கல்லிடைப் படும் - (அந்த மலையிலுள்ள) கற்களின் இடையே
(மேகங்கள்) சொரிகின்ற; துளித்திவலை - மழை நீர்த்துளிகள்; கார் இடு
வில்லிடை - மேகங்களில் தோன்றிய இந்திர வில்லிலிருந்து பாய்கின்ற; சரம்
என - அம்புகள் போல; விசையின் வீழ்ந்தன - வேகத்தோடு விழுந்தன;
செல்லிடைப் பிறந்த - (அம்) மேகங்களிலிருந்து தோன்றிய; செங்கனல்கள்-
செந்நிறம் கொண்ட இடியாகிய நெருப்புத் திரள்கள்; மணி அல்லிடைச்
சிறந்து - மாணிக்கங்கள் இரவுக் காலத்தில் மிகுதியாக ஒளிவீசி; அழல்
இயற்றல் போல் சிந்தின - நெருப்பொளி வீசுதல் போலச் சிந்தின.

     வில் - இந்திரவில். செல்வது என்ற இயல்பு பற்றி மேகம் 'செல்'
எனப்பட்டது போலும். மழைத் தாரைகள் அம்புபோல வீழ, இரவில் மாணிக்க
மணிகள் போல ஒளி வீசி இடிகள் சிந்தின என்பதால் நீர், நெருப்பு என
இரண்டினையும் மேகம் பெற்றிருந்தமை புலனாகிறது.                  16