| 1431. | ஏவின வள்ளுவர், ‘இராமன், நாளையே
பூமகள் கொழுநனாய், புனையும் மௌலி; இக்
கோ நகர் அணிக!’ என, கொட்டும் பேரி அத்
தேவரும் களி கொள, திரிந்து சாற்றினார். |
ஏவின வள்ளுவர் - (அரசனால்) ஏவப்பட்ட வள்ளுவர்; இராமன் -;
நாளையே -நாளைக்கே; பூமகள் கொழுநனாய் - நிலமகள் கணவனாய்;
மௌலி புனையும் - மகுடம்சூடுவான்; (ஆதலால்) இக்கோநகர் - இந்தத்
தலைமை நகரத்தை; அணிக - அலங்கரிக்க; என - என்று சொல்லி;
கொட்டும் - முழுக்குகின்ற; பேரி - முரசத்தை; அத்தேவரும் களிகொள-
விண்ணுலகத்துத் தேவரும் மகிழ்ச்சிகொள்ள; திரிந்து- நகர் எங்கும் சுற்றி;
சாற்றினார் - அடித்து முழக்கினார்கள். வள்ளுவர் பறையறைந்து முடிசூட்டுவிழாச் செய்தியைத் தெரிவித்தனர்.
தேவர் களிகொள்ளல்அரக்கர் குலம் அழியச் சமயம் அணுகியது என்பதால்
ஆகும். பேரி - பெருமுரசு. கோநகர் -தலைநகர்; அரசு வீற்றிருக்கின்ற
நகரம். 33 மக்கள் மகிழ்ந்து, நகரை அழகு செய்தல் | 1432. | ‘கவி அமை கீர்த்தி அக் காளை நாளையே
புவி அமை மணி முடி புனையும்’ என்ற சொல்,
செவி அமை நுகர்ச்சியது எனினும், தேவர்தம்
அவி அமுது ஆனது, அந் நகர் உளார்க்கு எலாம். |
கவி அமை கீர்த்தி அக் காளை - கவிதைகளில் புனையப்படும்
புகழை உடைய அந்த இராமன்;நாளையே - நாளைக்கே; புவி அமை -
அரசு புரிதற்குரிய; மணிமுடி - அழகியமகுடத்தை; புனையும் - தரிப்பான்;
என்ற சொல் - என்ற வள்ளுவர் வார்த்தை; செவி அமை நுகர்ச்சியது
எனினும் - காதுகளால் அணுபவிக்கப்படும் ஓசை இனிமையளவினதுதான்
ஆனாலும்; அந்நகர் உளோர்க்கு எலாம் - அயோத்தி நகரில்
உள்ளவர்களுக் கெல்லாம்;தேவர்தம் - தேவர்களது; அவி அமுது
ஆனது - அவியுணவையும் அமுதத்தையும் ஒத்திருந்தது. செவி நுகர்ச்சிக்கு எட்டியது நிலவுலகச் சொல்லே; ஆயினும், தேவர்தம்
அமுதமெனச் சுவைப்பயன் தந்தது என்பது கருத்து. கீர்த்தி என்பது கொடைப்புகழ் .“உரைப்பார் உரைப்பவை எல்லாம்
இரப்பார்க்கு ஒன்று, ஈவார்மேல் நிற்கும் புகழ்” என்றார் வள்ளுவரும்.
(குறள். 232) அவி - வேள்வியில் கொடுக்கப்பெறுவது.அமுதம்-பாற்கடலில்
இருந்து பெறப்பட்ட சாவா மருந்து. அவியமுது உம்மைத்தொகை.
‘நாளையே’.‘ஏ’ தேற்றம். 34 |