வரிகொள் ஒண்சிலை வயவர் - கட்டமைந்த ஒள்ளிய வில்லை
உடைய வீரர்கள்;  தம் கணிச்சியின் மறித்த - தம்முடைய கோடாலிப்
படையால் வெட்டி வீழ்த்திய;  பரியகால் அகில் கூட - பருத்த கரிய
நிறமுள்ள அகில் கட்டையைச் சுடுதலால்;  நிமிர் பசும்புகைப்படலம் -
மேல் செல்லுகின்ற அடர்ந்த புகைத் தொகுதி;  அரிய வேதியர் ஆகுதிப்
புகையொடும் அளவி - சொல்லுதற்கரிய புகழ் படைத்த அந்தணர்களது
ஓம குண்டத்திலிருந்து எழுகின்ற புகையோடும் கலந்து; கரிய மால்வரைக்
கொழுந்து எனப் படர்வன - கரியநிறமுள்ள பெரிய மலைச்சிகரங்களைப்
போல வானத்தில் படர்ந்து  செல்லுகின்றவற்றை;  காணாய் -.

     வேடுவர் அகில் சுட்ட புகைம்,  வேதியர் வேள்விப் புகையும்,  ஒன்று
கலந்து மலைச்சிகரம் போல் உள்ளது  என்பதால் மறமும் அறமும் கலந்து
விளங்குவதைக்குறிப்பிட்டார்.                                    18

     நானம், நாள்மலர், நறை, அகில், நாவி, தேன், நாறும் சோனை
வார் குழல்சுமை பொறாது - புழுகு, அன்றலர்ந்த மலர், மணப் பொருள்,
அகிற்புகை, கத்தூரி, தேன்இவற்றைப் பெற்று மணம் வீசும் திரண்ட நீண்ட
கூந்தல் பாரத்தைத் தாங்க மாட்டாமல்;  இறும் இடைத்தோகாய் -
ஓடிகின்ற இடையினை உடைய மயில் போன்றவளே!; வான யாறு - வான
வழியில்;  மின் மலர்ந்து என - நட்சத்திரங்கள் தோன்றின என்னும்படி;
புனல் வறந்த கான யாறுகள் - நீர் வற்றிப் போன காட்டாறுகளில்;  கதிர்
மணி இமைப்பன- ஒளியுடைய மணிகள் விட்டு விளங்குகின்றவற்றை;
காணாய் -.

     நானம் முதலியன கூந்தலுக்கு ஊட்டும் மண விசேடமாம். வான யாறு-
தேவகங்கை என உரைத்து அதில் வண்ண மீன்கள் போல எனலும் ஆம். 19