நீலகண்டனும் - நீல   நிறமான கழுத்தை  உடைய சிவனும்;
நேமியும் -  சக்கராயுதத்தை  உடைய திருமாலும்; நேர் நின்று
நேரின் -   நேருக்கு   நேர்   நின்று   பொருதால்;   ஏலும்
அன்னவருடை வலி -  எதிர்க்கும்  அவர்களது  வலிமையும்;
அவன் வயின்  எய்தும் - அந்த வாலியிடம் சேர்ந்து விடும்;
சாலும்  நல்வரம் நினைந்து -  மிக்க அந்த நல்ல வரத்தை
நினைத்தே; அம்மனிதனும் - நீ சொன்ன அந்த மனிதனாகிய
இராமனும்;  அவன் எதிர் செலல் தவிர்ந்து -  அவனுக்கு
எதிரிலே  சென்று    நின்று    போரிடுவதைத்    தவிர்த்து;
வாலிதன்னை -   அந்த  வாலியை;   மறைந்து  நின்று
எய்தான்- மறைந்து நின்று அம்பெய்து கொன்றான்.
 

நேமி-சக்கரம், இங்கு அப் படை கொண்ட திருமாலைக்
குறித்து   நின்றது.   நேரின்-எதிர்த்தால் ஏலும்-எதிர்க்கும்.
எதிர்த்தவர் பலத்தில்  பாதி வாலிபால் எய்தும் என்பதனை
"கிட்டினார்  பொரக்கிடைக்கின் அன்னவர் பட்ட நல்வலம்
பாதி   எய்துவான்"  (3825)   என்று   முன்னும்  கூறுதல்
காணலாம்.
 

(108)
 

ஊனவில் இறுத்து - ஏற்கனவே ஊனமான வில்லை முறித்து;
ஓட்டை மாமரத்துள் அம்பு ஓட்டி - ஓட்டை மரத்திலே அம்பு
செலுத்தி;  கூனி  சூழ்ச்சியால் அரசு  இழந்து - கூனி செய்த
சூழ்ச்சியினால் ஆட்சியை இழந்து;உயர்வனம் குறுகி - உயர்ந்த
மரங்கள் நிறைந்த வனம் அடைந்து; யான்  இழைத்திட  இல்
இழந்து- நான் செய்த  செயலால்  மனைவியை  இழந்து; இன்
உயிர்   சுமக்கும் -  இன்னுயிரைச் சுமந்து திரியும்; மானுடன்
வலி - ஒரு   மனிதனுடைய வலிமையை;நீ அலாது - உன்னை
அல்லாமல்; யார்  உளர்  மதித்தார் -  மதித்தவர்கள் வேறு
யாருள்ளார்?