சுக்கிரீவனை வாலி மேலே தூக்கலும், இராமன் அம்பு செலுத்தலும் | 3999. | 'எடுத்துப் பாரிடை எற்றுவேன்,
பற்றி' என்று, இளவல்
கடித்தலத்தினும், கழுத்தினும், தன்
இரு கரங்கள்
மடுத்து, மீக் கொண்ட வாலிமேல்,
கோல் ஒன்று வாங்கி,
தொடுத்து, நாணொடு தோள்
உறுத்து, இராகவன் துரந்தான். |
பற்றி எடுத்துப் பாரிடை எற்றுவென் - (இவனைப்) பிடித்து
எடுத்துத்தரையில் மோதுவேன்; என்று - என்று எண்ணி; இளவல் - தன்
தம்பியான சுக்கிரீவனது; கடித்தலத்தினும் - இடையிலும்; கழுத்தி
னும் - கழுத்திலும்; தன் இரு கரங்கள் மடுத்து - தனது கைகள்
இரண்டையும் செலுத்தி; மீக் கொண்ட வாலிமேல் - (அவனை) மேலே
தூக்கியவாலியின் மேல்; இராகவன் - இரகு குலத் தோன்றலாகிய இராமன்;
கோல்ஒன்று வாங்கி - அம்பொன்றை எடுத்து; தொடுத்து - வில்லில்
பூட்டி; நாணொடு தோள் உறுத்து - வில்லின் நாணுடன் (தனது) தோளைப்
பொருந்துமாறு செய்து; துரந்தான் - செலுத்தினான். இடையில் ஒரு கையினையும் கழுத்தில் ஒரு கையினையும் கொடுத்துச்
சுக்கிரீவனை மேலே எடுத்துப் பூமியில் மோதிக் கொல்ல முயல்கையில்
இராமன் வாலியின் மேல் அம்பைத் தொடுத்தான் என்பதில் சுக்கிரீவன்
உயிரைக் காக்க வேண்டி தேவை இராமனுக்கு ஏற்பட்டதை உணரமுடிகிறது.
இளவல் - தம்பி; அல் - பெயர் விகுதி. கடிதலம் என்பது எதுகை நோக்கி,
தகரவொற்று இரட்டித்தது. கோல் - அம்பு. 65 |