மண்ணுலகு, கீழ்உலகு என்பனவாம். முற்றுற-முற்றும் உற என்பதன்
உம்மை தொக்கது. நிரம்ப என்றுமாம். வான்மீகத்தில் இலங்கையை
மீண்டும் அமைத்தது கூறப்படவில்லை. நினைத்த நினைப்பால்
படைத்தல் வல்லவன் தெய்வதச்சன் என்பதால் 'கணத்தின்
இயற்றினன்' என்றார்.

(1)

இராவணன் சினம் நீங்குதல்

மொய்கழல் மன்னன் - வீரக்கழலணிந்த இராவணன்;
பொன்னினும் மணியினும் அமைந்த பொற்புடை
- பொன்னாலும் மணிகளாலும் அமைக்கப்பட்ட அழகுடைய;
நல்நகர் நோக்கினான் - நல்ல நகராகிய இலங்கையைப்
பார்த்தான்; நாகம் நோக்கினான் - தேவர் தலைநகராகிய
அமராவதியைப் பார்த்தான்; முன்னையின் அழகுடைத்து-
முன்பிருந்ததை விடவும் அழகுடையதாய் அமைந்துள்ளது; என்று
உவந்து - என்று கூறி மகிழ்ந்து; தன் முனிவு மாறினான்-
கோபம் நீங்கினான்;

மொய்கழல் - கால்களில் செறிந்த வீரக்கழல். "மன்னனும்
நகர் நோக்கினான் முனிவு மாறினான்" என இயையும். முனிவு-
அனுமன் இலங்கையை எரித்ததால் எழுந்த கோபம். நாகம்-
விண்ணுலகம் இங்கு ஆகுபெயராய் அமராவதியை உணர்த்தியது.
'நாகம் நோக்கினான் நல்நகர் நோக்கினான்' என்றது அமராவதியை
இலங்கையுடன் ஒப்பிட்டுப் பார்த்து அதனிலும் இலங்கை அழகு
மிக்கது என்று அறிந்து மகிழ்ந்தான் என்பது கருத்து.

(2)

முழுப்பெரும் தனி முதல் - முழுமையான பெரிய ஒப்பற்ற
தலைவனும்; உலகின் முந்தையோன் - உலகம் தோன்றுவதற்கு
முன்னமே தோன்றியவனுமான பிரமதேவன்; எழிற்குறி காட்டி