முன்னை நாள் -முன்னாளில்;முனியொடு -விசுவாமித்திர
முனிவருடன்;முதிய நீள் மிதிலை வாய்  -நீர்வளம் உள்ள பழமையான
மிதிலா நகரத்தில்;சென்னி நீள் மாலையான் -தலையில் நீண்ட மாலை
புனைந்தவனான சனக மன்னனது;வேள்வி காணிய -யாகத்தைக்
காண்பதற்காக;செல -(நான்) சென்றபோது;அன்னம் ஆடும் துறைக்கு
அருகு -அன்னப் பறவைகள் (தத்தம் பேடைகளுடன்) விளையாடும்
நீர்த்துறைக்கு அருகிலுள்ள;அக் கன்னி மாடத்திடை -அந்தக் கன்னிகா
மாடத்தின் உப்பரிகையில்;நின்றாளை -நின்று கொண்டிருந்த சீதையை;
கண்டதும் -பார்த்ததையும்;சுழறுவாய் -(நீ) அவளிடம் கூறுவாய்.

     விசுவாமித்திர முனிவன் இராமஇலக்குவரைத் துணையாக வைத்துக்
கொண்டு தனது வேள்வியை முடித்த பின்பு மிதிலையில் சனக மன்னன்
செய்யும் யாகத்தைக் காண்பதற்காக அவர்களுடன் சென்றான்; மிதிலையில்
புகுந்த பின்பு சனக மன்னனது அரண்மனையைச் சூழ்ந்துள்ள அகழியின்
அருகேயுள்ள கன்னி மாடத்தின்மேல் சீதையிருக்க அவளைத் தான் கண்டதை
இராமன் அடையாளமாக எடுத்துக் கூறுகின்றான்என்பது.               67

     கரை செயா வேலையின் -கரை அமைக்க முடியாத கடல் போன்ற;
பெரிய கற்பினள் -சிறந்த கற்பினையுடைய சீதை;வரை செய் வில்தாள்
இறுத்தவன் -மலையைப் போன்ற (சிவனுடைய) வில்லை ஒடித்தவன்;அம்
மாமுனியொடும் -அத் தெய்வத் தன்மை பொருந்திய விசுவாமித்திர
முனிவனுடனே;விரசினான் அல்லனேல் -வந்தவனாக இல்லாமற் போனால்;
யான் உயிரை விடுதல் என -நான் எனது உயிரை விட்டுவிடுவேன் என்று;
தெரிந்து உரை செய்தாள் -ஆராய்ந்து கூறினாள்;அஃது எலாம் -அந்தச்
செய்திகள் அனைத்தும்;உணர நீ உரை செய்வாய் - (அவள்) தெளிவாக
அறியுமாறு நீ சொல்வாய்.

     இராமன் வில்லை முறித்த செய்தியைத்  தோழி யொருத்தி சொல்லக்
கேட்ட சீதை 'விசுவாமித்திர முனிவனுடன் வந்தவன் இந்த வில்லை
இறுத்தவனாக இல்லாவிட்டால் நான் உயிரை மாய்த்துக் கொள்வேன் எனக்
கருதியிருந்ததைப் பின்பு