வள அரசு எய்தி - எல்லா வளங்களும் பொருந்திய அரசாட்சியை
அடைந்து; மற்றை வானர வீரர் யாரும் - மற்ற வானர வீரர்கள் யாவரும்
கிளைஞரின் உதவ - சுற்றத்தார் போல வேண்டுவன செய்ய; ஆணை கிளர்
திசை அளப்ப - (தனது) அரச ஆணை விளங்குகின்ற திசைகளின்
எல்லையை அளாவவும்; அளவு இலா ஆற்றல் - அளவற்ற வலிமையும்;
ஆண்மை அங்கதன் - வீரமும் உடைய அங்கதன்; கேளோடு -
உறவினரோடு; அறம் கொள் செல்வத்து - அறவழியில் ஈட்டப்பட்ட
செல்வத்தோடு; இளவரசு இயற்ற - இளவரசனாக ஆட்சி புரியுமாறு; ஏவி -
கட்டளையிட்டு; இனிதினின் இருந்தான் - இனிமையாகக் கிட்கிந்தை
நகரத்தில் வீற்றிருந்தான்.  இப்பால் - (அஃது அங்ஙனமாகவும்) இப்புறத்தில். .

     சுக்கிரீவன் செய்தியை இவ்வாறு கூறி, மேல் இராமன் செய்தியைக்
கூறுகின்றார். ஆதலின் வேறுபாடு தோன்ற 'இப்பால்' என்றார். ஆணை கிளர்
திசை அளப்ப - தனது கட்டளை தடையின்றி எங்கும் செல்ல; கிளைஞரின்-இன்
ஐந்தாம் வேற்றுமை ஒப்புப் பொருளது.  கேள் - அரசியல் சுற்றமும் உறவியல்
சுற்றமும்.  இனிதினின் இருந்தான் - அங்கதன் இளவரசனாயிருந்து  அரச
காரியங்களைக் கவனித்து வரச் சுக்கிரீவன் இன்பம் அனுபவித்துக்
கொண்டிருந்தான் என்க.                                       33