழைக்கப் பெற்றுள்ள; மலை ஒத்தது - மலையை ஒத்தது. செவ்வானம் வீசப் பெறுவதால் செந்தளிர் புதிதாக உண்டாகப் பெற்றால் போன்ற பல மரங்கள் கவிந்த அந்தச் சந்திரசயிலம் செம்மணி கொண்டு இழைக்கப் பெற்றது போல் விளங்கிற்று என்பது - தற்குறிப்பேற்றவணி. 37
880.	கண்ணுக்கு இனிது ஆகி விளங்கிய காட்சி யாலும். எண்ணற்கு அரிது ஆகி இலங்கு சிரங்க ளாலும். வண்ணக் கொழுஞ் சந்தனச் சேதகம் மார்பு அணிந்த அண்ணல் கரியோன்தனை ஒத்தது - அவ் ஆசு இல் குன்றம்.*
கண்ணுக்கு இனிது ஆகி- கண்களுக்கு அழகுடையதாகி; விளங்கிய காட்சியாலும் - தோன்றுகின்ற தோற்றப் பொலிவாலும்; எண்ணற்கு அரிது ஆகி - எண்ணுவதற்கு அரிதாகுமாறு; இலங்கு சிரங்களாலும் - (ஆயிரக் கணக்கில்) விளங்கும் முடிகளாலும்; வண்ணம் - அழகு சேர்ந்ததாகிய; கொழுஞ் சந்தனச் சேதகம் - வளமான சந்தனக் குழம்பை; மார்பு அணிந்த - (தன்) மார்பில் அணிந்த; அண்ணல் கரியோன்தனை - பெருமையுள்ள திருமாலை; அவ் ஆசு இல் - அந்தக் களங்கம் இல்லாத; குன்றம் ஒத்தது - குன்றமானது ஒத்திருந்தது.