:: TVU ::

978

யுத்த காண்டம்

7626.	'வெல்லுமா நினைக்கின்ற வேல் அரக்கன்,
	வேரோடும்
	கல்லுமா முயல்கின்றான், இவன்" என்னும்
	கறுவுடையான்;
	ஒல்லுமாறு இயலுமேல், உடன்பிறப்பின் பயன் ஓரான்;
	கொல்லுமால், அவன் இவனை; குறிக்கோடி,
	கோடாதாய்!

கோடாதாய்- நீதிநெறி தவறாதவனே; வெல்லுமா நினைக்கின்ற வேல் அரக்கன் - வெல்லுமாறு எண்ணுகின்ற வேல் படையை உடையவனாகிய இராவணன்; இவன் வேரோடும் கல்லுமா முயல்கின்றான் என்னும் - இவ்வீடணன் தன்னை அடியோடு அழிக்க முயல்கின்றான் என்னும்; கறுவுடையான் - உள்ளடங்கிய வஞ்சம் உடையான்; ஒல்லுமாறு இயலுமேல் - வாய்ப்பு நேருமானால்; அவன் இவனை- அந்த இராவணன் இந்த வீடணனை; உடன் பிறப்பின் பயன் ஓரான் கொல்லுமால் - உடன் பிறப்புப் பாசத்தின் பயனை உணராதவனாய்க் கொல்லுவான்; குறிக்கோடி- இதனை மனதில் கொள்.
உடன்பிறப்பின் பயன் ஓரான் என்ற தொடர் கும்பகருணன் உடன்பிறப்பின் தன்மையை உணர்ந்தவன் என்பதைக் காட்டுகிறது. இப்பிறவியில் உடன்பிறந்தவர் அடுத்த பிறவியில் உடன்பிறந்தவர் ஆகப் பிறக்க வேண்டிய நியதியில்லை ஆகையால் இவ்வாறு குறிப்பிட்டான் என்க. கல்லுதல் - அழித்தல். கறு - உள்ளடக்கிய வஞ்சம். செயிர்ப்பு என்றார் பிறரும். ஒல்லுமாறு இயலுமேல்-வாய்ப்பு நேருமானால்.
(355)
7627.	'தம்பி என நினைந்து, இரங்கித் தவிரான், அத்
	தகவு இல்லான்;
	நம்பி! இவன்தனைக் காணின் கொல்லும்; இறை
	நல்கானால்;
	உம்பியைத்தான், உன்னைத்தான், அனுமனைத்தான்,
	ஒரு பொழுதும்
	எம்பி பிரியானாக அருளுதி; யான் வேண்டினேன்.

நம்பி- ஆடவரில் சிறந்தவனே!; அத்தகவு இல்லான்- அந்த நற்குணமில்லாதவனாகிய இராவணன்; தம்பி என நினைந்து இரங்கித் தவிரான்- வீடணன் தம்பி ஆயிற்றே என்று எண்ணி இரக்கம் கொண்டு உயிரோடு விட்டிடான்; இவன்தனைக் காணின்