:: TVU ::

இராவணன் மந்திரப் படலம்

நாம் பயந்தோம் என்றால்;திண்ணிய அரக்கரில் - வலிமை மிக்க அரக்கராகிய நம்மைவிட; தீரர் யாவரே - வீரர்கள் யாருள்ளார்?
கண்ணுதல்-கருதுதல். உட்குதல்-அஞ்சுதல் அரக்கர்களில் தீரர் யாவரே என்றது இகழ்ச்சி குறிப்பாம்.
(34)
6105.்	'எரி உற மடுப்பதும், எதிர்ந்துளோர் படப்
	பொரு தொழில் யாவையும் புரிந்து, போவதும்
	வருவதும், குரங்கு; நம் வாழ்க்கை ஊர் கடந்து,
	அரிதுகொல், இராக்கதர்க்கு ஆழி நீந்துதல்?

வருவதும்- நாம் வாழும் ஊராகிய இலங்கை மாநகருக்கு வருவதும்; எரி உற மடுப்பதும் - ஊருக்குத் தீ இடுவதும்; எதிர்ந்துளோர் பட - எதிர்த்தவர் இறக்கும்படி; பொருதொழில் - போர் புரியும் தொழில்கள்; யாவையும் புரிந்து - எல்லாவற்றையும் செய்து; போவதும் - ஊரைக் கடந்து தப்பிப் போவதும்; குரங்கு - ஒரு குரங்கு செய்யும் செயலாயிற்று; கடந்து நம் வாழ்க்கை ஊர் - நாம் வாழும் ஊரைக்கடந்து; இராக்கதர்க்கு - அரக்கர்களாகிய நமக்கு; ஆழி நீந்துதல் - கடலை நீந்திக் கடப்பதென்பது; அரிது கொல்- செய்ய இயலாத அரிய செயலோ?
(35)
6106.	'வந்து, நம் இருக்கையும், அரணும், வன்மையும்,
	வெந் தொழில் தானையின் விரிவும், வீரமும்,
	சிந்தையின் உணர்பவர் யாவரே சிலர்,
	உய்ந்து தம் உயிர்கொடு இவ் உலகத்துள் உளார்?

வந்து நம் இருக்கையும் - இலங்கைக்கு வந்து நாம் வாழும் நமது இருப்பிடங்களையும்; அரணும் - இலங்கைக்குப் பாதுகாப்பான அரண்களையும்; வன்மையும்- நமது வலிமையையும்; வெந்தொழில் - கொடிய போர்த்தொழில் வல்ல; தானையின் விரிவும் - சேனையின் பாப்பையும்; வீரமும் - அதன் ஆற்றலையும்; சிந்தையின் உணர்பவர் - மனத்தினால் அறிய வல்லவர்கள்; உய்ந்து தம் உயிர் கொடு - நம்மிடம் பகைத்து பிழைத்து உயிருடன் சென்றவர்கள்; இவ்வுலகத்துள் உளார் - இவ்வுலகத்திலே இருப்பவர்கள்; யாவரே சிலர் - சிலரேனும் யார் இருக்கிறார்கள்?