வீர ராகவேசப் படலம்

அறுசீரடி யாசிரிய விருத்தம்

     புத்தர் தலைவரும், மகதியாழுக்குரிய அறிவு கெழுமிய நாரத
முனிவரும் வழிபாடு செய்யச் சிவபெருமானார் இனிது விளங்கும் கயிலாயத்
தலத்தினது வரலாற்றைக் கூறினோம். இத்தலத்திற்குக் கிழக்கில் செவ்விய
தேன் கிளைத்துக் கொத்துக்களில் வைத்து மலர்கள் விரிகின்ற சோலை
சூழ்ந்த வீரராகவேசத்தின் வரலாற்றைக் கூறுவாம்.

     கெழு-பொருந்துத லென்னும் பொருளையுடைய தொருசாரியை,
ராகவன்-ரகுமரபில் வந்தவன்,

இராமன் முறையிடல்

     பகைவருடைய செந்நீரை நிரம்பப் பருகி ஒளிவிடும் வேலையுடைய
இராமன் என்று சிறப்பித்துப் பேசப்படுவோன் தனது மனையறங்காக்கும்
உரிமை யுடைய சீதாபிராட்டியைத் தண்டகாரணியத்தில் முன்னாளில்
பிறர்க்கு அச்சந்தருதலையுடைய அஞ்சாமையையும், சினத்தையும் தீய
செயலையும் உடைய அரக்கனாகிய இராவணன் கவர்ந்து பின் விளையுந்
துன்பத்தை எண்ணானாகிப்பிறர் நெருங்குதற்கரிய இலங்கைக்குச் சென்றனன்.

     வீக்கிய கழல் ஒலிக்கின்ற வலிய தாளும் பேராற்றலும் உடைய இராமன்
அந்நாளில் அம்பை எய்கின்ற வில்லேந்திய தம்பி இலக்குவனோடும்
துன்பப்பட்டு வருந்தி இரங்கிக் கொய்கின்ற தழையையுடைய காடுகளில்
எவ்விடத்தும் சுழன்று தாமரைப் பொய்கையையுடைய வயல்சூழ்ந்த
திருத்தங்கு காஞ்சி மாநகரைச் சேர்ந்தனன்.