திருமாலின் திரிவிக்கிரமாவதார காலத்தில் அவன் திருவடிகள் உலகில்
பரவியதைக் காணுமாறு சாம்பவான் பலமுறை பூமியை வலம் வந்தவனாதலால்
உலகத்திலுள்ள பல செய்திகளைத் தெரிந்திருத்தல் பற்றி அவன் இந்த
அசுரனைக் குறித்து இன்னானென்று வினவியறிந்திருந்தான் என்பது. தூ நிவந்த
வேல்: துமிரனது வேலின் வெற்றிச் சிறப்பைக் கூறுவது. தூ - புலால்.
அங்கதன் இத் துமிரன் என்னும் அசுரனைக் கொன்ற செய்தி வானரர் பிலம்
புகுவதற்குமுன் நிகழ்ந்த்தாகக் கூறும்வான்மீகம்.                      10

வானரர் பெண்ணையாற்றை அடைதல்

     வேறும் -இவ் வசுரனையல்லாமல் வேறு சிலரும்;எய்துவார்
உளர்கொல் ஆம் எனா -இங்கு போருக்கு வரக் கூடியவர் இருக்கி
றார்களோ என்று கருதி;இன்துயில் செலவு தீர்ந்துள்ளார் -(தமது) இனிய
தூக்கத்திலிருந்து விழித்தெழுந்து (அவ்வாறு வருபவர்களைச் சிறிதுநேரம்
எதிர்நோக்கின் பின்பு);தேறி -இனி எவரும் வாரார் எனத் தெளிந்து;வீறு
செஞ்சுடர்க் கடவுள் -பெருமை மிக்க சிவந்த கதிர்களையுடைய சூரியன்;
வேலை வாய் நாற -கிழக்குக் கடலிடத்துத் தோன்ற;நாள் மலர்ப்
பெண்ணை -புதிதாய் மலர்ந்த மலர்கள் நிறைந்த பெண்ணையாற்றை;
நாடுவார் -நோக்கிச் சென்றனர்.

     வானரவீரர் 'இன்னும் இவன்போன்ற அசுரர் வேறு யாரேனும் போருக்கு
வரக் கூடும்' என்று கருதித் தூங்காமல் விழித்திருந்து எதிர்பார்த்த பின்பு,
சூரியன் உதிக்கும் வேளையில் சீதையைத் தேடுமாறு அங்கிருந்து புறப்பட்டுப்
பெண்ணையாற்றை அடைந்தனர்.  வேறும்  - எச்சவும்மை. வீறு : பிறர்க்கு
இல்லாத தனிப் பொலிவு. நாறுதல் :தோன்றுதல்.                    11

     பெண்ணை நாடுவார் -சீதையைத் தேடிச் சென்ற அவ்வானர
வீரர்கள்;புள் நை -சக்கரவாகப் பறவைகள் (ஒப்பாகாமல்) வருந்துவதற்குக்
காரணமான;புளின வெம்முலை -மணற்குன்றுகளாகிய விரும்பத்தக்க