மார்பினின்று அம்பை வாலி பறித்தபோது
இரத்த வெள்ளம் பெருகுதல் | 4009. | ஓங்கு அரும் பெருந்
திறலினும், காலினும், உரத்தின்
வாங்கினான், மற்று அவ்
வாளியை, ஆளிபோல் வாலி.
ஆங்கு நோக்கினர், அமரரும்
அவுணரும் பிறரும்,
வீங்கினார்கள் தோள்;-
வீரரை யார் வியவாதார்? |
ஆளி போல் வாலி - ஆண்சிங்கம் போன்ற வாலி; ஓங்கு அரும்
பெருந்திறலினும் - உயர்ந்த, அரிய பெரிய ஆற்றலினாலும்; காலினும் -
கால்களினைப் பயன்படுத்தியும்; அவ்வாளியை - அந்த அம்பினை; உரத்தின்
வாங்கினான் - மார்பினின்று பிடுங்கினான்; ஆங்கு நோக்கினர் - அங்கு
அதைப் பார்த்தவர்களான; அமரரும் அவுணரும் பிறரும் - தேவர்களும்,
அசுரர்களும், மற்றவர்களும்; தோள் வீங்கினார்கள் - தோள்கள் பூரிக்கப்
பெற்றார்கள்; வீரரை யார் வியவாதார் - வீரர்களை வியந்து
பாராட்டாதவர்கள் யார்? (யாருமில்லை என்றபடி). இராம பாணத்தைப் பறித்தெடுத்த வாலியின் ஆற்றலை 'ஓங்கு அரும்
பெருந்திறல்' எனக் கம்பர் பாராட்டுதல் காண்க. வீரர்களை வேறுபாடின்றி
யாவரும் பாராட்டுவர் ஆதலின் 'வீரரை யார் வியவாதார்?' என்றார்.
வேற்றுப்பொருள் வைப்பணி. மற்று - அசை. 75 |